ശിവാത്മിക VIII [ മാലാഖയുടെ കാമുകൻ] 1572

ശിവാത്മിക VIII

Author : മാലാഖയുടെ കാമുകൻ

  Previous Part

 

“പ്ലീസ്.. ഞാൻ നിന്നോട് എന്ത് തെറ്റാണു ചെയ്തത്..? പ്ലീസ്…എനിക്ക് നിന്റെ പേര് പോലും അറിയില്ല..”

ശിവ അവളെ നോക്കി കരഞ്ഞുകൊണ്ട് പറഞ്ഞു..

“നിന്റെ പ്രിൻസിനെ ഞാൻ കുത്തി.. കൊല്ലില്ല.. അതൊരു ശിക്ഷ അല്ല…ഹോസ്പിറ്റലിൽ ആക്കിയിട്ടുണ്ട്..”

അവൾ കത്തി പഴുക്കുന്നതും നോക്കി മുഖം വെട്ടിച്ചു പറഞ്ഞു.. ശിവ കരഞ്ഞു.. എന്നാലും അവനെ കൊന്നില്ല എന്ന് കേട്ടപ്പോൾ അവൾക്ക് ഒരു സമാധാനം തോന്നി..

“എന്തിനാ ഇതൊക്കെ..? എന്തിന്..? എന്ത് തെറ്റ് ചെയ്തിട്ടാണ്..?”

ശിവ അലറുന്നത് പോലെ ചോദിച്ചു.. അവൾ വീണ്ടും ചിരിച്ചു..

“നീയാണ് എല്ലാത്തിനും കാരണം..നീയെന്റെ ലൈഫ് നശിപ്പിച്ചവൾ ആണ്…
പറയാം.. പക്ഷെ ആദ്യം എനിക്ക് നിന്റെ സുന്ദരമായ മുഖം ഈ പഴുപ്പിച്ച കത്തി കൊണ്ട് വിരൂപം ആക്കണം..”

അവൾ ആവേശത്തോടെ ഫ്ലെയിം കൂട്ടി വച്ചു..

ശിവക്ക് അലറി കരയാൻ തോന്നി.. പക്ഷെ അവൾ പറഞ്ഞത് അവൾക്ക് മനസിലായില്ല.. എന്തിന് അവൾക്ക് എന്നോട് വിരോധം ഉണ്ടാകണം..?

അവൾക്ക് ഉത്തരം കിട്ടിയില്ല..

പെട്ടെന്ന് അവളുടെ മനസ്സിൽ പ്രിൻസിന്റെ മുഖം തെളിഞ്ഞു വന്നു.. അവന്റെ ചിരി..

“തളർന്നു ഇരിക്കരുത്. ആരും വരില്ല വീണാൽ.. സ്വയം എഴുന്നേൽക്കണം..ബുദ്ധി.. തക്ക സമയത്ത് അത് ഉപയോഗിക്കണം..”

അന്ന് പ്രിൻസ് പറഞ്ഞ വാക്കുകൾ..

ശിവ അവളെ ഒന്ന് നോക്കി..

വിരലുകൾ മടക്കി നിവർത്തിക്കൊണ്ടിരിക്കുന്നു.. തല മെല്ലെ വെട്ടിക്കുന്നു.. കണ്ണുകൾ ഉറച്ചു നിൽക്കുന്നില്ല..

എന്നാൽ മൈസൂർ ബസ് കാത്തു നിന്ന തന്നോട് അവൾ വഴി ചോദിച്ചപ്പോൾ ഈ ലക്ഷണം ഒന്നും കണ്ടില്ല..