ഒന്നും ഉരിയാടാതെ 26 [നൗഫു] 4763

കയ്യിൽ ഒരു പൊതിയുമായി ചിരിച്ചു കൊണ്ടായിരുന്നു ബാവു അന്ന് വീട്ടിലേക്ക് വന്നത്.. പലഹാരപ്പൊതി ആയിരുന്നു.. കുറച്ചു ലഡുവും ജിലേബിയും..

മധുരമാണ്, വീട്ടിൽ എനിക്കും ഉപ്പക്കും ഷുഗർ ഉണ്ട്.. എന്നിട്ടും അവൻ ആദ്യമായി കിട്ടിയ കൂലി കൊണ്ട് മധുരം കൊണ്ട് വന്നു തന്നു.. ഇത് രണ്ടും നിങ്ങൾ ഇരുന്നു കഴിക്കണമെന്നും നിര്‍ബന്ധിച്ചു…

ഞങ്ങൾക്കുള്ള ചായ യിൽ എത്ര മധുരം ഇട്ടിട്ടുണ്ടെന്ന് കുടിച്ചു നോക്കി ടെസ്റ്റ്‌ ചെയ്തേ അവൻ ഞങ്ങളെ കുടിക്കാൻ സമ്മതിക്കുമായിരുന്നുള്ളു അങ്ങനെ ഉള്ളവൻ കാര്യമായുള്ള സന്തോഷം കൊണ്ടായിരുന്നു മധുരം കൊണ്ട് വന്നു തന്നത്..

അതിന് മുമ്പ് നാല് ദിവസത്തോളം അങ്ങാടിയിൽ പോയി നിൽക്കും ആരേലും പണിക്ക് അവനെ വിളിക്കുമെന്ന് കരുതി കൊണ്ട്.. സുബുഹി നിസ്കാരം കഴിഞ്ഞ ഉടനെ ഒരു കവറിൽ പണിക്കിടാനുള്ള ഡ്രസ്സുമായി പോകും.. നാല് ദിവസവും ആരും അവനെ വിളിച്ചില്ല… മേലുമ്പിച്ച ഒരു പതിനേഴുകാരൻ എന്ത് പണിയാ ചെയ്യുക എന്ന് അവരും കരുതിയിട്ടുണ്ടാവും… അഞ്ചാമത്തെ ദിവസം ഒരാൾ അവനെ പണിക്ക് കൂടെ കൂട്ടി.. പക്ഷെ അത് പകുതി ശമ്പളത്തിന് ആയിരുന്നു.. അന്ന് എഴുന്നൂർ രൂപ കൂലി സാധാരണ എല്ലാവർക്കും കിട്ടിയപ്പോള്‍ എന്റെ ബാവുവിന് മാത്രം മുന്നൂറ്റി അൻപതു രൂപ…