അഫ്സലിനെ വിളിച്ചു വരുത്തി അവന്റെ കാറിലാണ് പിന്നീട് നാല് പേരും വീട്ടിലേക്ക് പോയത്..

ജാഷിയുടെ ഉമ്മ ഫർഹയേയും റൈഹാനെയും സന്തോഷത്തോടെയാണ് എതിരേറ്റത്..

ജാഷിയുടെ ചില ബന്ധുക്കളും അയൽക്കാരും പുതു പെണ്ണിനെ പരിചയപ്പെടാൻ വീട്ടിൽ തമ്പടിച്ചിരുന്നു…

ഉച്ചക്ക് ശേഷം ബിരിയാണി ചെമ്പ് ഏറെക്കുറെ കാലിയാക്കിയതിനു ശേഷമാണ് എല്ലാവരും വീട്‌ അവർക്ക് മാത്രമായി ഒഴിഞ്ഞു കൊടുത്തത്…

ഉമ്മയുടെയും ബാക്കിയുള്ളവരുടെയും നേർക്ക് തിരിയുമ്പോൾ പൂനിലാവ് ഉദിച്ചത് പോലെ തിളങ്ങുന്ന ഫർഹയുടെ മുഖം തന്നിലേക്ക് പായുമ്പോൾ ഇഞ്ചി കടിച്ചത് പോലെ കടുപ്പത്തിൽ ആക്കുന്നതെന്തേ എന്നവൻ ചിന്തിക്കാതെ ഇരുന്നില്ല..

കുട്ടികൾ രാവിലെ അടികൂടി കളിച്ചത് താൻ പറഞ്ഞിട്ടാണെന്ന തെറ്റിദ്ധാരണ ഉള്ളതുകൊണ്ടായിരിക്കാം എന്ന് ബോധമില്ലാത്ത അവന്റെ ബോധമണ്ഡലം കണ്ടെത്തി..

ഒരു തെളിവുകൾ പോലും നിരത്താൻ കഴിയാതെ കോടതി സമക്ഷം തെറ്റുകാരനായ പ്രതിയെപോലെ നിൽക്കാനാണ് തന്റെ വിധിയെന്ന് അവന് തോന്നി..

തോറ്റ് പിന്മാറാൻ അവൻ ഒരുക്കമായിരുന്നില്ല. നല്ല പിള്ള ചമയാനുള്ള കുറുക്കുവഴികൾ അവൻ മനസ്സിൽ ചികഞ്ഞു..

രാത്രി അത്താഴത്തിന് ശേഷം ഹാളിൽ ടീ വി കാണുകയായിരുന്ന കുട്ടിപ്പട്ടാളത്തിന് നേരെ അവൻ നടന്നടുത്തു.. അവന്റെ മനസ്സിൽ എന്തോ ഒന്ന് തീരുമാനിച്ചുറപ്പിച്ചിരുന്നു..

ഫർഹയും ഉമ്മയും അടുക്കളയിൽ വിം ബാറുമായി പാത്രങ്ങളോട് കിന്നാരം പറയുകയായിരുന്നു അപ്പോൾ..