?? സ്വയംവരം 02 ?? 2000

വന്നതിന്റെ പിറ്റേന്റെ പിറ്റേന്ന് സ്കൂളിൽ ശാസ്ത്രക്യാമ്പ് നടന്നു…. ഉച്ചഭക്ഷണം  ഒക്കെ ഫ്രീ….

ചോറ് കഴിച്ചു  കൈ കഴുകാൻ വലിയ അണ്ടാവില് നിന്നും വെള്ളമെടുക്കണം… തിക്കി തിരക്കി ഞാനൊരു കപ്പ് പിടിച്ചു വെള്ളമെടുത്തപ്പോൾ വളരെ സിമ്പിൾ ആയി അവള് എന്റെ കയ്യിൽ പിടിച്ചു എന്റെ കപ്പിലെ വെള്ളം കൊണ്ടവളുടെ കൈ കഴുകി കൂൾ ആയി നടന്നു പോയി..

പക്ഷേ…. അതൊരു തുടക്കം മാത്രം ആയിരുന്നു..

എന്നും കണ്ണെഴുതി തേച്ച ഡ്രസ്സ്‌ ഇട്ടു വന്ന് ചെമ്പകപ്പൂ കൊണ്ടുവന്നു എല്ലാർക്കും കൊടുത്ത് ആദ്യം തന്നെ അവള് എല്ലാവരെയും കൂട്ട് പിടിച്ചു..

പക്ഷെ എനിക്ക് മാത്രം ഇടിത്തീ തന്നത് ക്രിസ്മസ് പരീക്ഷക്ക് എന്നേക്കാൾ ഒമ്പത് മാർക്ക് കൂടുതൽ വാങ്ങി എന്നെ രണ്ടാം സ്ഥാനക്കാരൻ ആക്കി കൊണ്ടാണ് .

ഇടക്കെന്നോ അച്ഛൻ ഇന്ദുലേഖ എന്ന കുട്ടി ക്ലാസ്സിൽ ഉണ്ടെങ്കിൽ അവൾക്ക് വേണ്ട ഹെല്പ് ചെയ്യണം എന്നും അച്ഛന്റെ കൂട്ടുകാരന്റെ മോളാണെന്നും പറഞ്ഞെങ്കിലും അപ്പോളേക്കും എന്റെ ഉള്ളിൽ ഒന്നാംസ്ഥാനം പോയതിന്റെ വാശി നുരഞ്ഞു പൊന്തികഴിഞ്ഞു…..

അങ്ങനെ ആറാം ക്ലാസ്സിൽ നിന്നും ഞാനും കണ്ണനും ഇന്ദുലേഖയും അടക്കം ഒരുവിധം പിള്ളേരൊക്കെ ജയിച്ചു ഏഴിലെത്തി..

വീണ്ടും ഒന്നാമത് എത്താനുള്ള വാശിയോടെ എന്റെ ഒടുക്കത്തെ പഠിപ്പ് പഠിച്ച് ഞാൻ ഓണപരീക്ഷ എഴുതി.. ഓണം കഴിഞ്ഞു ഓണപരീക്ഷയുടെ പേപ്പറും ടീച്ചേഴ്സ് തന്നു.. എത്ര വാശിയോടെ കുതികുത്തി ഇരുന്നു പഠിച്ചിട്ടും മൂന്ന് മാർക്കിന് ഇന്ദുലേഖ സ്കൂളിൽ ഫസ്റ്റ്.. ഞാൻ മുൻപത്തെ പോലെ വീണ്ടും സെക്കന്റ്..

ജസ്റ്റ് പാസായവർ വരെ സന്തോഷിക്കുമ്പോൾ തോറ്റ കുട്ടികൾ ടീച്ചറുടെ അടി പേടിച്ചു ഉണ്ടാകുന്നതിലും അധികം ടെൻഷൻ എന്റെ മുഖത്ത്.. എന്റെ കണ്ണുകൾ നിറയുമെന്നു തോന്നി. പക്ഷെ ആൺകുട്ടികൾ കരയാൻ പാടില്ലല്ലോ…. പിടിച്ചു നിന്നു….