നിയോഗം Part V( മാലാഖയുടെ കാമുകൻ) 1198

ഏട്ടൻ നിരാശയോടെ പറഞ്ഞു എണീറ്റുപോയി… ആരും ഒന്നും മിണ്ടിയില്ല.

അമ്മ കണ്ണ് തുടച്ചു..

“ആ പെണ്ണിനോട് ഒരു നന്ദി പറയണം അല്ലെ? അവൻ ജീവനോടെ എങ്കിലും ഉണ്ടല്ലോ.. അഹങ്കാരം ആയിരുന്നെടീ എനിക്ക്.. എല്ലാം പോയി. മക്കൾ ആണ് വലുത് അവർക്ക് വേണ്ടി ആണ് ജീവിക്കേണ്ടത് എന്ന പാഠം ഞാൻ പഠിച്ചപ്പോൾ വൈകി.. ഇനി എന്താകും എന്തോ.. ഞാൻ നിർത്തുകയാണ്. കമ്പനി വിൽക്കാൻ പോകുന്നു. മതിയായി…”

അതും പറഞ്ഞു അച്ഛൻ കണ്ണ് തുടച്ചു.

“എങ്ങോട്ടാ മോളെ?”

അർച്ചനയും, ഏടത്തിയും ഒരു ബാഗും എടുത്തു പുറത്തേക്ക് വന്നപ്പോൾ അമ്മ ചോദിച്ചു.

“മീനുവിന്റെ വീട്ടിൽ.. ഏട്ടൻ അവിടെ ആണ് അമ്മെ.. പോയിട്ട് വരാം…”

അർച്ചന അത് പറഞ്ഞപ്പോഴേക്കും ഏട്ടത്തി നീല കളർ മിനി കൂപ്പർ പാർക്കിങ്ങിൽ നിന്നും എടുത്തു വന്നു.. അർച്ചന അതിൽ കയറി.. വണ്ടി ഗേറ്റ് കടന്നു പോയി.

ഈ കാറിനെ ചൊല്ലി ഉണ്ടായ വഴക്കും ആലോചിച്ചു അച്ഛനും അമ്മയും നിശബ്ദർ ആയി ഇരുന്നു..

****

മെറിൻ രാജനെ കുറെ വിളിച്ചിരുന്നു. ഇന്നലെ വല്ലാത്ത ഒരു അവസ്ഥയിൽ പോയ ആൾ ആണ്. ഇനി ജീവിക്കാൻ താല്പര്യം ഇല്ല എന്നൊക്കെ പറഞ്ഞു.

ചിലർക്ക് ചില പരാജയം വല്ലാതെ മുറിവേല്പിക്കും.

അവളുടെ ഹോൺ ശബ്‌ദിച്ചു.

“മെറിൻ ഹിയർ…”

ഫോൺ എടുത്തു ചെവിയിൽ വച്ച അവൾ കേട്ട കാര്യം.. തല കറങ്ങുന്നത് പോലെ തോന്നി അവൾക്ക്.

റിസീവർ അവളുടെ കയ്യിൽ നിന്നും താഴെ വീണു നിലത്തു പോയി അടിച്ചു കിടന്നു കറങ്ങി.

അവൾക്ക് വിശ്വസിക്കാൻ ആയില്ല.. അടുത്ത കൊലപാതകം. അതും അവളുടെ വലം കൈ ആയ രാജനെ..

ഇന്നലെ അവർ വിട്ടിട്ടു പോയത് ഇന്ന് കൊല്ലാൻ വേണ്ടി ആയിരുന്നു..

റൂമിൽ വന്ന പെണ്ണിന്റെ വാക്കുകൾ അവളുടെ ചെവിയിൽ മുഴങ്ങി..

“രാജൻ.. അവൻ ഇപ്പോൾ തീർന്നിട്ടുണ്ടാകും…”

അവളുടെ കണ്ണ് നിറഞ്ഞു.. അവൾ കാരണം ഒരു ചെറുപ്പക്കാരന്റെ ജീവൻ പോയി എന്ന് അവൾക് തോന്നി..

ഉയർന്ന റാങ്കിൽ ഉള്ള പൊലീസുകാരി ആയിട്ട് കൂടി ഒരു മനുഷ്യൻ തോറ്റു പോയ അവസ്ഥ..

***

വണ്ടിയിൽ ചാരി തകർന്നു നിൽക്കുകയായിരുന്നു മെറിൻ. മുകളിൽ നിന്നും വന്ന ഫോൺ കാൾസ് എല്ലാം വളരെ മോശം ആയിരുന്നു.
ഇങ്ങനെ പോയാൽ ഒരു സസ്‌പെൻഷൻ കിട്ടും എന്ന് തോന്നി മെറിന്.

ഇത്ര നാളും മരിച്ചത് ആളുകൾ ആണെങ്കിൽ ഇപ്പോൾ ഇതാ ഒരു പോലീസ് ഉദ്യോഗസ്ഥൻ. അതും പകൽ നേരം. അയാളുടെ വീട്ടിൽ വച്ചു.

ഫോറൻസിക് വിഭാഗം, മറ്റു പോലീസ് ടീമും മെറിന്റെ അടുത്ത് വന്നു..

“മാം കില്ലിംഗ് സാധാ പോലെ ആണ്. മൂർച്ചയുള്ള ആയുധം, കഴുത്തിലെ ഞരമ്പ് മുറിച്ചു. അവിടെ ഒരു ബലപ്രയോഗം നടന്നിട്ടുണ്ട്.. കൂടാതെ ഈ കേസിനെ മാറ്റി മറിക്കുന്ന ഒരു തെളിവ് കൂടി കിട്ടി.. “