ആ രാത്രിയിൽ 4 [പ്രൊഫസർ ബ്രോ] 264

“ആ, എന്നാൽ അങ്ങനെ ചെയ്യാം… താൻ എങ്ങോട്ടെങ്കിലും പോകാൻ ഇറങ്ങിയതാണോ”ദേവനെയും ദേവന്റെ വണ്ടിയുടെ അരികിൽ നിന്ന ഗംഗയെയും മരക്കാർ മാറിമാറി നോക്കി

“ആ സർ, ആ കുട്ടിയുടെ ടു വീലർ മോഷണം പോയി എന്ന്… അതൊന്ന് നോക്കണം…”

“ആ ശരി താൻ പോയിട്ട് വാ, എന്നിട്ട് നമുക്ക് തീരുമാനിക്കാം”

“ശരി സർ..”

ദേവൻ തിരികെ ഗംഗയുടെ അരികിലേക്ക് നടന്നു, അകലെനിന്ന് നടന്നടുക്കുമ്പോൾ അവൻ അവളെ ആകമാനം വീക്ഷിക്കുകയായിരുന്നു

അലസമായി അഴിച്ചിട്ട കാർകൂന്തൽ ചെവിയെ പൊതിഞ്ഞിരിക്കുന്നതിനാൽ കമ്മൽ ഉണ്ടോ എന്നറിയാൻ സാധിക്കില്ല, പൊട്ട് തൊടാത്ത നെറ്റിത്തടം.കരിമഷി എഴുതിയില്ലെങ്കിലും എണ്ണക്കറുപ്പുള്ള കൺപീലികൾ, യാതൊരു വിധ മേക്കപ്പും ഇല്ലെങ്കിലും അവൾ സുന്ദരിയായിരുന്നു,

“ഓഹ്‌… പറഞ്ഞിട്ടെന്താ വാ തുറന്നാൽ തീർന്നു…”

ദേവൻ തന്നത്താൻ പറഞ്ഞുകൊണ്ട് അവൾക്കരികിലേക്ക് ചെന്നു

“എന്താ…”

“ഒന്നൂല്ല, രാജേട്ടൻ എവിടെ പോയി എന്നാലോചിച്ചതാ… താൻ കേറ് നമുക്ക് പോകാം…”

ദേവന്റെ ഒപ്പം ഒറ്റക്ക് പോകാൻ മടിച്ചുകൊണ്ട് അവൾ വെളിയിൽ തന്നെ നിന്നു

“തനിക്ക് തന്റെ വണ്ടി വേണമെങ്കിൽ കേറ്… ഞാൻ തന്നെ പിടിച്ചു തിന്നുകയൊന്നും ഇല്ല..”

ദേവൻ പറഞ്ഞു നിർത്തിയിട്ടും അവൾ ഒരിക്കൽക്കൂടി അവിടെ ആകെ ഒന്ന് നോക്കി, രാജനെ അവിടെ എങ്ങും കാണാതായതോടെ അവൾ മടിച്ചു മടിച്ച് വണ്ടിയിൽ കയറി

ബൊലേറോ പോലീസ് സ്റ്റേഷനിൽ നിന്നും പുറത്തേക്ക് പോയതും അവരെ തന്നെ ശ്രദ്ധിച്ചുകൊണ്ട് രണ്ട് മിഴികൾ മതിലിനു പിന്നിൽ മറഞ്ഞു നിന്നത് അവർ രണ്ട് പേരും കണ്ടില്ല