നിയോഗം Part V( മാലാഖയുടെ കാമുകൻ) 1193

അർച്ചനയ്ക്ക് അവിടെ നിൽക്കണം എന്ന് ഉണ്ടായിരുന്നു എങ്കിലും ഏട്ടത്തിക്ക് അറിയാമായിരുന്നു എന്തോ ഒരു പ്രശ്നം ഉണ്ടെന്ന്.

കൂടാതെ അർച്ചനയ്ക്ക് അവളുടെ പ്രാക്ടീസ് സംബന്ധിച്ചു ഡൽഹി വരെ പോകേണ്ട ആവശ്യം ഉണ്ട്.
അർച്ചനയും, ഏടത്തിയും അവരുടെ പപ്പയും ഒരുമിച്ചു ആണ് പോകുന്നത്.

അവർ യാത്ര പറഞ്ഞു പോയി..

ഞാൻ അതിൽ നിന്നും ഫോൺ എടുത്തു ബാക്കി മീനുവിനെ ഏല്പിച്ചു..

അവൾ അത് അലമാരയിൽ വച്ച് പൂട്ടി.

***

വൈകുന്നേരം ഞാൻ ബെഡിൽ ഇരുന്നു ഇനി എന്താകും എന്ന് ആലോചിക്കുകയായിരുന്നു..

മീനു കുളിക്കുകയാണ്..

കതകിൽ ഒരു മുട്ട് കേട്ടപ്പോൾ ഞാൻ ബെഡ്‌റൂമിൽ നിന്നും ഇറങ്ങി ചെന്ന് വരാന്തയിൽ എത്തി കതകു തുറന്നു.

മെറിൻ ആയിരുന്നു..

“എന്താ മാം? മുഖം എന്താ വല്ലാതെ ഇരിക്കുന്നത്? “

അവർ ഒന്നും മിണ്ടിയില്ല. ഞാൻ അകത്തു കയറി കസേര ഇട്ടു കൊടുത്തപ്പോൾ അവർ അതിൽ ഇരുന്നു.

“അവൾ എവിടെ?”

“കുളിക്കുന്നു…”

പറഞ്ഞു തീർന്നതും മീനു കുളിച്ചു ഒരു ടവൽ തലയിൽ കെട്ടി ഒരു ഇളം റോസ് നൈറ്റിയും ഉടുത്തു വന്നു.

“അഹ് മാം.. എപ്പോൾ വന്നു? ഞാൻ ചായ എടുക്കാം ..”

അവൾ ഉത്തരത്തിന് കാത്തു നിൽക്കാതെ അകത്തു പോയി..

“നിനക്ക് മരിക്കാൻ പേടി ഉണ്ടോ റോഷൻ? “

പെട്ടെന്നായിരുന്നു മെറിന്റെ ചോദ്യം.. ഞാൻ അന്താളിച്ചു പോയി.. അവളുടെ ചോദ്യം കേട്ട് അടുക്കളയിൽ പോയ മീനു അതെ സ്പീഡിൽ വന്നു നോക്കി..

“എന്താ മാം? “

ഞാൻ വീണ്ടും ചോദിച്ചു..

“മരിക്കാൻ പേടി ഉണ്ടോ എന്ന്??”

അവൾ ആവർത്തിച്ചു..

“ഇല്ലായിരുന്നു.. എന്നാൽ….”

“എന്നാൽ? “

മെറിൻ പുരികം പൊക്കി എന്നെ നോക്കി..

“ഇപ്പോൾ സ്നേഹിക്കാൻ ആളുകൾ ഉണ്ട് എന്നൊരു തോന്നൽ… ഇന്ന് വീട്ടിൽ പോയിരുന്നു..എന്റെ മീനു.. അർച്ചന, ഏട്ടത്തി.. പിന്നെ മാം തന്നെ.. നിങ്ങൾ ഒക്കെ എന്നെ ഒത്തിരി സ്നേഹിക്കുന്നുണ്ട്.. അപ്പോൾ ഉണ്ട് മാം.. എനിക്ക് മരിക്കാൻ പേടി ഉണ്ട്….”

ഞാൻ അത് പറഞ്ഞു മെറിനെ നോക്കി.. മീനു കണ്ണ് നിറച്ചു എന്നെ നോക്കി..

“നിനക്കോ?”