കഥ എത്രത്തോളം ഇഷ്ടമാവുന്നുണ്ട് ഇനിയും എന്തൊക്കെ ചെയ്യണം എന്നറിയാനുള്ള ഏക വഴിയാണ് കമെന്റ് ബോക്സ്‌.. Please drop your comments..

 

ആ പേര് കേൾക്കാൻ ആകാംഷയോടെ ഫാ. സ്റ്റീഫൻ കാത്തുനിന്നു….

 

“പോൾ….!!”

 

(തുടരുന്നു…)

The NUN

Previous Part  | Author : Appu

 

തനിക്ക് തോന്നിയ വളരെ ചെറിയ സംശയം ശെരിയായിരുന്നെന്ന് ഫാ. സ്റ്റീഫൻ ഓർത്തു… ഫാ. ഗ്രിഗറി തുടർന്നു…

 

“സാത്താനെ ആരാധിക്കുന്ന ഒരു സംഘത്തിലെ പുരോഹിതന്റെ മകനായിരുന്നു പോൾ… ഒരിക്കൽ വെറും പതിനഞ്ച് വയസ്സ് മാത്രം പ്രായമുള്ള അവനെ അവന്റെ അച്ഛൻ ആദ്യമായി അവരുടെ ആരാധനാകേന്ദ്രത്തിൽ കൊണ്ടുപോയി…

 

അന്നൊരു ശാന്തമായ രാത്രിയായിരുന്നു….

 

പോൾ കാറിലിരുന്ന് തങ്ങൾ പോവുന്ന വഴിയെല്ലാം നോക്കിക്കൊണ്ടിരുന്നു… വളരെ കുറച്ച് മാത്രം സംസാരിക്കുന്ന അച്ഛനോട് എവിടേക്കാണ് നമ്മൾ പോവുന്നതെന്ന് ചോദിക്കാൻ അവന് ഭയമായിരുന്നു…

 

പ്രധാന വഴികൾ കടന്ന് കാർ കുറച്ച് അകത്തേക്ക് കയറി… ഇപ്പോൾ ആളൊഴിഞ്ഞ വഴിയാണ്… ചുറ്റും വലിയ പുല്ലുകൾ മൂടിയ ഒറ്റവഴി…. സ്വന്തം അച്ഛന്റെ ക്രൂരസ്വഭാവവും അച്ഛന്റെ രീതികളും നന്നായി അറിയാമായിരുന്ന അവൻ എന്തെങ്കിലും അപകടം സംഭവിച്ചാൽ ഓടിരക്ഷപ്പെടാനുള്ള വഴിയാണ് മുൻകൂട്ടി നോക്കിവെച്ചത്…

 

ആളൊഴിഞ്ഞ വഴിയും കടന്ന് കാർ ഒരു കാടിനുള്ളിലേക്ക് കയറി… അവന് നന്നായി പേടി തോന്നിയിരുന്നു… കുറച്ചുകൂടി മുന്നോട്ട് ചെന്ന് തീർത്തും വിജനമായ ആ കാടിനുള്ളിൽ കാർ നിന്നു…

 

അവന്റെ അച്ഛൻ ഡോർ തുറന്ന് ഇറങ്ങി അവനടുത്ത് വന്നു അവന്റെ ഭാഗത്തുള്ള ഡോറും തുറന്നു… ഇറങ്ങാനുള്ള നിശബ്ദമായ ആജ്ഞ… അവൻ ഇറങ്ങി…

 

കൊടുംകാടാണ് ആ പ്രദേശം… ആകാശത്തിലെ പ്രകാശം പോലും അകത്തേക്ക് വരാത്തത്ര ഘോരവനം… ചുറ്റും മരങ്ങളും ഉയർന്ന് വളർന്ന ചെടികളും മാത്രം… അതിനൊപ്പം ഭയപ്പെടുത്തുന്ന ഇരുട്ടിൽ മറഞ്ഞിരിക്കുന്ന ശബ്ദങ്ങളും…