💖💖 സ്വയംവരം 02 💖💖 1998

“അവള്ടെ പുസ്തകം ഒക്കെ വെള്ളത്തി പോയി എന്നാ കേട്ടെ.. നിന്റെലെ നോട്ട്സ് അവൾക്ക് പകർത്തി എഴുതാൻ കൊടുക്കാമോ എന്ന് ചോദിച്ചു.. അവള് കൂനിപിടിച്ചു എഴുതിയ തലവേദന വരും.. അടുത്ത ആഴ്ച കഴിഞ്ഞു അവൾ ക്ലാസ്സിൽ വരുമ്പോക്കു അവൾക്ക് നിന്റെ നോട്ടിന്റെ കോപ്പി ഉണ്ടാക്കി കൊടുക്കണം.. കേട്ടോടാ..”

“ഇത് നമ്മടെ കാശിന് വാങ്ങിയ നോട്ടല്ലേ.. അവള്ടെ അച്ഛൻ വെല്യ കോൺട്രാക്ടർ ആയിട്ട് നമ്മടെ പൈസ എന്തിനാ അവള്ക്ക് നോട്ട് ബുക്ക് വാങ്ങാൻ കളയ്ണെ”

അച്ഛന്റ്റെ കൈ എന്റെ തലയിൽ പതിഞ്ഞപ്പോ എനിക്ക് എല്ലാത്തിനും ഉത്തരം കിട്ടി..

ഒരാഴ്ച കൂടെ കഴിഞ്ഞാണ് അവള് സ്കൂളിൽ വന്നത്.. വന്നപാടെ പിള്ളേർ എല്ലാരും കൂടെ അവളെ കണ്ടു വിശേഷം ചോദിക്കുന്ന തിരക്കിൽ ആയി ഞാനൊഴികെ.. എല്ലാവർക്കും അവൾ പകരം ചെമ്പകം നൽകി.

ടീച്ചേഴ്സും അവൾക്ക് പ്രത്യേക പരിഗണന നൽകി ഒറ്റക്ക് ഒരു ബെഞ്ചിൽ ഇരുത്തി..

അവള് പക്ഷെ ഇടയ്ക്കിടെ എന്നെ തിരിഞ്ഞു നോക്കി കൊണ്ടിരുന്നു. അവളെ വട്ടു പിടിപ്പിക്കാൻ ഞാൻ എന്റെ അടുത്തിരുന്ന സലാമിനോടും കണ്ണനോടും അവളുടെ മുടി കുറെ വടിച്ചു കളഞ്ഞെന്നും മൊട്ടത്തലച്ചീ എന്നു വിളിക്കാം എന്നും പറഞ്ഞു ക്ലാസ്സിനിടെ കളിയാക്കിച്ചു..