ശങ്കരൻ മരിക്കുന്നില്ല…

Author: ശിവശങ്കരൻ 

 

 

“അച്ഛാ… എങ്ങനെയുണ്ട്…”

 

ചിരാതുകളിൽ തിരി തെളിയിക്കുകയായിരുന്ന ഗൗരി ഉറക്കെ ചോദിച്ചു. പല ആംഗിളിൽ നിന്നും അവളുടെ ഫോട്ടോസ് എടുക്കുകയായിരുന്നു അച്ഛൻ ഹരി.

 

ദീപാവലി… ദീപങ്ങളുടെ ഉത്സവം…

 

ഹരിക്ക് പക്ഷേ, നഷ്ടങ്ങളുടെ ഓർമ്മകൾ സമ്മാനിക്കുന്ന ദിവസം.

 

വർഷങ്ങൾക്കു മുൻപ്…

 

“അമ്മേ, പോണൂട്ടാ…”

ഓടി മുറ്റത്തേക്കിറങ്ങി ചെരുപ്പിടുന്നതിനിടെ, ഹരി വിളിച്ചു പറഞ്ഞു.

 

“എന്തെങ്കിലും കഴിച്ചിട്ട് പോടാ…” ലക്ഷ്മിയമ്മ അടുക്കളയിൽ നിന്നു വിളിച്ചു പറഞ്ഞു.

 

അത് കേൾക്കാഞ്ഞതോ, സമയമില്ലാഞ്ഞിട്ടു ഗൗനിക്കാഞ്ഞതോ, അവൻ ബൈക്കിൽ കേറി പാഞ്ഞു.

കുറച്ചു ദൂരം എത്തിയപ്പോളാണ് അവൻ ഓർത്തത്, ‘അയ്യോ മറന്നു… മറന്നു…’

അതേ സ്പീഡിൽ അവൻ തിരിച്ചു വന്നു.

 

“എന്ത്യേടാ… വായു പിടിച്ചു പോയിട്ടു?” അടുക്കളയിൽ നിന്നു അമ്മ പുച്ഛിച്ചു. “പതിവ് പോലെ മറന്നു ലേ…”

 

“ഹീ…” അവൻ ഇളിച്ചു കാണിച്ചുകൊണ്ട് അവൻ തന്റെ റൂമിൽ നിന്നും ക്യാമറ കയ്യിൽ എടുത്തു ബാഗിൽ ആക്കി ഓടി.

 

“അതിൽ പുസ്തകം വല്ലതും ഉണ്ടോടാ…” അമ്മ പിന്നെയും പുച്ഛിച്ചു.

 

“ഓ…” അവൻ വിളിച്ചു പറഞ്ഞുകൊണ്ട് ഓടി.

“ടാ ഇതെങ്കിലും ഒന്ന് കഴിച്ചിട്ട് പോടാ…” അമ്മ ഒരു പ്ലേറ്റിൽ ദോശയും അല്പം സാമ്പാറും ആയി വന്നു.

 

“സമയില്ല അമ്മേ… വൈകീട്ട് കഴിക്കാം.” അമ്മ നീട്ടിപ്പിടിച്ച ദോശയിൽ നോക്കാതെ അവൻ പറഞ്ഞു കൊണ്ട് പുറത്തേക്ക് ഓടി.

 

“ഒന്ന് പതുക്കെ പോടാ…” അച്ഛൻ വാങ്ങിക്കൊടുത്ത പഴയ ഗ്ലാമർ ബൈക്കിന്റെ അമറുന്ന ശബ്ദം കേട്ട് അമ്മ അകത്തു നിന്നു വിളിച്ചു പറഞ്ഞപ്പോഴേക്കും, അവൻ ബൈക്കുമായി മുന്നോട്ട് പോയിരുന്നു…

 

അവന്റെ പോക്ക് കണ്ടു അകത്തു നിന്നു ഓടിവന്ന അമ്മയുടെ കയ്യിൽ, മകന് കൊടുക്കാനുള്ള സാമ്പാറിൽ മുക്കിയ ഒരു കുഞ്ഞു കഷ്ണം ദോശയുണ്ടായിരുന്നു…

********************

 

“എടാ ഹരീ ഈവെനിംഗ് എന്താ പരിപാടി?”

ക്യാമറ ലെൻസിലൂടെ ലോകം കണ്ടുകൊണ്ടിരുന്ന ഹരിയോട് ശങ്കരൻ ചോദിച്ചു.

 

“വൈകീട്ട് നോ പ്രോഗ്രാംസ് മാൻ, മിസ്സിസ് ലക്ഷ്മിമാധവ് ഞാൻ ചെല്ലുന്നതും നോക്കി ഇരിക്കും. വേഗം എത്തണം. രാവിലെ ഒന്നും കഴിക്കാതെ പോന്നതിന്റെ പരിഭവം ഉണ്ടാകും അത് തീർക്കണം. പിന്നെ അമ്മയേം കൂട്ടി അമ്പലത്തിൽ പോകണം. ഇന്ന് ദീപാവലി അല്ലേടാ… അതിനിടയിൽ, ആ ഫോട്ടോഗ്രാഫി കോമ്പറ്റിഷന് അയക്കാൻ പറ്റിയ ഒന്ന് രണ്ടു പിക് എടുക്കണം. അതിനി എങ്ങനെയെന്നാ… ഒരു ഐഡിയയും തോന്നുന്നില്ലല്ലോ എന്റെ ശങ്കരാ…” ഹരി മേലേക്ക് നോക്കി വിളിച്ചു.