തിരുഗണിക-2 [Harshan] 3797

വാതിലിൽ മുട്ടുന്നത് കേട്ട് ശതരൂപ വന്നു വാതിൽ തുറന്നു.

നോട്ടക്കാരൻ വെള്ളയ്യൻ, കൈയിൽ പിടിച്ചിരുന്ന സഞ്ചി അവൾക്ക് നേരെ നീട്ടി.

അവളതു വാങ്ങി സഞ്ചിയിൽ കൈയിട്ടു നോക്കിയപ്പോൾ ഒരു പച്ച പട്ടുചേല.

കുളിച്ചു ആ പട്ടുചേലയുടുത്ത് ഇരിക്കുവാൻ പറഞ്ഞു കൊണ്ട് അയാൾ അവിടെ നിന്നും തിരികെ പോയി.

അപ്പോളേക്കും സന്ധ്യയാകാറായിരുന്നു.

ശതരൂപ ഒരു വട്ടം കൂടെ കുളിച്ചു വെള്ളയ്യൻ നൽകിയ പച്ച പട്ടുചേലയുടുത്തിരുന്നു

സന്ധ്യ കഴിഞ്ഞ സമയം

വാതിലിൽ മുട്ട് കേട്ട് അവൾ വീണ്ടും പോയി വാതിൽ തുറന്നു.

ശിലാഭദ്രനായിരുന്നു മുന്നിൽ

തലേന്ന് രാത്രി കണ്ടതിനു ശേഷം ഇപ്പോളാണ് അയാൾ കാണുന്നത്.

അയാളെ കണ്ടപ്പോൾ അവൾക്ക് ആശ്വാസം തോന്നി

അയാൾ അവളെ ചേർത്ത് പിടിച്ചു കവിളിൽ തലോടി

അയാളുടെ നെറ്റിയിൽ കറുത്ത മഷികൊണ്ട് നാഗരൂപം മുദ്രകുത്തിയിരുന്നു.

“ഭയന്ന് പോയോ, ഞാൻ ഇന്നത്തേക്ക് ചെയ്യേണ്ട കാര്യങ്ങൾക്ക് വേണ്ടി  പോയതായിരുന്നു , ഞാൻ കൊടുത്തയച്ച ഈ പച്ചപട്ടു ചേലയിൽ നീ ഒരുപാട് സുന്ദരിയായിട്ടുണ്ട് ശതരൂപേ”

“എന്താ ,,എന്തായിതൊക്കെ ?” അവൾ സംശയത്തോടെ ചോദിച്ചു.

“വരൂ ,,നമുക്കിറങ്ങാം,,,,എല്ലാം ഞാൻ വ്യക്തമാക്കിത്തരാം ” ശിലാഭദ്രൻ ശതരൂപയുടെ കൈ പിടിച്ചു.

കൊണ്ട് ബംഗ്ളാവിനു പുറത്തേക്കിറങ്ങി.

കൈയ്യിൽ ഒരു റാന്തലുമായി നോട്ടക്കാരൻ വെള്ളയ്യനും സന്നിഹിതനായിരുന്നു.

അയാളുടെ നോട്ടം അഭിമുഖീകരിക്കാൻ ഭയമുണ്ടായിരുന്നതിനാൽ ശതരൂപ ശിലാഭദ്രന് പിന്നിലായി ഒളിച്ചു.