❤️ദേവൻ ❤️part 18 [Ijasahammed] 253

“പറയ്.. ന്തിനാ കരഞ്ഞേ, എന്തിനാ ഇറങ്ങിപൂവ്വാൻ നിന്നേ..? ”

“ഒന്ന് പോയേ ദേവേട്ടാ.. ഇവിടെ പണിയെടുക്കുന്നത് കാണാനില്ലാന്ന് ണ്ടോ..?”
അല്പം കനപ്പിച്ചു കൊണ്ട് ഞാൻ ചോദിച്ചു…

“എന്നാ ഇനി പറഞ്ഞിട്ട് പണിഎടുത്താമതി.. ”

ഇടുപ്പിൽ പിടിച്ചുകൊണ്ട് വലിച്ചു മടിയിലേക്കിരുത്തി..

“രാവിലെത്തന്നെ ഭ്രാന്ത് കാണിക്ക്യാ..? ”

കണ്ണിലേക്കു നോക്കി കൊണ്ട് പതുക്കെ ചോദിച്ചു..

“അത് കാണിക്കണോ വേണ്ടയോന്നൊക്കെ ഇത് കഴിഞ്ഞു ഞാൻ തീരുമാനിക്കാം.. നീയ് പറയാൻ നോക്ക്.. !”

ആ ശബ്ദം മൂന്ന് കൊല്ലങ്ങൾക്ക് മുൻപ് നഷ്ട്ടപ്പെട്ടുപോയ ദേവന്റെയാണെന്ന് ആ നിമിഷം തോന്നിപോയി..

അത്രമേൽ സ്നേഹത്തിലും ദേഷ്യം തങ്ങി നിൽക്കുന്ന ഇത്തരം ചോദ്യങ്ങളോട് പണ്ട് മുതൽക്കേ ദേവനോളം ഇഷ്ട്ടമായിരുന്നു..

ചോദിച്ച ചോദ്യത്തിന് എന്താണ് മറുപടികൊടുക്കേണ്ടതെന്ന് ആലോചിച്ചു ഞാൻ പരതി..

“അത് ഞാൻ.. ആ ഞാൻ അമ്മേ കാണാൻ പോയതാ.. ”

തപ്പിപിടിച്ചു കൊണ്ട് പറഞ്ഞെങ്കിലും ഒടുവിൽ അത് പൂർത്തിയാക്കുമ്പോൾ ശബ്ദം ഉയർന്നു തന്നെയിരുന്നു..

” കരഞ്ഞിട്ട്.. !!”

തലയാട്ടികൊണ്ട് പരിഹാസഭാവനെ എന്നോട് ചോദിച്ചതുകേട്ട് ഞാൻ വീണ്ടും കുഴങ്ങി..

“ദേവേട്ടാ.. വിട്ടേ.. പണിയുണ്ട്.. ”

ഞാൻ എഴുന്നേൽക്കാൻ ശ്രമിച്ചു..
ശ്രമം വിഫലമായെന്ന് മാത്രമല്ല മുമ്പത്തേക്കാൾ കൂടുതൽ ദേവേട്ടൻ എന്നിൽ പിടിമുറുക്കി..

ഇനി പറയാതെ നിവർത്തി ഇല്ലെന്ന് മനസ്സിലാക്കികൊണ്ട് ഞാൻ പറഞ്ഞു തുടങ്ങുമ്പോൾ ആ കൊച്ചനാഥാലയവും ഒരുപോലെ വസ്ത്രം ധരിച്ച ആ കന്യാസ്ത്രീകളും,
എപ്പോഴോ ആകർഷിച്ച ആ നുണക്കുഴികവിളുകളും മനസ്സിൽ നിറഞ്ഞു…

“കണ്ണിൽകണ്ടവരോട് ന്നെ കെട്ടണ്ടാർന്നു ന്ന് പറഞ്ഞത് കേട്ടപ്പോ സങ്കടായി..
ആരോരും അല്ലാത്ത ഏതോ ഒരു പെൺകുട്ടിയോട് എന്നേക്കാൾ കൂടുതൽ ഇഷ്ട്ടം കാണിച്ചത് കണ്ടപ്പോ ആ സങ്കടം ഇരട്ടിച്ചു..

നമ്മടെ ഇടയിലേക്ക് ആരെന്നു പോലും അറിയാത്ത ആ കുട്ട്യേ കൊണ്ടരുണു ന്ന് കേട്ടപ്പോ വീണ്ടും കൂടി..

ന്റെ മുന്നിലൊന്ന് പുഞ്ചിരിക്ക്യ പോലും ചെയ്യാത്ത ആൾ ആ ആൾക്കാർടെ എടേൽന്ന് മതിമറന്നത് കണ്ടപ്പോ സങ്കടംമാറി ദേഷ്യായി.. ”
അത്രയും പറഞ്ഞു കഴിഞ്ഞപ്പോൾ ആ മുഖത്തു നിന്ന് കണ്ണെടുത്തു കൊണ്ട് താഴേക്ക് നോട്ടമുതിർത്തു..

 

ആരും അല്ലാണ്ടായ പോലെ തോന്നി .. ഇന്നേ വേണ്ട, ഒഴിവാക്കാൻ നോക്കാണ് ന്നൊക്കിം തോന്നി .. ”

താഴോട്ടേക്ക് നോക്കി കൊണ്ട് ഞാൻ അത്രയും പറയുമ്പോൾ ഉള്ളിൽ വീണ്ടും നോവ് നിറഞ്ഞ ആ നേരം പതഞ്ഞു പൊങ്ങിവന്നു നിന്നു..

“ന്ന്ട്ട് ഇപ്പഴും ദേഷ്യണ്ടോ..? ”
മുഖത്തേക്ക് നോക്കാതെ തന്നെ
ഇല്ലെന്ന് തലയാട്ടി..

കസേരയിൽ നിന്നും എഴുന്നേറ്റ് അടുക്കള വാതിലിനടുത്തേക്ക് നടന്നുകൊണ്ട് ഏട്ടൻ എന്തെക്കെയോ പറയാൻ തുടങ്ങുകയാണെന്ന് എനിക്ക് തോന്നി…