?? സ്വയംവരം 02 ?? 2000

പക്ഷെ എന്റെ ഉള്ളിൽ തുടക്കം മുതൽ ഒടുക്കം വരെ ആകെ ഇന്ദു മാത്രമേ ഒള്ളു. അതു ലവ് ചെയ്യാൻ ആയാലും ഫ്രണ്ട് ആക്കാൻ ആയാലും.. എങ്കിലും ഉമ്മ കിട്ടുന്നെങ്കിൽ അതിനും ഞാൻ തയ്യാറായി.. പക്ഷെ അപ്പോളാണ് അടുത്ത പ്രശ്നം..

“ടീ എങ്ങനാ പറയാ?? എനിക്ക് ധൈര്യല്യാ..”

“അപ്പൊ നീ ശരിക്കും അവളെ ലവ് ചെയ്യാമ്പോവാ??”

അവളുടെ മുഖം വാടിയോ എന്നെനിക്ക് തോന്നി.

“പിന്നെ നീയല്ലേ പറഞ്ഞെ??”

“എന്നാ നീ പോയി പറയ്.. അല്ലേൽ അവള്ടെ ബുക്കിൽ എഴുതി വക്ക്..”

അതൊരു നല്ല ഐഡിയ ആയി തോന്നി…. അന്ന് ഉച്ചക്ക് അവളുടെ ഹിന്ദി നോട്ട് ബുക്ക് വാങ്ങി അതിൽ നടുപേജിൽ ഐ ലവ് യൂ എന്നെഴുതി തിരിച്ചു കൊടുത്തു..

പക്ഷെ അപ്പോൾ തന്നെ ഹതഭാഗ്യനായ വിജേഷ് ബുക്ക്‌ വാങ്ങി ഹിന്ദി പിരീഡിനു മുൻപ് ആണ് നൽകിയത്. ആ ഐ ലവ് യൂ കൊണ്ട് അവനു ഇരു കയ്യിലും രണ്ടുവീതം അടി കിട്ടാൻ മാത്രം ഗുണമുണ്ടായി. ഇനിയും ഒരു പരീക്ഷണത്തിനുള്ള ധൈര്യവും അതോടെ എനിക്കില്ലാതായി..

ഇനി പ്രേമിക്കുന്നെങ്കിൽ ഇന്ദുലേഖയെ മാത്രേ പ്രേമിക്കൂ എന്നുറപ്പിച്ചു അതോടെ.. പക്ഷെ അവളെ തനിച്ചു കിട്ടുന്നത് പാടായി.. എങ്ങാനും കിട്ടിയാ എന്റെ മുട്ടുകൾ കൂട്ടി ഇടിച്ചു പരവേശം കൊണ്ട് വാക്കുകൾ കിട്ടാതെ ആയി.. ഇന്ദുവിന്‌ ആണെങ്കിൽ വളരെ പെട്ടന്ന് നല്ല പക്വത വന്നു ഒരു യുവതിയിലേക്കുള്ള പ്രയാണം ആരംഭിച്ചു..

ആദ്യമായി ബാക്ക് ബെഞ്ചു പിള്ളേരോട് ഒരു ബഹുമാനം തോന്നി. എന്തു സിമ്പിൾ ആയാണ് അനന്തു രമ്യയോട് ഇഷ്ടം പറഞ്ഞത്.. എന്തോരം പഠിച്ചിട്ടും എന്ത് കാര്യം…. ഐ ലവ് യൂ ന്ന് പറയാൻ പറ്റണില്യാലോ….

അങ്ങനെ മഴവെള്ളത്തിൽ ഒറ്റല് വെച്ച് മീൻ പിടിക്കാൻ വേണ്ടി കണ്ണൻ ട്യൂഷനു വരാതെ മുങ്ങിയ ദിവസം തനിച്ചു തിരിച്ചു പാടം വഴി വരാൻ പേടി ഉണ്ടെങ്കിലും പറയാനുള്ള നാണക്കേട് കാരണം അവളെ കൊണ്ട് വിടാൻ പോയി.