ശങ്കരൻ മരിക്കുന്നില്ല…[ശിവശങ്കരൻ] 154

 

അവൾ പറഞ്ഞാൽ പിന്നെ വേറെന്ത് നോക്കാൻ…

 

റെഡി ആയി ഞങ്ങൾ രണ്ടും പുറത്തേക്ക് ഇറങ്ങാൻ നേരം അമ്മയുടെ വക…

“ഒരൊഴിവു കിട്ടിയാൽ അപ്പൊ ഇറങ്ങിക്കോളും ആങ്ങളേം പെങ്ങളും കൂടി സർക്കീട്ടിനു. നിനക്കടങ്ങി ഇരുന്നൂടെടാ, അവളെങ്ങനെയൊക്കെ പറയും.”

 

“അവളെങ്ങനെ പറയുമ്പോ ഇങ്ങനെ ചെയ്യാനല്ലെടീ, അവൾക്ക് തണ്ടും തടിയുമുള്ള ഈ ആങ്ങളയുള്ളത്.”

ആ മറുപടി അച്ഛന്റെ വക.

 

“അല്ലേലും അച്ഛനും മക്കളും ഒറ്റക്കെട്ടാ…”

 

“അതെ, ഈ കെട്ട്, അവർ പോയിട്ടു നീ എന്റെ മുന്നിൽ തുറന്നാ മതി, മക്കള് പോയിട്ടു വാ…”

 

ചാടിത്തുള്ളി വന്നിട്ട്, അമ്മയുടെ ഡയലോഗ് കെട്ട് ഇപ്പൊ കരയും എന്ന് പറഞ്ഞു നിന്ന, പ്രിയയുടെ അടുത്ത് ചെന്നു അച്ഛനത് പറഞ്ഞപ്പോ, “താങ്ക്സ് അച്ഛാ” എന്നും പറഞ്ഞു അച്ഛന്റെ കവിളിൽ ഒരുമ്മ കൊടുത്ത് അവളവനെയും പിടിച്ചു വലിച്ചുകൊണ്ട് ഓടി…

********************

 

“അന്നവൾ കാണിച്ചു തന്ന വഴിയാണ് ഇത്… ഇന്ന് നീ ആ കോമ്പറ്റിഷന് അയക്കാൻ പിക് വേണം എന്ന് പറഞ്ഞപ്പോ, ഫോട്ടോഗ്രാഫിയെ കുറിച്ച് അറിയില്ലെങ്കിലും ആദ്യം ഉള്ളിൽ തോന്നിയ സ്ഥലം ഇതാണ്.”

 

“ഛേ… ഫ്ലോ കളഞ്ഞു നീയാ കുട്ടീടെ കാര്യം പറയടാ കാലാ…”

 

“ആഹ്, പറയാടാ…” ചിരിച്ചുകൊണ്ട് ശങ്കരൻ തുടർന്നു…

 

“അന്ന് ഈ കോവിലിൽ വന്നപ്പോൾ, തെളിയുന്ന ദീപനാളങ്ങൾക്കരികിലൂടെ നടക്കുന്ന അവളെ ഞാൻ കണ്ടു… ആ ദീപങ്ങൾ ശോഭയിൽ അന്തരീക്ഷത്തിലെ

ഇരുട്ട് മാത്രമല്ല അകന്നത്, ശങ്കരൻ എന്ന എന്റെയുള്ളിലെ ഇരുട്ട്കൂടിയാണ്… അത്രക്ക് ഐശ്വര്യം ആയിരുന്നൂടാ…”

 

“ആഹാ കവിത… ഇത് നീയാ പ്രതിലിപിയിൽ എഴുതടാ… ഫോള്ളോവെർസ് കൂടും.”

 

“ഒന്ന് പോടാ…”

 

“ആഹ് അതുപോട്ടെ, നീ ബാക്കി പറ, കുഞ്ഞിയോട് പറഞ്ഞോ, അവൾ എന്ത് പറഞ്ഞു?”

 

“അവൾ ഹാപ്പി ആണ് സമയാകുമ്പോൾ അവൾ അമ്മയോടും അച്ഛനോടും പറയാം എന്ന് പറഞ്ഞു.”

 

“ആ കുട്ടിയുടെ വീട് ഒക്കെ എവിടെയാന്ന് അറിയോടാ…” ഹരി സംശയത്തോടെ ചോദിച്ചു.

 

ശങ്കരൻ ചിരിച്ചുകൊണ്ട് എഴുന്നേറ്റു. “നീ വാ…”

 

ഒന്ന് ശ്രീകോവിലിൽ നോക്കി തൊഴുതിട്ട്, ഇരുവരും തിരിച്ചിറങ്ങി.

 

“ശങ്കരാ… എനിക്കൊരു കാര്യം…” ഹരി മുക്കിയും മൂളിയും പറഞ്ഞു തുടങ്ങിയപ്പോൾ, ശങ്കരൻ പുത്തൻ വണ്ടിയുടെ താക്കോൽ ഹരിക്ക് നേരെ നീട്ടി.

 

“വണ്ടിയെടുക്കടാ…”

 

“ഏഹ്… ഞാൻ ചോയ്ച്ചു കൂടിയില്ലല്ലോ…” അവൻ നിറകണ്ണുകളോടെ ശങ്കരനെ നോക്കി.

 

“നിന്നു സെന്റി അടിക്കാതെ വണ്ടി എടുക്കടാ, നിന്റെ നോട്ടത്തിൽ നിന്നും ഭാവത്തിൽ നിന്നും കണ്ടു പിടിക്കാൻ പറ്റിയില്ലെങ്കിൽ, ഞാൻ എങ്ങനാടാ നിന്റെ ബ്രദർ ആകുന്നെ…”