ശിവശക്തി 5 [പ്രണയരാജ] 329

 

മാമ എവിടെ അപ്പു എവിടെ,

 

നീ ഒന്നു ഭയപ്പെട്ടല്ലെ പെണ്ണേ

 

അവനെ കാണണം

 

അവനൊന്നുമില്ല

 

ഇല്ല ഞാനൊക്കെ കേട്ടു

 

എൻ്റെ മോളെ ഡോക്ടർ ഒരു സംശയം പറഞ്ഞാ…

 

ഡോക്ടർ കള്ളനാ… ഇപ്പോ കള്ളം പറയാ…

 

അല്ല എൻ്റെ കുട്ടി…. മോൾ ഒരു കാര്യം ചെയ്യ്

 

നിഷ്കളങ്ക മുഖം ഉയർത്തി , കണ്ണുനീർ ധാരകൾ പൊഴിച്ച് , വിറക്കുന്ന ചുണ്ടുകളാൽ അവൾ മൊഴിഞ്ഞു

 

ഉം… എന്താ…

 

ഇപ്പോ തന്നെ അവനെയും കൂട്ടി വീട്ടിൽ പൊക്കോ

 

സത്യം….

 

അതെലോ പക്ഷെ  കാലു നനയരുത്

 

ഇല്ല ഡോക്ടറെ, അപ്പൻ്റെ അടുത്ത് ഒരു തുള്ളി വെള്ളം പോലും ഇല്ലാതെ ഞാൻ നോക്കി കൊള്ളാം

 

ഡോക്ടർ ചിരിക്കുക മാത്രം ചെയ്തു

 

പിന്നെ ചെക്കപ്പിന് കൊണ്ടു വരണേ…

 

ഓ…..

 

അതു പറയുമ്പോ കാർത്തുമ്പിയുടെ മുഖം പ്രകാശപൂരിതമായിരുന്നു.

 

വർണ്ണശൈല്യം

 

മഹാരാജാവിൻ്റെ അറിയിപ്പിനെ തുടർന്ന് ആദിദേവൻ്റെ മകളാവാൻ തയ്യാറായി, കന്യകമാരായ പെൺകുട്ടികളുടെ നിര തന്നെ വന്നു. എല്ലാവരിലും ഒരു ചിന്ത മാത്രം കുഞ്ഞിൻ്റെ നന്മ, ഒപ്പം നാളെ തങ്ങൾക്കു വന്നു ചേരാവുന്ന അപകടത്തെ തരണം  ചെയ്യുക അതു മാത്രമാണ് അവരുടെയും ലക്ഷ്യം.

 

ആചാര്യൻ പറഞ്ഞ പ്രകാരം ഗുരുദേവൻ ഓരോ പെൺമണിയുടെയും നെറുകയിൽ തൊട്ട് പഞ്ചാക്ഷരി ചൊല്ലി. അവർ പോലും അറിയാതെ പഞ്ചാക്ഷരി ഏറ്റു ചൊല്ലി. അങ്ങനെ ഏറ്റു ചൊല്ലിയ നൂറ്റൊന്നു കന്യകമാരെ ദത്തെടുക്കുവാനായി തിരഞ്ഞെടുത്തു.

 

വൈഷ്ണവ ആചാരപ്രകാരമാണ് ദത്തെടുക്കൽ , ഹോമകുണ്ഡം ഒരുങ്ങി. ഗുരുദേവൻ ആസനസ്ഥനായി. വലതു ഭാഗത്ത്, ആദി ദേവനും, പത്നി ശിവകാമിയും. ഇടതു വശത്ത് 101 കന്യകമാരും. അഗ്നിക്കു മുന്നിൽ വർണ്ണങ്ങളാൽ നിർത്ത നാരായണ രൂപം.