💖💖 സ്വയംവരം 02 💖💖 1998

കണ്ണനോടൊപ്പം അവന്റെ കൊച്ചു വീട്ടിൽ കയറി അൽപ്പം കഴിഞ്ഞു പുറത്തിറങ്ങുമ്പോൾ ആ ചോക്ളേറ്റിന്റെ മൂന്നിലൊന്ന് കഴിച്ച എന്റെ ചുണ്ടിലും അവന്റേത് പോലെ ചോക്ളേറ്റ് ഉണ്ടായിരുന്നു..

മൂന്നിലൊന്നു അവനും കഴിച്ചു ബാക്കി അവന്റെ അമ്മയെ നിർബന്ധിച്ചു കഴിച്ചപ്പോൾ ജീവിതത്തിൽ ഷെയർ ചെയ്യുന്നതിന് ഒറ്റക്ക് ആസ്വദിക്കുന്നതിലും അധികം സന്തോഷം നൽകും എന്ന് എന്നെ സാഹചര്യം പഠിപ്പിച്ചു..

തിരിച്ചു പോരാൻ നേരം കണ്ണനെ അടുത്ത വീട്ടിലേക്ക് പറഞ്ഞു വിട്ട ശേഷം കുറെ പൈസ നിർബന്ധിച്ചു അവന്റെ അമ്മയെ ഏല്പിച്ചത് എനിക്ക് അതിശയം ആണ് നൽകിയത്….

തിരിച്ചു പോരുമ്പോൾ അച്ഛൻ പറഞ്ഞു തന്നു..

“കണ്ണന് അഛനില്യാലോ. നിന്ക്ക് ബുക്ക്‌ പേനാന്നൊക്കെ പറ്ഞ് വരുമ്പോ പൈസ തരണത് ഞാൻ ഒള്ളോണ്ട് അല്ലെ.. അപ്പൊ അവന്റെ കാര്യോം നമ്മളാ നോക്കാറ്.. അവ്നേം നിത്തൂനെ പോലേം നീരവേട്ടനെ പോലേം കാണണം നിയ്യ്.”

ഒരു തല്ലു പോലും തല്ലാതെ ചീത്ത പോലും പറയാതെ തെറ്റ് മനസിലാക്കി തന്നു അച്ഛൻ.

അപ്പോളേക്കും ഡാഷിൽ ഇരുന്ന ചോക്ളേറ്റിലേക്ക് എന്റെ കൈ നീണ്ടു..

“നീ കണ്ണന്റെന്ന് തിന്നില്ലേ?? എൻക്ക് വേറേം രണ്ട് മക്കളുണ്ട്..”

“ചേട്ടൻ വെല്യതായി ഇനി ചോക്ളേറ്റ് തിന്നണ്ട..”

അപ്പോളേക്കും പിറകിൽ നിന്നും നീരവ് ചേട്ടൻ എന്നെ തോണ്ടി എടുത്തോളാൻ ആംഗ്യം നൽകി..

എന്റെ കൈ ചോക്ളേറ്റിലേക്ക് നീണ്ടപ്പോൾ അച്ഛൻ വീണ്ടും പറഞ്ഞു.

“നീ തിന്നതല്ലേ, ചേട്ടന് വേണ്ടെങ്കിൽ ഞാനും കഴിക്കും ചോക്ളേറ്റ്..”

“ഇതതിന് എന്ക്ക്യല്ല. ഇന്ദുലേഖക്കാ.”

“അപ്പോ കണ്ണൻ പറഞ്ഞത് സത്യാ… നിങ്ങള് ലവ്വാ??”