💖💖 സ്വയംവരം 02 💖💖 1998

“നിന്ക്ക് ഇത് ശര്യാക്കാന് അറിയോ??.”

“ഏയ്‌, ഒരു വശം ശര്യാക്കും…. ആ പിന്നെ പണ്ടിന്നാള് രണ്ടു വശം ശര്യായതാ…… പിന്നെ പറ്റണില്ല്യാ….”

“അതൊക്കെ ന്റേട്ടൻ എപ്ളും ചെയണതാ….”

എന്റെ ഏട്ടന്റെ കയ്യിൽ ക്യൂബ് ഇല്ലെങ്കിൽ കൂടി അവളുടെ മുൻപിൽ തോൽക്കാതെ ഇരിക്കാൻ പുച്ഛം കലർത്തി ഞാനൊരു കാച്ചങ്ങ് കാച്ചി….

അവൾ പക്ഷേ അതിനെ കുറിച്ച് കൂടുതൽ സംസാരിക്കാതെ എന്നോട് ചോദിച്ചു…..

“നിൻക്ക് ചെമ്പകം വേണാ?? നല്ല മണാ…”

അവളെ എന്നും ഞാനൊഴികെ എല്ലാ കുട്ടികളുടെയും കണ്ണിലുണ്ണി ആക്കി മാറ്റുന്നത് അവളുടെ പഠിപ്പ് ആയിരുന്നില്ല…. പകരം അവൾ കൊണ്ടു വരുന്ന ചെമ്പകപ്പൂക്കൾ ആയിരുന്നു..

“എവട്യാ”

അവൾ ചെമ്പകം കൊണ്ടു വരുന്നത് അല്പം അസൂയയോടെ നോക്കിനിന്നിട്ടുള്ള ആളാണ് ഞാനല്ലോ….

“ആ ജന്ല് തൊർന്നേ…”

അവളുടെ കണ്മഷി, പൊട്ടുകുപ്പി, ചുരുട്ടികെട്ടി വച്ച ഒരുണ്ട മുടി ഇത്യാദി മേക്കപ്പ് വസ്തുക്കൾ നിരന്നും ഒരുനൂറ്‌ ഒട്ടു പൊട്ടു ഒട്ടിച്ച പശ പരന്നും നിറം മങ്ങിയ ജനലിന്റെ ഒരു പാളി തുറന്നപ്പോൾ പൂത്ത ചെമ്പകത്തിന്റെ സുഗന്ധം മൂക്കിലേക്ക് പ്രവഹിച്ചു..

അവള് എന്നും ചെമ്പകം കൊണ്ട് വരുമായിരുന്നു.. ക്ലാസ്സിൽ വന്നാൽ അപ്പൊ പിള്ളേർ എല്ലാം കൂടെ അവളിൽ നിന്നു തട്ടിപ്പറിച്ചു വാങ്ങാനും നില്കും.. എനിക്ക് മാത്രം ആഗ്രഹം ഉണ്ടെങ്കിലും വാങ്ങാൻ തോന്നാറില്ല. എന്റെ മുഖ്യ എതിരാളി അല്ലെ….

ചെമ്പകം വാങ്ങാറില്ലെങ്കിലും  എല്ലാ ചെമ്പകപൂക്കളും വിതരണം ചെയ്തു കഴിയുമ്പോൾ ഞാനവളുടെ അടുത്തുകൂടി നടക്കും…..

കാരണം അവൾക്കൊരു മണമുണ്ട്… ചെമ്പകപ്പൂവിന്റെ മണം…. ഒരു പെർഫ്യുമിനും നൽകാൻ കഴിയാത്തത്ര സുഗന്ധദായകമായ ചെമ്പകത്തിന്റെ മണം…. അതാസ്വദിക്കാൻ മാത്രമായി ഞാനവളെ ചുറ്റി പറ്റി നടക്കുമായിരുന്നു….