?? സ്വയംവരം 02 ?? 2000

സ്റ്റുഡന്റ്സിനെ ഷഫിൾ ചെയ്തതോടെ ഇന്ദു വേറെ ക്ലാസിലേക്ക് മാറി. അതോടെ ക്ലാസ്സ് എനിക്ക് വിരസമായി. പക്ഷെ മൂന്ന് ദിവസശേഷം അവളെ മാത്രം തിരിച്ചു എന്റെ ക്ലാസ്സിൽ ഇരുത്തി. ഞാനുമായി മത്സരിച്ച് പഠിച്ചാൽ കൂടുതൽ മാർക്ക് കിട്ടും എന്ന് അവൾ തന്നെ പോയി HM നോട്‌ പറഞ്ഞു.

അങ്ങനെ ക്ലാസ്സ് തുടങ്ങി ഒരു മാസം കഴിഞ്ഞു അവൾ ഒരാഴ്ച ലീവ് എടുത്തു.. നാല് ദിവസം കഴിഞ്ഞു എനിക്കവളെ കാണാതെ ഇരിക്കപ്പൊറുതി ഇല്ല.. ഞാൻ ക്ലാസ്സ്‌ കഴിഞ്ഞു നേരെ അവളുടെ വീട്ടിൽ പോയി.

“അയ്യോ മോനെ അവ്ളു മാമന്റെ വീട്ടിൽ പോയേക്കാണല്ലോ.. തിങ്കളാഴ്ച ക്ലാസ്സി വരുംട്ടോ..”

അവളുടെ അമ്മയുടെ വാക്ക് കേട്ട് നിരാശനായി ഞാൻ തിരിച്ചു നടക്കുമ്പോൾ എന്റെ മുൻപിൽ ഒരു ചെമ്പകപ്പൂ വന്നു വീണു…. അവളിവിടെ തന്നെ ഉണ്ടെന്ന് മനസിലായി എങ്കിലും അവളെ കാണാതെ തന്നെ തിരിച്ചു പോകേണ്ടി വന്നു.

തിങ്കളാഴ്ച അവൾ അമ്മ പറഞ്ഞത് പോലെ ക്ലാസ്സിൽ വന്നു.. എല്ലാർക്കും മിട്ടായി കൊടുത്തു. എല്ലാർക്കും ഓരോന്നും എനിക്ക് മാത്രം രണ്ട് മിട്ടായിയും. പക്ഷെ ഞാൻ കൈ നീട്ടാതായപ്പോ അവൾ ടേബിളിൽ വച്ച് നടന്നുനീങ്ങി..

“ടാ നല്ല രസണ്ട്. ഗൾഫ് മിട്ടായി ആട..”

“എൻക്ക് വേണ്ട.. നീ എട്ത്തോ…”

ഞാൻ മിട്ടായി വാങ്ങാത്ത വ്യസനത്തിൽ അവൾ നടന്നു നീങ്ങിയപ്പോൾ രണ്ട് മിട്ടായി കൂടുതൽ കിട്ടിയ സന്തോഷത്തിൽ കണ്ണൻ വാരി എടുത്തു തിന്നാതെ പോക്കറ്റിലിട്ടു…

ക്ലാസ്സിന്റെ ഇടയിൽ പിള്ളേർ കുശുകുശുത്തു പറഞ്ഞു കേട്ടുട്ടോ അവളുടെ തിരണ്ടുകല്യാണം ആണെന്ന്.. പക്ഷേ അതെന്താണെന്ന് ഒരു ചുക്കും പിടി കിട്ടിയില്ലെങ്കിലും അറിയില്ല എന്ന് പറയുന്നത് നാണക്കേട് അല്ലെ… അതുകൊണ്ട് ഞാനും എല്ലാം അറിയാം എന്ന ഭാവത്തിൽ എല്ലാവർക്കും ഒപ്പം ചിരിച്ചു..

അവസാന പിരീഡ് ആയിരുന്നു PT.. എല്ലാവരും പോയെങ്കിലും ഞാൻ മാത്രം എന്റെ ബെഞ്ചിൽ കുനിഞ്ഞു കിടന്നു.. ഞാനിരുന്ന ബെഞ്ചു ഇളകിയത് അവൾ വന്നിരുന്നത് ആണെന്ന് മനസ്സിലായിട്ടും തല ഉയർത്താതായപ്പോ അവൾ എന്റെ തലയിൽ കൈ വച്ചു.