നിഴലായ് അരികെ -7 [ചെമ്പരത്തി] 328

പുറകിലെ ഡോർ തുറന്നു അവൻ പതിയെ ആര്യയെ കൈകളിൽ കോരിയെടുത്തു അകത്തേക്ക് പാഞ്ഞു.

 

“എന്ത് പറ്റിയതാണ്…???? “കാഷ്വാലിറ്റിയിലെ ബെഡിലേക്കു കിടത്തുന്നതിനിടയിൽ, ഓടി വന്ന നേഴ്സ് നന്ദനോട് തിരക്കി.

“ഡ്രസിങ് റൂമിലെ കണ്ണാടി പൊട്ടിയതാണ് ”

 

“ശരി…. പുറത്തേക്കിറങ്ങി നിന്നോളൂട്ടോ….. ഇവിടെ നിൽക്കാൻ പാടില്ല ”

 

ഒന്ന് മൂളിയിട്ട് അവൻ പുറത്തേക്കു നടന്നു.അവന്റെ ഷർട്ടിന്റെ മുൻഭാഗം ഏറെക്കുറെ രക്തത്തിൽ കുളിച്ചിരുന്നു. അപ്പോഴേക്കും പപ്പയും മമ്മിയും അവിടേക്ക് എത്തിയിരുന്നു. മറ്റൊരു നേഴ്സ് ഡോക്ടറെയും കൂട്ടി വന്നു. അവർ പുറത്തു നിൽക്കുന്നവരെ ഒന്ന് നോക്കിയിട്ട്  തിടുക്കത്തിൽ ഉള്ളിലേക്ക് കയറി.

 

അരമണിക്കൂർ കഴിഞ്ഞപ്പോഴേക്കും ഡോക്ടർ പുറത്തേക്കിറങ്ങി… നന്ദൻ വേഗം അടുത്തേക്ക് ചെന്നു…. “ഡോക്ടർ….. അവൾക്ക്…..??? ”

“ഹേയ്….. കുഴപ്പമൊന്നുമില്ലെടോ പേടിക്കേണ്ട…. മുറിവുകൾ സ്റ്റിച് ഇട്ടിട്ടുണ്ട്…കയ്യിലെ മുറിവ് കുറച്ചു ആഴമുണ്ട്.. പിന്നെ ബ്ലഡ് നഷ്ടപ്പെട്ടതിന്റെ നല്ല ക്ഷീണം ഉണ്ട്…കൂടെ പനിയും….. കുറച്ചു കഴിഞ്ഞാൽ റൂമിലേക്ക് മാറ്റാം…  ഇന്ന് ഇവിടെ കിടക്കട്ടെ… നാളെ പോകാം ”

നന്ദൻ പതിയെ തലയാട്ടി. ഡോക്ടർ ഒന്ന് ചിരിച്ചിട്ട് ഉള്ളിലേക്ക് നടന്നു.

എമിലി, ഒരു നെടുവീർപ്പോടെ ഫിലിപ്പിന്റെ കയ്യിൽ അമർത്തിപിടിച്ചു.

 

“പപ്പാ…. ഞാൻ, അവൾ മയക്കം വിടുമ്പോഴേക്കും വീട്ടിൽ പോയി അത്യാവശ്യം സാധനങ്ങൾ എടുത്തിട്ട് വരാം… ”

“ശരി മോനെ……പരമാധി പെട്ടന്ന് വരാൻ നോക്കണേ… ”

“മ്മ്…ശരി.. മമ്മിക്കെന്തെങ്കിലും എടുക്കാനുണ്ടോ “അവൻ എമിലിയോട് ചോദിച്ചു…

“ഇല്ല നന്ദൂട്ടാ…. നീ പോയിട്ട് വേഗം വായോ…… പപ്പയുടെ ടെൻഷൻ ഇതുവരെ കുറഞ്ഞിട്ടില്ല…”

 

“ഞാൻ പോയിട്ട് പെട്ടന്ന് വരാം മമ്മി….. ”  എന്നും പറഞ്ഞു അവൻ കാറിനടുത്തേക്ക് നടന്നു.

അപ്പോഴേക്കും നന്ദന്റെ ഫോൺ റിങ് ചെയ്തു…

അമ്മയാണ്…

“മോനെ…. നന്ദൂട്ടിക്ക്…..????”

 

“കുഴപ്പമില്ലമ്മേ…. മയക്കത്തിലാണ്….. ഞാൻ അങ്ങോട്ട് വരുവാണ്…. ബാക്കി വന്നിട്ട് പറയാം..”