?? സ്വയംവരം 02 ?? 2000

ദിവസങ്ങൾ പൊയ്ക്കൊണ്ടിരുന്നു.. ഇതിനിടക്ക് പുഴു കയറി എന്നും പറഞ്ഞു അവളുടെ ചെമ്പകമരം വെട്ടിക്കളഞ്ഞു..

എന്നും ഞാനും കണ്ണനും നിതയും പാടം കഴിയുന്ന സ്ഥലത്ത് എത്തുന്ന സമയത്ത് തന്നെ ഇന്ദുവും എത്തി തുടങ്ങി. ആദ്യം വരുന്നവർ മതിലിൽ ഒരു കല്ല് വയ്ക്കും.. അതാണ് അടയാളം…. കല്ല് ഇല്ലേൽ പതുക്കെയും ഉണ്ടേൽ ഓടിയും ബാക്കി ഉള്ളവരുടെ ഒപ്പം എത്തണം….

അങ്ങനെ നല്ല മാർക്കോടെ രണ്ടാളും ജയിച്ചു കയറി പത്തിലേക്ക് കയറി….. ശരാശരിയ്ക്ക് മുകളിൽ മാർക്കോടെ കണ്ണനും..

പത്തിലെ ഓണപരീക്ഷ കഴിഞ്ഞ് സ്കൂൾ പൂട്ടിനാണ് എന്നേക്കാൾ പതിനൊന്നു വയസ്സ് കൂടുതലുള്ള ഏട്ടൻ നീരവിന്റെ കല്യാണം കഴിയുന്നത്…..

അതോടെ എന്റെ ഏടത്തി വക്കീൽ ആണെന്നും ഇഷ്ടമില്ലാത്തവരെ ഒക്കെ കോടതി കയറ്റും എന്നും ഒക്കെയായി എന്റെ പുതിയ വീരവാദങ്ങൾ……

കല്യാണം കഴിഞ്ഞു ഒരു വർഷം പ്രാക്ടീസിന് പോകാതിരുന്ന ഏടത്തി ഞാനുമായും നിതയുമായും വളരെ അടുത്തു.. പത്താം ക്ലാസ്സിൽ എനിക്ക് ട്യൂഷ്യൻ എടുക്കാൻ ഏടത്തി തയാറായതോടെ ഇന്ദുലേഖയെയും കണ്ണനെയും ഒപ്പം കൂട്ടി….

ക്ലാസ്സ് കഴിഞ്ഞു രാത്രി ആവുന്നോണ്ട് ഞാനും കണ്ണനും കൂടെയാവും എന്നും ഇന്ദുലേഖയെ വീട്ടിൽ കൊണ്ട് വിടാൻ പോവുന്നത്….

അപ്പോളേക്കും ക്ലാസ്സിലെ അനന്ദുവും ഒൻമ്പത് സിയിലെ രമ്യയും തമ്മിൽ ലവ് ആയതോടെ എന്റെ വീണ്ടും മനസ് മാറി ചിന്തിച്ചു തുടങ്ങി… മൂത്രപ്പുരക്ക് പുറകിൽ വച്ച് ഉമ്മ വച്ചതൊക്കെ വീരവാദത്തോടെ അവൻ പറയുന്നത് കേട്ട് എനിക്കു വീണ്ടും ലവ് ചെയ്യാൻ തോന്നി..

അങ്ങനെ ഒരിക്കൽ സ്കൂളിൽ നിന്ന് വരുമ്പോൾ നിതയെയും കണ്ണനെയും ചേമ്പിലക്കൊപ്പം വിട്ടു ഇന്ദുവിനോട് ഞാൻ പറഞ്ഞു.

“എനിക്കും ലവ് വേണം..”

“നീ ലവ് ചെയ്തോടാ.. ആ സ്മിത നിന്നോട് കൂട്ട് കൂടാൻ വന്നതല്ലേ??”