അതിജീവനം 3 [മനൂസ്] 3032

 

ആക്‌സിഡന്റിനെ കുറിച്ചാണ് കൂടുതലും സംസാരം നടന്നത്.

 

പുലർച്ചെ ആയത് കൊണ്ട് ദൃക്‌സാക്ഷികൾ ആരും തന്നെ ഇല്ല..

 

ജനവാസം കുറഞ്ഞ സ്ഥലം ആയതിനാൽ കുറെ നേരം അവിടെ വണ്ടി അപകടത്തിൽപ്പെട്ടു കിടന്നിരിക്കാം എന്നാണ് മനോജിന്റെ നിഗമനം.

 

ഇതിനിടയിൽ സി ഐ ഹോസ്പിറ്റൽ സന്ദർശിച്ചു സ്ഥിതിഗതികൾ അറിഞ്ഞു പോയി.

 

അജോയ്(അഞ്ജലിയുടെ ചേട്ടൻ) ഇടക്കിടെ തങ്ങളെ ശ്രദ്ധിക്കുന്നത് ധ്രുവൻ കണ്ടിരുന്നു.

 

ഉള്ളിലെ ജാള്യത അവനെ അങ്ങോട്ട് ചെന്ന് മിണ്ടുന്നതിൽ നിന്നും വിലക്കി.

 

“കേസെടുത്തു അന്വേഷണം തുടങ്ങിയോ..”

 

ധ്രുവന്റെ കണക്കുകൂട്ടലുകൾ തെറ്റിച്ചുകൊണ്ടു അജോയ് അവനോട് മിണ്ടി.

 

പെട്ടെന്നുള്ള ഈ സംഭവത്തിൽ ഞെട്ടിപ്പോയ അവൻ സ്വബോധത്തിലേക്ക് തിരിച്ചു വന്നു.

 

“ആ തുടങ്ങി..”

 

“ഇടിച്ചത് ആരാണെന്ന് അറിയാൻ കഴിഞ്ഞോ..”

 

“ഇല്ല… പുലർച്ചെ ആയതുകൊണ്ട് ആളുകൾ ആരും കണ്ടിട്ടില്ല… പിന്നെ ഇടിച്ച സ്ഥലത്തെ ക്യാമറകൾ വർക്കിങ് കണ്ടീഷൻ അല്ലായിരുന്നു. അതുകൊണ്ട് ആ ചാൻസും പോയി..”

 

പതുക്കെ പതുക്കെ അവർ സംസാരിച്ചു തുടങ്ങി.

 

ഒരു അകൽച്ചയുടെ ലാഞ്ചന പോലും തോന്നാത്ത തരത്തിൽ ആയിരുന്നു അജോയ് മിണ്ടിയത്.

 

സൗമ്യതയോടെയുള്ള അജോയുടെ സംസാരം ധ്രുവന്റെ മനസ്സിന് സന്തോഷം നൽകി.

 

കുറച്ച് മാറി അഞ്ജലി അവർ സംസാരിക്കുന്നത് നോക്കി സന്തോഷിച്ചു.