രണ്ടാം ജന്മം 4[അജി] 205

ഞാൻ എന്റെ മനസ്സിൽ ഉദ്ദേശ്ശിച്ചത് അനുവിനോട് പറഞ്ഞു. അനു അങ്ങനെ ചെയ്യാം എന്ന് തലയാട്ടി കാണിച്ചു.

 

അമ്മു അവിടേക്ക് കുറേ ആൽബങ്ങളുമായി വന്നു. അവൾ അതല്ലാം കാട്ടി തരാൻ തുടങ്ങി.അതിലുള്ളത് ആരൊക്കെയാണ് എന്ന് അവൾ പറഞ്ഞു തന്നു. അവരിപ്പോൾ എന്ത് ചെയ്യുന്നു എന്ന് വരെ പറഞ്ഞു തന്നു. അനുവിന് ഒന്നും അവളോട് ചോദിക്കേണ്ടി വന്നില്ല. അമ്മു തന്നെ എല്ലാം പറയുന്നുണ്ടായിരുന്നു. എന്നാലും അനു ഇടക്കൊക്കെ പലതും ചോദിക്കുന്നുണ്ടായിരുന്നു. ഞാൻ അതെല്ലാം നോക്കി മനസ്സിലാക്കി കൊണ്ടിരുന്നു. അനു ഇടക്കൊക്കെ ഇങ്ങനെ മതിയോ ഇനിയും ചോദിക്കണോ എന്ന് എന്നെ കണ്ണുക്കൊണ്ട് കാണിക്കുന്നുണ്ടായിരുന്നു.അമ്മു അതൊന്നും പോരാതെ പലരുടെയും ഫോട്ടോകൾ സോഷ്യൽ മീഡിയകളിൽ നിന്ന് എടുത്ത് കാണിക്കുന്നുണ്ടായിരുന്നു.

 

നേരം ഒരുപാടായി എനിക്ക് ഉറക്കം വന്ന് തുടങ്ങി. അമ്മു ഇപ്പോഴും ഓരോന്നൊക്കെ പറഞ്ഞു കൊണ്ടേ ഇരിക്കുന്നുണ്ട്.

 

“അമ്മു മതി പോയി കിടന്ന് ഉറങ്ങാൻ നോക്ക്…”

 

ഞാൻ അവളെ അവിടെ നിന്ന് പറഞ്ഞ് വിടാൻ നോക്കി.

 

“ഉമ്മ്….എന്നെ പറഞ്ഞ് വിടാൻ നിങ്ങൾക്ക് ദൃതി ആയല്ലേ….”

അവൾ ഒരു ഡബിൾ മീനിങ്ങിൽ പറഞ്ഞു.

 

“പോടീ… അവിടെന്ന്….”

 

ഞാൻ അവളെ അവിടെന്ന് പുറത്താക്കാൻ നോക്കി.

 

“മ്മ്… നടക്കട്ടെ… നടക്കട്ടെ….”

 

അവൾ അതും പറഞ്ഞ് അവിടെന്ന് പോയി. ഞാൻ വാതിലടച്ച് ലൈറ്റ് ഓഫാക്കി താഴേ കിടന്നു. അനുവും അപ്പോൾ കിടന്നു.

 

“അനു നീ ഇവിടെ ഒക്കെയാണോ….?”

ഞാൻ അനുവിനോട് ചോദിച്ചു.

 

“ആാാ… എനിക്ക് ഇവിടെ ഇഷ്ടമായി. നല്ല ആൾക്കാരാ ഇവര്. അമ്മ എന്നെ സ്വന്തം മോളെ പോലെ തന്നെയാ നോക്കുന്നേ… അച്ഛനും അതേ അങ്ങനെ തന്നെ…

 

അമ്മു ആണെങ്കിൽ സ്വന്തം അനിയത്തി പോലെ തന്നെയാണ് എനിക്ക്. എന്നോട് നല്ല കൂട്ടാ അവള്. എപ്പോഴും എന്തെങ്കിലും മിണ്ടിയും പറഞ്ഞിരിക്കും.

 

പൊന്നുവിനെയും അവർക്ക് വലിയ കാര്യമാ… എപ്പോഴും അവളെ അവർ എടുത്ത് കൊണ്ട് നടക്കും.താഴേ വെക്കാതെ.അവര് തമ്മിൽ മത്സരാ ആര് പൊന്നുവിനെ എടുക്കും എന്ന്. എനിക്ക് പോലും അധികം പൊന്നുവിനെ എടുക്കാൻ കിട്ടാറില്ല”

 

“അപ്പോൾ നീ ഇവിടെ സന്തോഷവധിയാണ് ”

 

“മ്മ് “