നിയോഗം Part V( മാലാഖയുടെ കാമുകൻ) 1198

ഞാൻ ഒരു ചിരിയോടെ മാസ്കിൽ ഉയർന്നു നിന്ന ചെവിയിൽ പിടിച്ചു..

“പൂച്ചപെണ്ണിന്റെ മനുഷ്യ മുഖം ഇതാ.. “

എന്നും പറഞ്ഞു ഞാൻ മാസ്ക് വലിച്ചു ഊരി..

അവളുടെ മുഖത്തേക്ക് നൊക്കിയ ഞാൻ ഒരു അലർച്ചയോടെ ഞെട്ടി പുറകോട്ടു ചാടി..

എന്നാൽ ആ ചാട്ടത്തിൽ എന്റെ കാലു മടങ്ങി ബാലൻസ് പോയി ഞാൻ അലച്ചു മേശയിലേക്ക് ആണ് വീണത്..

മേശ നെടുകെ പൊട്ടി ഞാൻ നിലത്തു വീണു കിടന്നു വല്ലാതെ പേടിച്ചു കിതച്ചു…

***

മെറിൻ മീനുവിനെ കൊണ്ടുപോയത്‌ അവളുടെ വീട്ടിൽ ആണ്. ലോഡ് ചെയ്ത പിസ്റ്റൾ അവളുടെ അരയിൽ ഉണ്ടായിരുന്നു.

അവർ കുറച്ചു നേരം സംസാരിച്ചു..

“നിനക്ക് വിഷമം ആയോ?”

മെറിൻ ചോദിച്ചപ്പോൾ അവൾ കണ്ണടച്ച് കാണിച്ചു..

“കൈ എന്താ ഒഴിഞ്ഞു കിടക്കുന്നത്? ഈ വാച്ച് കെട്ടിക്കോ…”

മെറിൻ ഒരു വാച്ച് അവളുടെ കയ്യിൽ കെട്ടി… അവൾ മെറിനെ സംശയത്തിൽ നോക്കി.

അവൾ ചിരിച്ചു..

“വാ വല്ലതും കഴിക്കാം ”

മെറിൻ മീനുവിനെ കൊണ്ട് അടുക്കളയിൽ ചെന്നു. ഡോർ അടച്ചു ലോക്ക് ചെയ്തിരുന്നു.. സമയം കുറച്ചു വൈകിയിരുന്നു.

“ഞാൻ ഈ പ്ലേറ്റുകൾ ഒന്ന് കഴുകട്ടെ..”

എന്ന് പറഞ്ഞു മീനു പ്ലേറ്റുകൾ എടുത്തു കഴുകാൻ തുടങ്ങി..

അപ്പോഴേക്കും മെറിന്റെ ഫോൺ ശബ്‌ദിച്ചു.. അവൾ ഹാളിലേക്ക് നടന്നു ഫോൺ എടുത്തു..

ഫോറൻസിക് വിഭാഗത്തിലെ ഒരാൾ ആയിരുന്നു.. മനു..

“യെസ്‌ മനു..?”

മെറിൻ ഫോൺ എടുത്തു ചെവിയിൽ വച്ച് കൊണ്ട് മുൻ വാതിൽ തുറന്നു വരാന്തയിൽ ചെന്ന് നിന്നു.

“മാം ബ്ലഡ് സാംപിൾസ് അനലൈസ് ചെയ്തു….”

അയാളുടെ ശബ്ദത്തിൽ അല്പം പരിഭ്രമം മെറിൻ ശ്രദ്ധിച്ചു..

“ആൻഡ്? വാട്ട് ഡിഡ് യു ഫൈൻഡ്? എന്താ കണ്ടത്? “

മെറിൻ ഉദ്യോഗത്തോടെ ചോദിച്ചു..

“മാം.. എനിക്കറിയില്ല.. മാം ഇതെങ്ങനെ എടുക്കും എന്ന്…”

“മനു.. ഇങ്ങനെ വട്ടു കളിപ്പിക്കാതെ പറയുന്നുണ്ടോ?”

മെറിന് ദേഷ്യം വന്നു..

“ഫൈൻ ഫൈൻ.. ബ്ലഡ് നോക്കി.. എന്നാൽ അത് ഒന്നിനോടും മാച്ച് ആയില്ല. ഡിഎൻഎ വരെ വെത്യാസം ആണ്.. ഒരു മൃഗത്തിനോടും മനുഷ്യനോടും സാമ്യം ഇല്ല…”

“വാട്ട്? വാട്ട് ആർ യു ട്രൈയിങ് ടു സെ? പറ മനു..”