ഹൃദയരാഗം 7 [Achu Siva] 586

കഴിഞ്ഞില്ലേ മോളെ …ഇനി ബാക്കി ഞാൻ ചെയ്തോളാം ….ശാരദാമ്മ അവിടേക്കു വന്നു അവളുടെ അടുത്തേക്ക് ചെന്നു അതിലേക്ക് നോക്കി …അവർ വേഗം തന്നെ പാൽ വെച്ചിരുന്ന സ്ഥലത്തേക്ക് പോയി വേറൊരു പാത്രം തുറന്നു നോക്കി വീണ്ടും അവരുടെ അടുത്തേക്ക് വന്നു …

മക്കളേ ഇന്ന് രാവിലെ ബ്രേക്ക്‌ഫാസ്റ്റ് കുറച്ചു താമസിച്ചെന്നു വരും …

അതെന്ന ശാരദാമ്മേ ….എന്ത് പറ്റി ..?? വിനയ് അവരോടായി ചോദിച്ചു …

ഞാൻ രാവിലെ ഉണ്ടാക്കാനുള്ള അപ്പത്തിന് കലക്കി വെച്ച മാവാണു വാസുകി മോളു അടുപ്പത്തു വെച്ച് തിളപ്പിക്കണത് …അവർ നെഞ്ചത്ത് കൈയും വെച്ച് പറഞ്ഞു …

വാസുകി അവരെയും അയാളെയും ഇളിച്ച മുഖത്തോടെ മാറി മാറി നോക്കി …

ന്റെ പോന്നു ശാരദാമ്മേ ,നിങ്ങളല്ലാതെ വേറെ ആരെങ്കിലും ഈ വിവര ദോഷിയെ ഇതൊക്കെ ഏൽപ്പിക്കുമോ …ഇവളുടെ നെഗളിപ്പ് കണ്ടപ്പഴേ എനിക്ക് തോന്നിയതാ …ഇതും പറഞ്ഞു വിനയ് കമഴ്ന്നു കിടന്നു അവളെ കളിയാക്കി ചിരിച്ചു  …ശാരദാമ്മയും വന്ന ചിരി കടിച്ചു പിടിച്ചു നിന്നു …

ദേ മനുഷ്യാ ,വല്ലാണ്ടങ് ഇളിക്കല്ലേ …അതും പറഞ്ഞു അവൾ കടന്നല് കുത്തിയ മുഖത്തോടെ ചാടി തുള്ളി മുന്നോട്ട് നടന്നു …അവിടെ കിടന്ന കാർപെറ്റിൽ തെന്നി  വാസു നടുവും തല്ലി താഴെ ….വീണ്ടും പുറകിൽ നിന്നും കൂട്ട ചിരി ….വാസു രണ്ടു പേരെയും കലിപ്പിച്ചു നോക്കി …ശാരദാമ്മ ബ്രേക്ക്‌ ഇട്ട പോലെ ചിരി നിർത്തി …വിനയ് മുകളിലെ റൂഫിന്റെ ഭംഗി ആസ്വദിക്കണ പോലെ അങ്ങോട്ടും ഇങ്ങോട്ടും നോക്കി നിന്നു …

അതെ ഒന്ന് പിടിക്കുമോ …അവൾ വിനയ്ടെ നേരെ കൈ നീട്ടി …

എനിക്കെങ്ങും വയ്യ ….???അയാൾ അതും പറഞ്ഞു അവിടെ നിന്നും പോയി …

ശാരദാമ്മ അവളുടെ സഹായത്തിനായി ചെന്നു …പക്ഷേ അവൾ ദേഷ്യത്തോടെ അവരുടെ കൈ തട്ടി മാറ്റി എന്നിട്ട്  ഒരു വിധത്തിൽ അവിടെ നിന്നും പൊടിയും തട്ടി എഴുനേറ്റു നടുവും തിരുമ്മി കൊണ്ടു പോയി …

അന്നത്തെ ദിവസം പിന്നേ അവൾ ആ ഏരിയയിൽ പോയിട്ടില്ല …വിനയ് എന്തോ ബിസിനസ്‌ സംബന്ധമായ തിരക്കിൽ വളരെ രാത്രി ആയാണ് വീട്ടിൽ എത്തിയത് …നാളെ എങ്ങനെ കോളേജിൽ പോകും എന്ന ചിന്തയിൽ വാസുകിക്ക് ഉറക്കം തന്നെ നഷ്ടപ്പെട്ടു …

പിറ്റേന്ന് രാവിലെ അവൾ വല്ലാത്ത മടുപ്പോടു കൂടി കോളേജിലേക്ക് പോകാനായി റെഡി ആയി ഇറങ്ങി …