✝️The NUN 4✝️ (അപ്പു) 215

 

“ഞാൻ ഹെർബർട്ട്… ഇന്ന് നിന്റെ വഴികാട്ടിയും കാവൽക്കാരനും ഞാനായിരിക്കും…!!” തനി ഒരു ബോഡിഗാർഡിന്റെ ശരീരഭാഷയോടും പ്രൌഡിയോടും കൂടി അയാൾ പറഞ്ഞു…

 

പോളിന്റെ ഭയം ചെറുതായി മാറിതുടങ്ങി… അവൻ അയാളുടെ മുന്നിലായി എഴുന്നേറ്റ് നിന്നു….

 

“എന്നെ കൊല്ലാനാണോ കൊണ്ടുവന്നത്…??” അച്ഛന്റെ രീതികളും സ്വഭാവങ്ങളും അറിയാമായിരുന്ന അവന് അയാളുടെ കൂടെപ്പോരുമ്പോൾ ആ ഒരു സംശയം മാത്രമേ ഉണ്ടായിരുന്നുള്ളു…

 

“അല്ല നിന്റെ അച്ഛൻ ഫ്രാൻസിസ് അന്റോണിയോയുടെ പിൻഗാമിയായി വരേണ്ടനാണ് നീ… ആ തയ്യാറെടുപ്പുകൾ ഇന്നാണ് തുടങ്ങുന്നത്… ഭാവിയിൽ നിന്റെ അച്ഛന്റെ സ്ഥാനത്തേക്ക് വരേണ്ടത് നീയാണ്..!!” ഹെർബർട്ട് പറഞ്ഞു…

 

“എന്ത് സ്ഥാനം….??” അവൻ ചോദിച്ചു..

 

“സാത്താന്റെ പുരോഹിതൻ…!!” അയാൾ നടന്നുനീങ്ങി… പിന്നാലെ അവനും നടന്നു..

 

അയാൾ അവനെയും കൊണ്ട് ഒരു വലിയ ഹാളിലേക്കാണ് ചെന്നത്… നിലം മുഴുവൻ ചുവന്ന പരവതാനി വിരിച്ച് ചുറ്റും കറുത്ത തുണികൾ കൊണ്ട് മറച്ച ഭീകരമായ അന്തരീക്ഷമുള്ള ഒരു വലിയ ഹാൾ…

 

അവിടെ കുറച്ച് ആളുകളുണ്ടായിരുന്നു… കറുത്ത വസ്ത്രം ധരിച്ച് നിന്ന അവരെല്ലാം അവനെത്തന്നെ സൂക്ഷിച്ച് നോക്കി… അവനു വീണ്ടും ഭയമായി… പക്ഷെ ഹെർബർട്ട് അവന് ധൈര്യം കൊടുത്തു…

 

പെട്ടന്ന് വാതിൽ തള്ളിത്തുറന്ന് അന്റോണിയോ അകത്തേക്ക് വന്നു… അയഞ്ഞ സിൽക്കിന്റെ വലിയ കറുത്ത ളോഹ പോലെ ഒരു വസ്ത്രം ധരിച്ചിരുന്ന അയാൾ മറ്റൊന്നും ശ്രദ്ധിക്കാതെ വളരെ വേഗത്തിൽ അവർക്ക് മുന്നിലേക്ക് നടന്നു… അയാളെ കണ്ട മറ്റുള്ളവർ, ഹെർബർട്ട് അടക്കം നിലംപറ്റെ മുട്ടുകുത്തി തലകുനിച്ച് വണങ്ങി… ഇതെല്ലാം കണ്ട് ഭയന്നിരിക്കുക മാത്രമായിരുന്നു പോളിന് ആകെ ചെയ്യാനുണ്ടായിരുന്നത്…