നിയോഗം Part V( മാലാഖയുടെ കാമുകൻ) 1193

എന്നാൽ അതെന്റെ കാര്യം ആലോചിച്ചുള്ള കണ്ണീർ ആണെന്ന് എനിക്ക് അറിയാമായിരുന്നു.

വീടെത്തി ബൈക്ക് നിർത്തിയപ്പോൾ അവൾ ഒന്നും പറയാതെ വേഗം ഡോർ തുറന്നു അകത്തു കയറി. ഞാൻ ബൈക്ക് ഒതുക്കി വച്ച് അകത്തു കയറി.

ബെഡിൽ കമിഴ്ന്നു കിടക്കുന്നുണ്ട്.

ഞാൻ അടുത്തിരുന്നു.

ഞാൻ അവളുടെ മുടി മാറ്റി മെല്ലെ തലയിൽ തലോടി.

അവൾ തിരിഞ്ഞു കിടന്നു. കലങ്ങിയ കണ്ണുകൾ..

“എന്താ സംഭവം?”

ഞാൻ അവളോട് ചോദിച്ചു.

“എനിക്ക് നിന്റെ കാര്യങ്ങൾ ഒക്കെ കേട്ടപ്പോൾ… “

അവൾ മെല്ലെ പറഞ്ഞു.

ഞാൻ അവളെ ഒന്ന് നോക്കി.. ഇതിന്റെ ഒരു അംശം സ്നേഹം എന്റെ അച്ഛനോ അമ്മക്കോ ഏട്ടനോ ഇല്ലാതെ പോയല്ലോ എന്ന് ഞാൻ ഓർത്തു..
ഉണ്ടായിരുന്നെങ്കിൽ ഞാൻ ആ വീട്ടിൽ അർച്ചനയെയും കെട്ടിപിടിച്ചു ഇരുന്നേനെ ഇപ്പോൾ..

അവൾ എണീറ്റ് എന്റെ കവിളിൽ ഒരു ഉമ്മ തന്നു.

“ഞാൻ ഉണ്ട് നിനക്ക്. ഇതൊരു പണക്കാരിയുടെ വാക്കല്ല. കുറെ ഒറ്റപ്പെടൽ അനുഭവിച്ച ഒരു പെണ്ണിന്റെ വാക്ക് ആണ്…”

“അറിയാം…”

ഞാൻ ഒന്ന് പുഞ്ചിരിച്ചു. അവളും..

“എന്നാലും.. നീ എത്ര പെട്ടെന്നാണ് അവളുടെ മൂഡ് മാറ്റിയത്? “

“അതൊരു സീക്രെട് ആണ് മോനെ. അവൾ ഒരു കാര്യം പറഞ്ഞിട്ടുണ്ട്.. സമയം ആകുമ്പോൾ നിന്നോട് പറയാം..”

അവൾ ഒരു കള്ളച്ചിരിയോടെ പുറത്തേക്ക് പോയി..

****

വീട്ടിൽ അച്ഛൻ വരാന്തയിൽ തന്നെ ഇരിക്കുകയായിരുന്നു.. ഒപ്പം അമ്മയും ഏട്ടനും ഉണ്ട്..

“അവന് അവളോട് പിണക്കം ഒന്നും ഇല്ലല്ലേ.. ശില്പയോട്…”

അമ്മ പറഞ്ഞപ്പോൾ അച്ഛൻ അവരെ ഒന്ന് നോക്കി..

“ഞാനും ശ്രദ്ധിച്ചു.. ഞാൻ അകെ ഇല്ലാതായി പോയി അവൻ അങ്ങനെ ചോദിച്ചപ്പോൾ… ഛെ.. അവനെ അവന്റെ ഇഷ്ടത്തിന് വിട്ടാൽ മതിയായിരുന്നു…”

അച്ഛൻ നിരാശയോടെ പറഞ്ഞു..

“എത്ര പറഞ്ഞിട്ടുണ്ട് അച്ഛാ? ശില്പ അച്ഛന്റെ കാലു പിടിച്ചിട്ടില്ലേ? അവനെ അവന്റെ വഴിക്ക് വിട് എന്ന് പറഞ്ഞു? അവന്റെ ഏക ആശ്രയം അവൾ ആയിരുന്നു. അതാണ് അവൾ തല്ലിയിട്ടും അവളോട് ദേഷ്യം ഇല്ലാതിരുന്നത്…”

ഏട്ടൻ പറഞ്ഞു..

അച്ഛൻ ഒന്നും മിണ്ടിയില്ല.. അമ്മയും.

“അമ്മ അവനെ ഒരു കാരണവും ഇല്ലാതെ അടിച്ചത് ആണ്.. ഇപ്പോൾ എന്തായി? നമ്മുടെ ഒക്കെ അഹങ്കാരത്തിനു കിട്ടിയ അടി.. നാട് മൊത്തം പാട്ടായി.. ഇളയ ചെക്കനെ വീട്ടിൽ നിന്നും ഇറക്കി വിട്ടു അതും കല്യാണ രാത്രി.. എനിക്ക് ചത്താൽ മതി എന്ന് തോന്നുന്നുണ്ട്.. “