രുധിരാഖ്യം 3 [ചെമ്പരത്തി] 399

വെള്ളത്തിലേക്ക് വീണ രത്നങ്ങൾ ഒരു ശബ്ദത്തോടെ പൊട്ടിച്ചിതറി അണഞ്ഞുപോയി.
വാളുകൾ തിരികെ തൂവലുകൾ ആയി അവളുടെ ചിറകോട് ചേർന്നു.

“വൂഷ്…. ”
കാൽമുട്ടുകൾ മടക്കി പാദം നിലത്തൂന്നി വലതു കൈ നീട്ടി പിടിച്ചുകൊണ്ട്, ചുവന്നുതുടുത്ത കണ്ണുകളോടെ ചാടിയെഴുന്നേറ്റ അവളുടെ കയ്യിലേക്ക്,
പ്രതാപവർമ്മയുടെ മൂർത്തികൾ വലിച്ചെറിഞ്ഞ അവളുടെ ആയുധം ഒരു മൂളലോടെ വന്നുചേർന്നു.

അതിന്റെ പിടിയുടെ  പകുതിക്ക്  താഴെ പിടിമുറുക്കിയ അവൾ മഴു പോലെയുള്ള വായ്ത്തല കൊണ്ട് തന്റെ മുന്നിൽ നിന്ന് പെൺകുട്ടിയുടെ ശിരസ്സിന് നടുവേ ആഞ്ഞുവെട്ടി.

ഒരു വാൾ വെള്ളത്തിലേക്ക് ഇറങ്ങി പോകുന്നതുപോലെ അത് അവളുടെ ശരീരത്തെ നെടുകെ പിളർന്നുകൊണ്ട് താഴേക്ക് പോയി..

ആ പെൺകുട്ടിയുടെ ശരീരം നിശ്ചലമായി, ഇരു ഭാഗങ്ങളായി ഇരുവശത്തേക്കും വീണു.

അത് കണ്ട് ഞെട്ടി തിരിഞ്ഞ മറ്റവൾക്ക് ഒന്ന് തല തിരിക്കാൻ പോലും സമയം കിട്ടുന്നതിനു മുന്നേ തന്റെ ചിറകടിച്ചു പറന്നു പൊങ്ങിയ ഇന്ദു, അവളുടെ തലയ്ക്കു നേരെ മുകളിൽ എത്തിയ ശേഷം, തന്റെ ആയുധം അല്പം ചരിച്ചു പിടിച്ച് ആഞ്ഞുവെട്ടി.

മൂന്നാമത്തെ പെൺകുട്ടിയുടെ തലയും കിരീടവും ഹൃദയവും ഒരേസമയം ചിതറിത്തെറിച്ചു.

ഒരു ശബ്ദം പോലും ഇല്ലാതെ അവൾ നിലത്തേക്ക് വീണു പൊടിഞ്ഞു വെറും പൊടിയായിമാറി.

നിലത്ത് കാൽകുത്തിയ ഇന്ദു തന്റെ ചിറകുകൾ ഒന്ന് ശക്തിയായി  കുടഞ്ഞതോടെ, മഴച്ചാറ്റൽ എന്നപോലെ അവളുടെ ചിറകിൽ നിന്ന് വെള്ളത്തുള്ളികൾ ചിതറിത്തെറിച്ചു.