അടികൊണ്ട കവിളും തടവി അവൻ കുറച്ച് നേരം അവിടെ നിന്നു.. 

വേദനെയെക്കാൾ അപമാനഭാരമാണ് അവന്റെ മനസ്സിനെ തളർത്തിയത്..

 

അതും ഒരു പെണ്ണിൽ നിന്ന്..

 

അവളോട് ഇതിന് പ്രതികാരം ചോദിക്കണം എന്നത് അവൻ മനസ്സിൽ അപ്പോഴേക്കും തീർച്ചപ്പെടുത്തിയിരുന്നു..

 

അന്തസ്സായി ജീവിക്കുന്ന തന്നെപ്പോലെ ഉള്ള ആളിനെ അവളെ പോലെയൊരു വൃത്തികെട്ട പെണ്ണ് തല്ലിയ കാര്യം ഓർക്കുമ്പോൾ തന്നെ അവന്റെ മനസ്സിൽ കോപത്തിന്റെ കനൽ ആളിക്കത്തി..

 

അവൻ പതുക്കെ തന്റെ ക്യാബിനിലേക്ക് നടന്നു.

 

പൊട്ടിക്കരഞ്ഞുകൊണ്ട്‌ ഓടിയ മിൻഹ നേരെ വാഷ്‌റൂമിലേക്കാണ് പോയത്.

 

ആരും കാണാതെ തന്റെ ഉള്ളിലെ വേദനകൾ ഒഴുക്കി കളയാൻ അവൾക്കിപ്പോൾ അതാണ് പറ്റിയ ഇടം.

 

കഴിഞ്ഞ കുറച്ചു കാലങ്ങളായി കണ്ണീരിന്റെ നനവറിയാത്ത ഒരു ദിനം പോലും ആ കണ്ണുകൾക്ക് ഉണ്ടായിട്ടില്ല.

 

ഷെറിൻ ഒരുപാട് നേരം വാതിലിൽ മുട്ടി വിളിച്ചെങ്കിലും അവൾ തുറന്നില്ല.

 

ഏറെ നേരങ്ങൾക്ക് ശേഷം മനസ്സൊന്ന് ശാന്തമായപ്പോൾ അവൾ പുറത്തേക്ക് വന്നു.

 

“എനിക്ക് ഇന്ന് ലീവ് വേണം..”

മിന്ഹയുടെ  വരവ് കാത്തുനിന്ന ഷെറിനോടായി അവൾ പറഞ്ഞു.

 

കാര്യമായി എന്തോ വിഷമം അവൾക്കുണ്ടെന്നു മനസ്സിലാക്കിയ ഷെറിൻ പിന്നീട് ഒന്നും ചോദിച്ചു അവളെ വിഷമിപ്പിച്ചില്ല.