സഖിയെ ഈ മൗനം നിനക്കായ് 4 ???[നൗഫു] 4433

നിശബ്ദതയ്ക്കു വിരാമമിട്ടു കൊണ്ട് അജയ് രാജീവിനെ വിളിച്ചു…

“ഹ്മ്മ്…”

“സർ.. എന്തിനാണ് നമ്മളിപ്പോ മണ്ണാർക്കാട് പോകുന്നത്..”

“നമ്മുക്ക് അന്വേഷിക്കേണ്ട മറ്റൊരു കേസ് വന്നിരിക്കുന്നു..”

“സർ.. പക്ഷെ നമ്മളതിന് ഫർസാന കേസിന്റെ പുറകെയല്ലെ..”

“അതെ.. പക്ഷെ ഇന്ന് വന്നിരിക്കുന്ന ഈ കേസിനു ഫർസാന കേസുമായി ബന്ധമുണ്ട്..”

“സർ എന്താണ് പറയുന്നത്.. ഒന്നും മനസ്സിലാവുന്നില്ല..”

“അജയ്.. മണ്ണാർക്കാട് ഇരുമ്പകചോലയിൽ ഒരു മർഡർ നടന്നിട്ടുണ്ട്.. മരിച്ചയാളുടെ കൂടെയുണ്ടായിരുന്ന മൂന്നു പേര് മിസ്സിങ്ങാണ്.. ക്രിസ്ത്യൻ കോളേജിൽ പഠിക്കുന്ന കോഴിക്കോട്ടുകാരായ നാലു പെൺകുട്ടികൾ..”

“സാർ..”

പീവീയൊരല്പം സന്ദേഹത്തോടെ പുറകിൽ നിന്നും വിളിച്ചു..

“പീവി.. തന്റെ സന്ദേഹം ഏറെക്കുറെ ശരിയാണ്.. ഇത് നമുക്ക് ഹാൻഡിൽ ചെയ്യാൻ കഴിഞ്ഞു കൊള്ളണമെന്നില്ല.. ഈ യൂണിഫോമിട്ടത് കൊണ്ട് പേടിച്ചോടാനും പറ്റില്ല.. സിനിമയിൽ കാണുന്ന പോലെയൊന്നുമല്ല നമ്മളന്വേഷിക്കുന്ന ചില കേസുകൾ.. ചിലതിൽ നമ്മുടെ ജീവൻ പോലും അപകടത്തിലാകാം.. എങ്കിലും നിങ്ങൾ മൂന്നു പേരും കൂടെ നിന്നാൽ ഈ കേസിൽ നമുക്കൊരു റിസൽട്ടുണ്ടാക്കാം എന്ന് ഞാൻ വിശ്വസിക്കുന്നു..”

“സർ.. പക്ഷെ എവിടെത്തുടങ്ങണമെന്നൊരു ഒരു തുമ്പു പോലുമില്ലാതെ..”