💕ചെമ്പനീർപ്പൂവ് 5 [കുട്ടപ്പൻ]💕 1570

“വല്യമ്മാമേ… “ഒരു ഞെട്ടലോടെയാണ് ഇന്ദിര അത് കേട്ടത്.

അവരുടെ മിഴി സജ്ജലമായി.

ജയശങ്കറിന്റെ അവസ്ഥയും മറിച്ചല്ല.

 

“പ്രതിവിധി ഒന്നുമില്ലേ വല്യമ്മാമേ…”

ജയശങ്കർ ചെറിയ പ്രതീക്ഷയോടെ ആരാഞ്ഞു.

 

“തീർച്ചയായും ഉണ്ട്. അജുവിന്റെ കല്യാണം തന്നെയാണ് പ്രതിവിധി. എന്നാൽ അവന്റെ ജാതകവുമായി ചേരുന്ന ജാതകങ്ങൾ വളരെ കുറവായിരിക്കും. നമുക്ക് പാഴാക്കിക്കളയാൻ ഒട്ടും സമയവുമില്ല.” വല്യമ്മാമ പറഞ്ഞു.

 

“അപ്പൊ എങ്ങനെയാ വല്യമ്മാമേ… അങ്ങനെയുള്ള ജാതകം കണ്ടെത്താൻ ബുദ്ധിമുട്ടാണെങ്കിൽ എങ്ങനെ അജുവിന്റെ കല്യാണം പെട്ടന്ന് നടത്താൻ പറ്റും. ”

ഇന്ദിര ചോദിച്ചു.

 

“ഈ ജാതകവുമായി ചേരുന്ന ഒരു ജാതകം കഴിഞ്ഞയാഴ്ച ഞാൻ നോക്കിയിരുന്നു. ആ കുട്ടിയുടെ കല്യാണവും പെട്ടന്ന് നടക്കേണ്ടതാണ്. എന്തോ എല്ലാം ദൈവ നിശ്ചയം ആണെന്ന് തോന്നുന്നു. അതാണല്ലോ ആ ജാതകം എന്റെ കയ്യിൽ തന്നെ വന്നത്. ഒട്ടും സമയം കളയാൻ ഇല്ല. പറ്റിയാൽ നാളെത്തന്നെ പെണ്ണുകാണാൻ പോയി ഏറ്റവും ആദ്യത്തെ ശുഭമുഹൂർത്തത്തിൽ ഈ കല്യാണം നടത്തുക. അവരെ ഞാൻ വിളിച്ച് അറിയിച്ചോളാം. ”

വല്യമ്മാമ പറഞ്ഞു.

 

“അങ്ങനെ ആവട്ടെ വല്യമ്മാമേ. ” ജയൻ പറഞ്ഞു.

 

…………

 

ഇടിത്തീ പോലെയാണ് ഞാൻ അത് കേട്ടത്.

എന്റെ കല്യാണം. അതും എത്രയും പെട്ടന്ന്.

എന്റെ കല്യാണക്കാര്യത്തിൽ എനിക്ക് തീരുമാനം എടുക്കാൻ ഒരവകാശവും ഇല്ലേ !

ഞാൻ മാനസികമായി ഒരുപാട് തളർന്നു.

ചിന്നു എന്ന ചിന്ത എന്നെ ഒരുപാട് തളർത്തി.