മാന്ത്രികലോകം 14 [Cyril] 2103

എന്റെ ഉപബോധ മനസ്സിന്റെ ചോദ്യവും അത് പറഞ്ഞതും എല്ലാം കേട്ടു ഞാൻ പൊട്ടിച്ചിരിച്ചു.

‘എന്നില്‍ നിന്നും ഒരുപാട്‌ രഹസ്യങ്ങളെ ഞാൻ പോലുമറിയാതെ നീ സൂക്ഷിച്ചിരുന്നു, പക്ഷേ ഇപ്പോൾ അതെല്ലാം രഹസ്യങ്ങള്‍ അല്ലാതായി കഴിഞ്ഞിരിക്കുന്നു. നിന്നില്‍ അടങ്ങിയിരിക്കുന്ന രഹസ്യങ്ങള്‍ എല്ലാം എനിക്ക് ഇപ്പോൾ അറിയാം.’ ഞാൻ പറഞ്ഞു.

‘അത് അസാധ്യമായ കാര്യമാണ്, ഫ്രൻഷെർ…’ എന്റെ ഉപബോധ മനസ്സിന്റെ ശബ്ദത്തില്‍ ഒരു ഞെട്ടല്‍ ഉണ്ടായിരുന്നു. ‘നിന്റെ ബോധ മനസില്‍ എന്റെ നിയന്ത്രണം ഇപ്പോഴും ഉണ്ട്.. എന്നില്‍ നിന്നും നി എന്തുതന്നെ മനസ്സിലാക്കിയാലും അത് ഞാൻ അറിയും… പക്ഷേ ഒരുപാട്‌ കാര്യങ്ങൾ ഇപ്പോഴും നി മനസ്സിലാക്കിയിട്ടില്ല എന്നു ഞാൻ അറിയുന്നു, ഫ്രൻഷെർ..’

അതുകേട്ട് ഞാൻ ഊറിച്ചിരിച്ചു.

‘ഘാതകവാൾ, ക്ഷണകാന്തി പക്ഷി, പ്രകൃതിയുടെ ഊര്‍ജ്ജം, ദ്രാവക അഗ്നിയുടെ സത്ത എന്ന ഈ നിയന്ത്രണ ശക്തികള്‍ക്കും……. പിന്നെ നിഗൂഢ ശക്തികളും പ്രകൃതി ശക്തിയുടെ സ്വാധീനവും എല്ലാം ഒന്നു ചേര്‍ന്നാല്‍ എന്റെ ശക്തിയെ നിയന്ത്രിക്കാൻ കഴിയുമെന്ന് നി വിശ്വസിക്കുന്നുവോ…..?, അവസാന നിമിഷം നിങ്ങൾ എല്ലാ ശക്തികളും എനിക്ക് എതിരായി തിരിഞ്ഞാൽ പോലും നിങ്ങള്‍ക്കെന്നെ ബന്ധിക്കാൻ കഴിയുമെന്ന് നിങ്ങൾ വിശ്വസിക്കുന്നുവോ..?’ ഞാൻ ചോദിച്ചു.

ഉപബോധ മനസ് പിന്നെയും ഞെട്ടിയത് ഞാൻ അറിഞ്ഞു. ഉടനെ ഞാൻ ഉറക്കെ ചിരിച്ചു.

‘പക്ഷേ നിന്റെ ഉപബോധ മനസായ എന്നെ നി ആ കൂട്ടത്തില്‍ ഉള്‍പ്പെടുത്താൻ മറന്നു പോയിരിക്കുന്നു, ഫ്രൻഷെർ….’

അതുകേട്ട് ഞാൻ പിന്നെയും ചിരിച്ചു.

‘നീയെന്റെ ഉപബോധ മനസ് മാത്രമല്ല എന്ന സത്യവും ഞാൻ അറിയുന്നു…’ ചിരി മതിയാക്കി ഗൌരവത്തോടെ ഞാൻ പറഞ്ഞു.

എന്റെ ഉപബോധ മനസ് ഒന്നും മിണ്ടിയില്ല. പക്ഷേ അതിന്റെ അസ്വസ്ഥത വര്‍ധിക്കുന്നത് ഞാൻ അറിഞ്ഞു.

‘പണ്ട്‌ നിഗൂഢ ശക്തികളും പ്രകൃതി ശക്തികളും ചേര്‍ന്ന് ഒഷേദ്രസിനെ നന്മയുടെ ശക്തിയായി മാറ്റാനും നിലനിര്‍ത്താനും വേണ്ടി അതിശക്തമായ നന്മയുടെ തിരിച്ചറിവ്‌ ഊര്‍ജ്ജത്തെ ഒഷേദ്രസിന്റെ ഉപബോധ മനസില്‍ പകര്‍ന്നു കൊടുത്തിരുന്നു. പക്ഷേ ആ ശക്തി വളര്‍ന്നു നിയന്ത്രിച്ച് ഒഷേദ്രസിനെ നന്മയുടെ ഭാഗമായി മാറ്റുന്നതിന് മുന്നേ ഒഷേദ്രസ് അതിനെ ആദ്യഘട്ടത്തിൽ തന്നെ പുറന്തള്ളി.

അതുപോലെത്തന്നെ ഞാൻ അൽദീയയുടെ ഉദരത്തിൽ എന്നെ നിക്ഷേപിച്ച സമയം, നിഗൂഢ ശക്തികളും പ്രകൃതി ശക്തികളും എന്റെ ഉപബോധ മനസില്‍ ഒഷേദ്രസിന് പകര്‍ത്തിയത് പോലത്തെ അതിശക്തമായ നന്മയുടെ ശക്തിയെ പകര്‍ന്നു തന്നിരുന്നു. നീയാണ് ആ ശക്തി എന്നതിനേയും ഞാൻ അറിയുന്നു. നീയാണ് എന്റെ വ്യക്തിത്വത്തെ മാറ്റി, കഴിഞ്ഞ പതിനേഴ്‌ വര്‍ഷമായി എന്നെ ഇത്തരത്തിൽ നിലനിര്‍ത്തി യിരുന്നത്. പക്ഷേ ഇനി നിന്റെ സ്വാധീനം എന്നില്‍ വിലപ്പോവില്ല… എന്റെ യഥാര്‍ത്ഥ ഉപബോധ മനസ്സിനെയും നിനക്കിനി നിയന്ത്രിക്കാൻ കഴിയില്ല. എന്റെ ഉപബോധ മനസില്‍ അവ്യവസ്ഥ-ശക്തിക്ക് പ്രവേശിക്കാന്‍ കഴിയാത്ത പോലെ ഇനിമുതല്‍ നിനക്കും കഴിയില്ല. അതിനുള്ള തടസ്സങ്ങള്‍ എല്ലാം ഞാൻ സൃഷ്ടിച്ചു കഴിഞ്ഞു. അതുകൊണ്ടാണ് എന്റെ ഉപബോധ മനസില്‍ ഞാൻ മറവ് ചെയ്തിരിക്കുന്ന ബോധ മനസ്സിന്റെ ഒരു അംശത്തിൽ അടങ്ങിയിരിക്കുന്ന രഹസ്യങ്ങളെ നിനക്ക് പോലും അറിയാൻ കഴിയാത്തത്…..