രാക്ഷസൻ 1

Author : Führer

സുഹൃത്തുക്കളേ.. ഞാൻ മറ്റൊരു കഥയുമായി വീണ്ടും എത്തി. അസ്രേലിൻ്റെ പുത്രൻ സ്വീകരിച്ച പോലെ ഈ കഥയും സ്വീകരിക്കുമെന്ന് പ്രതീക്ഷിക്കുന്നു. ആദ്യ കഥയിൽ നിന്ന് ഒത്തിരി വ്യത്യാസമുള്ള കഥയാണിത്. എഴുത്തിൽ പോലും ആ വ്യത്യാസമുണ്ട്. ഈ കഥയും നിങ്ങൾ സ്വീകരിക്കുമെന്ന പ്രതീക്ഷയോടെ തുടങ്ങുകയാണ്….

  ചെന്നൈ എക്സ്പ്രസ് ചെന്നൈ സെൻട്രൽ സ്റ്റേഷനോട് അടുക്കാറായിരുന്നു. സ്ലീപ്പർ കൂപ്പയുടെ വാതിൽ ഭാഗത്തേക്ക് അവൾ നടന്നെത്തി.

തമിഴ്നാടിൻ്റെ വരണ്ട കാറ്റ് അവളെ തലോടി കടന്നു പൊയ്ക്കൊണ്ടിരുന്നു. ഒരു ജീൻസും ടോപ്പുമായിരുന്നു അവളുടെ വേഷം. തോളൊപ്പം വളർന്നു കിടന്ന മുടി കാറ്റിൽ പാറി പറക്കുന്നുണ്ടായിരുന്നു.
ഏറെ നേരമായി ഒറ്റയ്ക്കുള്ളെ ഇരുപ്പ്  അവളെ വല്ലാതെ വിരസതയിൽ ആഴ്ത്തുന്നുണ്ടായിരുന്നു…

അപ്പച്ചനും അമ്മച്ചിയും കൂടെ വരാമെന്ന് പറഞ്ഞിട്ടും ഒറ്റയ്ക്ക് പൊയ്ക്കോളാമെന്ന തൻ്റെ വാശി ജയിക്കുകയായിരുന്നു. തന്നോട് കാട്ടിയതിൻ്റെ ചെറിയ പ്രതികാരം. പക്ഷേ, ഇപ്പോൾ അവരെ വിട്ടു വന്ന വിഷമം ഉളളിൽ തികട്ടിവരുന്നു. എങ്കിലും തൻ്റെ അലക്സിച്ചായനെ  കാണാനാകുമെന്ന് ഓർത്തപ്പോൾ അവൾക്ക് സന്തോഷവും തോന്നി.  അവൾ പുറം കാഴ്ചയിൽ മുഴുകി നിന്നു.

ആകാശത്തു കാര്‍മേഘങ്ങള്‍ ഉരുണ്ടു കൂടി തുടങ്ങി.. അപ്രതീക്ഷിതമായെത്താന്‍ പോകുന്ന മഴയുടെ മുന്നൊരുക്കം പോലെ കാർമേഘങ്ങൾക്കിടയിൽ ശക്തമായി ഇടിവെട്ടുന്നുണ്ടായിരുന്നു. മഴക്കോളു കണ്ടു തിരക്കേറിയ ചെന്നൈ നഗരത്തിന്റെ സന്തതികള്‍ പരക്കം പാഞ്ഞു.