ശ്രീ നാഗരുദ്ര ? ???? ആറാം ഭാഗം – [Santhosh Nair] 1104

ആ വലിയ വാതിൽ തുറക്കപ്പെട്ടു. അവന്റെ നോട്ടം ആദ്യം പോയത് ആ മുറിയുടെ പ്രത്യേകത അളക്കുവാനായാണ്. മനോഹരമായ ചില്ലു ജാലകങ്ങൾ. ഇന്നലെ രാത്രി കണ്ടതിൽ നിന്നും വ്യത്യസ്തമായി ആ വിശാലമായ മുറിയിൽ നല്ല വ്യക്തമായ പ്രകാശം. തെല്ലും പൊടിയോ അഴുക്കോ ഇല്ലാതെ മുറി മനോഹരമായിട്ടുണ്ട്. മുറിയിലെ കസേരകളും മേശകളും പൂത്തൊങ്ങൾകളും നന്നായി ക്രമീകരിച്ചിരിയ്ക്കുന്നു. അല്പം മോഡേൺ ആയിട്ടുണ്ട്.

മനോഹരമായ നീലയും ഇളം പിങ്കും ഉൾപ്പെടെയുള്ളമറ്റു ചില നിറങ്ങളും മുറിയുടെ അഴക് കൂട്ടുന്നു. ഇന്നലത്തെ ആ ഭീതിതമായ അന്തരീക്ഷമല്ല ഇപ്പോഴുള്ളത്.

“ങ്‌ഹും ങ്‌ഹും” എന്നൊരു ശബ്ദം കേട്ടാണ് അവൻ നേരെ നോക്കിയത്. വെണ്ണക്കല്ലിൽ ചെതുക്കിയതുപോലെ ഒരു ദേവ സുന്ദരി. ഇന്നലെ കണ്ടപ്പോൾ ആ സൗന്ദര്യം അറിയാൻ സാധിച്ചിരുന്നില്ല. നീണ്ട മാന്മിഴികൾ, തെല്ലുയർന്നു നീണ്ട മൂക്ക്, ചെറിയ മനോഹരമായ ചെഞ്ചുണ്ടുകൾ, തിളങ്ങുന്ന കവിളിണകൾ. അല്പം നീണ്ട കഴുത്തിൽ അണിഞ്ഞിരിയ്ക്കുന്ന പിങ്ക് നിറമുള്ള മുത്തുമാല. ക്രീം നിറമുള്ള ഹാഫ് സാരിയും ബ്ളവുസും അണിഞ്ഞിരിയ്ക്കുന്ന അവളുടെ സൗന്ദര്യം അവനെ അത്ഭുത സ്തബ്ധനാക്കി. അവളെ കണ്ണെടുക്കാതെ നോക്കി നിന്ന അവന്റെ കയ്യിൽ നിന്നും ആ ഫയൽ താഴെ വീണതുപോലും അവനറിഞ്ഞില്ല.

അവളുടെ നാണം നിറഞ്ഞ കുണുങ്ങിച്ചിരിയാണ് അവനെ സ്ഥലകാലബോധത്തിലേയ്ക്ക് തിരികെ കൊണ്ടുവന്നത്.

“സുന്ദരീ… നിന്‍ തുമ്പു കെട്ടിയിട്ട ചുരുള്‍മുടിയില്‍
തുളസി തളിരില ചൂടി
തുഷാരഹാരം മാറില്‍ ചാര്‍ത്തി താരുണ്യമേ നീ വന്നു…

നിന്‍ തുമ്പു കെട്ടിയിട്ട ചുരുള്‍മുടിയില്‍ തുളസി തളിരില ചൂടി
തുഷാരഹാരം മാറില്‍ ചാര്‍ത്തി താരുണ്യമേ നീ വന്നു…
നിന്‍ തുമ്പു കെട്ടിയിട്ട ചുരുള്‍മുടിയില്‍…” അവൻ ഉറക്കെ പാടി.

“പോ ഏട്ടാ.. കുറെ പഴയ പാട്ടുകൾ കയ്യിൽ സ്റ്റോക്ക് ഉണ്ടല്ലോ. ഹി ഹി.”

“എന്റെ പൊന്നു യക്ഷിപ്പെണ്ണേ ഈ ജ്വലിയ്ക്കുന്ന സൗന്ദര്യം കണ്ടാൽ എന്റെ പോളോ പെണ്ണു പോലും പാടിപ്പോകും. എന്റെ സുന്ദരി യക്ഷി കുട്ടീ.. രാത്രി ഒരു ഗ്ലാസ് പാലും കൊണ്ട് വന്നേക്കണം കേട്ടോ. ഹി ഹി” കണ്ണിറുക്കി കൊണ്ടവൻ പറഞ്ഞു.

“പോ ഏട്ടാ” അവൾ ചിണുങ്ങി.

“പോട്ടെ എന്റെ ചക്കര യക്ഷിക്കുട്ടീ. ഹ ഹ ചുമ്മാ, നീ എന്റെ ജീവനല്ലേ, വെറുതെ കളിയാക്കിയതാണ്. നമുക്കൊത്തിരി ജോലി ഇന്നു രാത്രി ചെയ്തു തീർക്കാനുണ്ട്. ഡോക്യൂമെന്റുകൾ കുറച്ചു തയാറാക്കണം, അങ്ങനെ.”

അവൻ രണ്ടു സ്യൂട് കേസുകളും ലാപ്ടോപ്പ് ബാഗും ഐ ബുക്കും നിലത്തു വീണ ഫയലും ആമാടപ്പെട്ടിയും മറ്റും എടുത്തുകൊണ്ടു അകത്തുകയറി. അവന്റെ പിന്നിൽ ആ വാതിൽ അടഞ്ഞു.

“ഏട്ടാ ആമാടപ്പെട്ടി പൂജാമുറിക്കടുത്തു വെച്ചാൽ മതി.” അവൻ അതനുസരിച്ചു.