തിരുഗണിക-2 [Harshan] 3797

അധ്യായം 15

അറുതിയില്ലാവറുതി

കുറച്ചാണ്ടുകൾ നന്നെന്ന പോൽ കടന്നു പോയി.

അനന്തരം:

ഒരു പെരു൦ മാരി തുളുവച്ചിപട്ടണത്തിലേക്ക് കടക്കുന്നതിനും മൂന്നു വാരം മുന്നേ.

യവനപുണ്ണെന്നു പേരുള്ളയൊരു  പെരുമാരി തുളുവച്ചിപട്ടണത്തിന്റെ വടക്കു പ്രദേശത്ത്  പടർന്നു പിടിച്ചു.

വടക്കു ഭാഗത്തു അധമഗണത്തിൽ പെട്ട വേശ്യകളായിരുന്നു വസിച്ചിരുന്നത്.

അവർ യഥാർത്ഥത്തിൽ നാട്യസുമംഗലിമാരിൽ പെട്ടവർ അല്ലായിരുന്നു.

വേശ്യാവൃത്തിയിൽ വൈദഗ്ധ്യവും പ്രാഗല്ഭ്യവും കുറഞ്ഞ അധമ ഗണത്തിൽ പെടുന്ന ആരുമായും വേഴ്ച നടത്തുന്ന മൂല്യം കുറഞ്ഞ ഗണികമാർ, അവരും ഗോപക പട്ടണത്തിൽ നിന്നും വന്നു ചേർന്നവർ തന്നെ.

വേശ്യാവൃത്തിയനുഷ്ഠിക്കുന്ന ഗണികമാരുടെ ഗുഹ്യസ്ഥാനത്ത് പൊറ്റ പുറ്റുകെട്ടിയ പോൽ പുണ്ണ് ബാധിക്കയുണ്ടായി. ഗുഹ്യഭാഗം മൂടും തരത്തിൽ പുണ്ണ് വലുതായി പുണ്ണിൽ നിന്നും സ്രവം നിൽക്കാതെയൊഴുകി സമീപമുള്ള ത്വക്കിലും പുണ്ണ് പിടിച്ചു പുഴുത്ത ദ്വാരം വന്നു കൊടും

വേദനയനുഭവിച്ചു മരിക്കുന്ന യവനപുണ്ണെന്ന എന്ന പകർച്ചവ്യാധി.

നൂറ്റാണ്ടുകൾക്ക് മുൻപ് ഇതുപോലൊരു വ്യാധി നാട്യസുമ൦ഗലികൾക്കിടയിൽ പടർന്നു പിടിച്ചതായൊരു ചരിത്രമുണ്ട്, പായക്കപ്പലിൽ ദീർഘയാത്ര ചെയ്തു വ്യാപാരം ചെയ്യുവാൻ വന്ന യവനവ്യാപാരികളുമായി വേഴ്ച നടത്തിയ നാട്യസുമംഗലികൾക്കിടയിൽ ഇതേ ലക്ഷണങ്ങൾ ഉള്ള മഹാവ്യാധി പടർന്നു പിടിച്ചിരുന്നു.

യവനപ്പുണ്ണു ബാധിച്ചവരിൽ നല്ലൊരു ശതമാനം പേർക്കും വായിലും ചുണ്ടിലും പുറ്റ് പടർന്നു പിടിച്ചു.

തുളുവച്ചിപട്ടണത്തിൽ ആദ്യം അധമഗണികമാരിൽ വ്യാപിച്ചുവെങ്കിലും മെല്ലെയത്  വളരെ കുറച്ചു മാത്രം നാട്യസുമംഗലിമാർ ആയ തുളുവച്ചികളുടെ ഇടയിലും വ്യാപിക്കുകയുണ്ടായി. അതോടെ തുളുവച്ചിപട്ടണത്തിൽ പൂർണ്ണമായും ചേട്ട മൂടിയപോലെയായി. ജീവനിൽ കൊതിയുള്ള ഒരാളും ആ പ്രദേശത്തേക്ക് പ്രവേശിക്കാതെയായി.

ഒരു വശത്ത് പടർന്നു പിടിക്കുന്ന  യവനപുണ്ണെന്ന പെരും മാരി, മറുവശത്ത് ദേഹവ്യപാരം നടക്കാത്തതിനാൽ ഒരു പണം പോലും കൈയിലെടുക്കാൻ ആകാത്ത തരത്തിൽ ദുർഗ്ഗതി പോലെ ദാരിദ്ര്യം. ദിനങ്ങൾ  ഇത് നീണ്ടതോടെ സകലരുടെ ജീവിതവും അവതാളത്തിലായി.

ഒപ്പം അത്തവണ കൊടുങ്കാറ്റും പേമാരിയുമാണ് വന്നത് , അതോടെ സകലകാര്യങ്ങളും പ്രശ്നത്തിലായി, ഖനികളിൽ മുപ്പതാൾപൊക്കത്തിൽ വെള്ളം നിറഞ്ഞു , പലയിടത്തും ഖനികൾ ഇടിഞ്ഞു, പെരും മഴയിൽ ധാന്യങ്ങൾ സൂക്ഷിക്കുന്ന പാണ്ടികശാലകൾക്ക് കേടുപാടുകൾ പിണഞ്ഞു ധാന്യങ്ങൾ നശിച്ചു , പ്രദേശങ്ങളിൽ കാർഷിക വിളകൾ നശിച്ചു.