? ഋതുഭേദങ്ങൾ ?️ 05 [ഖല്‍ബിന്‍റെ പോരാളി ?] 744

പെട്ടെന്ന് പൂമുഖത്ത് ഒരു കാര്‍ വന്നു നില്‍ക്കുന്നതു റൂമിലിരിക്കുന്നവര്‍ അറിഞ്ഞു. അത്തു ദേവില്‍ നിന്ന് വേര്‍പ്പെട്ട് ഡോറിലേക്ക് നോക്കി. ദേവിനെ വന്ന ആളെ മനസിലായതു കൊണ്ടു അവന്‍ എണിറ്റു ഡോറിലേക്കു നടന്നു. ഡോറിനടത്തെത്തിയ ദേവ് തിരിഞ്ഞു അത്തുവിനെ നോക്കി.

““ഞാന്‍ പറഞ്ഞല്ലോ…. നിന്‍റെ അപ്പുവേട്ടനോട് സംസാരിച്ച ശേഷം എനിക്ക് തൃപ്തിയായെങ്കില്‍ അച്ഛനോടും അമ്മയോടും ഞാന്‍ ചോദിച്ചു നോക്കുക മാത്രമേ ചെയ്യു…. അവരെ നിര്‍ബന്ധിക്കുകയൊന്നുമില്ല. ദൈവത്തോട് പ്രാര്‍ത്ഥിക്കു…..”” ദേവ് പറഞ്ഞു നിര്‍ത്തി. ശേഷം ഡോര്‍ തുറന്നു പുറത്തേക്ക് നടന്നു. അത്തു അനുവിനെ ദയനീയമായി നോക്കി. അനു അവളെ നോക്കി രണ്ടു കണ്ണും ചിമ്മി ദേവിന് പിറകെ പുറത്തേക്കു നടന്നു. എന്നാല്‍ അത്തുവിന് ഹാളിലേക്ക് ചെല്ലുവാനുള്ള ധൈര്യമുണ്ടായിരുന്നില്ല. അവള്‍ അവിടെ ബെഡില്‍ തന്നെയിരുന്നു.

പുറത്തു വന്ന കാറിലേക്ക് സംശയത്തോടെ നോക്കി നില്‍ക്കുകയായിരുന്നു സോഫയിലിക്കുന്ന അച്ഛനും അമ്മയും. പുറത്തു ഒരു കാര്‍ വന്നു നിന്നതു അറിഞ്ഞെങ്കിലും നിശ്ചിത സമയം കഴിഞ്ഞിട്ടും അകത്തേക്ക് ആരും വരത്തതിന്‍റെ ഒരു പരിഭ്രമവും അവരില്‍ ഉണ്ടായിരുന്നു. അപ്പോഴാണ് ദേവ് ഹാളിലേക്ക് കടന്നു വരുന്നതു. ദേവ് വന്ന് അമ്മയ്ക്കും അച്ഛനും മുന്നില്‍ നിന്നു. അച്ഛനും അമ്മയും അവനെ നോക്കി.

““അച്ഛാ…. അത്…. അവനാണ്…. അരവിന്ദ് മേനോന്‍….”” ദേവ് പറഞ്ഞു തുടങ്ങി. ആ പേര് കേട്ടതും മറ്റു രണ്ടു പേരുടെയും മുഖം മാറി തുടങ്ങി. ദേഷ്യമോ സങ്കടമോ അങ്ങനെയെന്തോക്കെയോ ഭാവങ്ങളിലുടെ ആ മുഖങ്ങള്‍ കടന്നു പോയി.

““ദേവാ…. അവനെന്തിനാ ഇങ്ങോട്ട് വന്നത്….”” അമ്മ പേടിയോടെ ചോദിച്ചു.

““അമ്മേ…. ഞാന്‍ വിളിച്ചിട്ടാ വന്നത്…. എനിക്ക് അവനോട് ഒന്നു സംസാരിക്കണം….”” ദേവ് മറുപടി നല്‍കി.

““മ്….”” അച്ഛന്‍ ഒരു മുളലില്‍ മറുപടിയൊതുക്കി. ദേവിന്‍റെ ആ പ്രവൃത്തി ഒട്ടും ഇഷ്ടമായിട്ടില്ലെന്ന് ആ മൂളലില്‍ വ്യക്തമായി അറിയുന്നുണ്ടായിരുന്നു. അപ്പോഴെക്കും അനു ദേവിനടുത്തെത്തി. ദേവ് അവരെ വിട്ടു പുറത്തു അരവിന്ദിനടുത്തേക്ക് നടന്നു. അനു അവനെ പിന്തുടരാന്‍ തുടങ്ങിയപ്പോഴെക്കും ദേവ് കൈ കൊണ്ട് അതിനെ വിലക്കി. എന്തോ ആ നേരത്ത് അവനെ എതിര്‍ക്കാന്‍ അവള്‍ക്ക് മനസ് വന്നില്ല. അവള്‍ അമ്മയുടെ അടുത്തു ഇരുന്ന് അമ്മയെ സമധാനിപ്പിക്കാന്‍ ശ്രമിച്ചു. എങ്കിലും നോട്ടം പുറത്തേക്കു തന്നെ പോയിരുന്നു.

അപ്പോഴാണ് ആദ്യമായി അനു അരവിന്ദ് മേനോനെ കാണുന്നത്. ഏകദേശം ആറടിയെക്കാള്‍ ഉയരമുണ്ട് അവന്. വെട്ടിയൊതുക്കിയ മുടി. വെളുത്ത നിറം. പക്ക ജെന്‍റില്‍മാന്‍ ലുക്ക്. അവിടെ ദേവുമായി കാര്യമായ ചര്‍ച്ചയിലാണ് അവന്‍.