❤️ദേവൻ ❤️part 18 [Ijasahammed] 253

ഇങ്ങനെയൊരു ജീവിതത്തിലേക്ക് ദേവേട്ടനെ തള്ളിയിടാൻ കാരണക്കാരനായ ആ മൃഗം രക്ഷപ്പെടാൻ പാടില്ല…

പക്ഷെ എങ്ങനെ…??

അരികിലിരുന്നു കൊണ്ട് കുക്കർ നീട്ടി കൂകിയതും ചിന്തകളിൽ നിന്ന് ഒരു ഞെട്ടലോടെ ഞാൻ പുറത്തുവന്നു..

പതിവിന് വിപരീതമായി മുറിയിൽ കൊണ്ടുവെച്ച ചായഗ്ലാസ്‌ കൊണ്ട് അടുക്കളയിലേക്ക് നടന്നെത്തിയ ദേവേട്ടനെ ഞാനൊന്ന് പുരികം ചുരുക്കി നോക്കി…

അടുത്തു വരുമ്പോൾ രാവിലത്തെ സിഗരറ്റിന്റെ ആ രൂക്ഷഗന്ധം ആ ശരീരത്തിൽ ഉണ്ടായിരുന്നില്ല…

“ഇതെന്താപ്പോ ഈ വഴിക്കൊക്കെ..? ”

പുട്ടിനു കുഴച്ചു കൊണ്ടിരിക്കെ കളിയാക്കി കൊണ്ട് ഇടം കണ്ണിട്ട് ചോദിച്ചു..

ഒന്നും പറയാതേ അരികിലേക്കായി വന്നു ചേർന്നു നിന്നുകൊണ്ട് ചെവിയോരം ചുണ്ടമർത്തി..

“ന്തേ..? ”

തിരിഞ്ഞുനിന്നൊരു അമ്പരപ്പോടെ ഞാൻ ചോദിച്ചു..

ഒന്നുമില്ലെന്ന് തലയാട്ടി കൊണ്ട് മേശക്കുള്ളിലേക്ക് ചേർന്നിരുന്നിരുന്ന കസേരകളിൽ ഒന്നെടുത്തു കൊണ്ട് അടുത്തുവന്നിരുന്നു ചായ കുടിക്കുന്ന ദേവേട്ടനെ നോക്കി ഞാൻ ഒന്ന് ചിരിച്ചു..

“അല്ലെടി.. !
ഇന്നലെനീയെന്തിനാ വീട്ടിൽന്ന് എറങ്ങിപോയേ..? ”

നെറ്റിയിൽ നിന്ന് മുന്നിലേക്ക് പാറിനിന്ന മുടി പുറംകൈ കൊണ്ട് മേല്പോട്ട് ആക്കി ഞാൻ തിരിഞ്ഞു നോക്കി കൊണ്ട് ചോദിച്ചു..

“ഇപ്പഴേ ചോദിക്കാൻ തോന്നിയേ ..? ”

“ഇന്നലെ മുഴോൻ കരച്ചിൽ അല്ലായിരുന്നോ.. !!”

കുടിച്ചു കഴിഞ്ഞ ഗ്ലാസ്‌ കയറ്റി വച്ചുകൊണ്ട്ദേവേട്ടൻ ചോദിച്ചു..

“ഞാൻ കരഞ്ഞിട്ടൊന്നൂല്ല.. !!”

ആ പറഞ്ഞതിനെ നിഷേധിച്ചുകൊണ്ട് തലതിരിച്ചു..

” ഊവ്വ്… ആ കൺപോള കണ്ടാലും പറയുവായിരുന്നു നീ കരഞ്ഞിട്ടില്ലാന്ന്.. ”

ഇന്നലെമാത്രല്ലെന്ന് പറയാൻ തുനിഞ്ഞു..

വേണ്ടെന്നു തോന്നി..
പിന്നൊന്നും പറഞ്ഞില്ല..