ശിവശക്തി 5 [പ്രണയരാജ] 329

പത്തു നാൾ സമയമാണ് നമുക്കുള്ളത്, ആ സമയം കൊണ്ട് നിങ്ങളിൽ ഒരാളെങ്കിലും  കാളി ദേവിയെ പ്രീതിപ്പെടുത്തണം .

101 കന്യകമാരും സമ്മതം മൂളി.

ആചാര്യൻ കാളി ദേവിയുടെ മുന്നാൾ വലിപ്പമുള്ള മഹാ വിഗ്രഹത്തിനു മുന്നിൽ പ്രധമ പീഠത്തിൽ ഇരുന്നു. അദ്ദേഹത്തിന് പിറകിലായി 101 കന്യകമാരും.. ആചാര്യൻ ചൊല്ലന്ന മന്ത്രങ്ങൾ ഏറ്റു ചൊല്ലി അവർ ധ്യാനത്തിൽ അലിഞ്ഞു ചേർന്നു.

ഓം മഹാ കാളി നമ

ഓം ഐം ഗ്രിം സ്വാഹ

ഓം കാളി മഹാ കാളി..

ഓം ഗ്രിം സ്വാഹ

മന്ത്രോച്ഛാരണങ്ങൾ ഉയർന്നു വന്നു. ആഹൂതികൾ അഗ്നിയിൽ സമർപ്പിക്കപ്പെട്ടു. ചുറ്റും ഇരുൾ നിറഞ്ഞ ഗുഹയിൽ കത്തിയെരിയുന്ന പന്തത്തിൽ നിന്നും തെളിയുന്ന വെളിച്ചം മാത്രം.

ആഹൂതിയിൽ നിന്നും ഉണർന്ന പുകയിൽ നെയ്യിൻ്റെയും മറ്റും ഗന്ധം നിറഞ്ഞു നിന്നു. അതോടൊപ്പം പുകഞ്ഞു കൊണ്ടിരുന്ന കുന്തിരിക്കത്തിൻ്റെ ഗന്ധം കൂടി ചേർന്നതും സ്വർഗ്ഗീയ അനുഭൂതി സർവ്വരിലും ഉണർന്നു.

ധ്യാനത്തിൽ ലയിച്ച 101 പെൺ കുട്ടികളും സ്വയം മറന്ന് ധ്യാനത്തിൻ്റെ മറ്റൊരു തലത്തിലേക്ക് യാത്രയായി, നിർത്താതെ അവർ മന്ത്രം ഉരുവിട്ടു കൊണ്ടിരുന്നു. സമയം അതിവേഗം പാഞ്ഞു കൊണ്ടിരുന്നു. സന്ധ്യ  വഴി മാറി രാത്രി വന്നതും , ചന്ദ്രൻ പ്രഭ ചൊരിഞ്ഞതും ഒന്നും അവരറിഞ്ഞില്ല, ഒപ്പം നിദ്രയുടെ കണിക പോലും അവരെ തേടിയെത്താത്ത സ്വർഗീയ അനുഭൂതിയിൽ അവർ ലയിച്ചു ചേർന്നു.

രാത്രിക്ക് വിടവാങ്ങാൻ സമയമായതും, കിഴക്ക് ഉദയ സൂര്യൻ തൻ്റെ ആദ്യ കിരണത്തെ രക്തവർണ്ണത്തെ അവർക്കായി തുറന്നു വിട്ടു. കിഴക്ക് ചക്രവാളത്തെ കീറി മുറിച്ച് സൂര്യകിരണം പ്രഭ ചൊരിഞ്ഞ നേരം , ധ്യാനത്തിലിരുന്ന രണ്ട് പെൺ കിടാങ്ങൾ ബോധരഹിതരായി.

ആചാര്യൻ മിഴികൾ തുറന്ന് ഗുരുനാഥനെ നോക്കിയതും, ഗുരുനാഥൻ ഭടൻമാരെ കൊണ്ട് വന്നു. പൂജാ സ്ഥലത്തു നിന്നും അവരെ അറയിലേക്കു കൊണ്ടു പോയി. 99 കന്യകമാർ വീണ്ടും പൂജയിൽ  തുടരുകയാണ്.

ഈ സമയം ഒക്കെ അപ്പു കാർത്തുമ്പിയോടൊത്ത് ചിലവിടുകയാണ്, സ്വന്തം മകളെ  ശ്രദ്ധിക്കുവാൻ അവളുടെ അമ്മയും അവിടെ തന്നെ ഉണ്ടായിരുന്നു. മൂന്നു ദിവസം കാർത്തുമ്പിക്ക് മുറിക്ക് പുറത്തിറങ്ങുക എന്നത് വിലക്കിയതാണ്, അതു കൊണ്ട് തന്നെ ആ വിലക്ക് അപ്പുവിനും ബാധകം.

അവളെന്തു കഴിക്കുന്നുവോ അതവനും കഴിയുന്നു. അവളുറങ്ങുമ്പോ അവനുറങ്ങുന്നു. അവൾ ചിരിക്കുമ്പോ അവനും. എല്ലാം അവളുടെ അമ്മയും കാണുന്നു. എന്നാൽ പോലും അപ്പു ഒരു നിമിഷം പോലും അവളിൽ നിന്നും അകന്നില്ല, ആ അമ്മ അവനെ എടുക്കാൻ ശ്രമിച്ച സമയങ്ങളിൽ എല്ലാം തോൽവിയടഞ്ഞു. വാടിയ പുപോലെ തളർന്ന കാർത്തുമ്പി ആ അവസ്ഥയിലും അവനെ മാറോടണച്ചു പിടിച്ചു.

ധ്യാനം പൂർത്തികരിച്ച ശേഷം, സ്നാനത്തിനായി 99 കന്യകമാരെയും ആചാര്യൻ പറഞ്ഞു വിട്ടു.