രാജമല്ലി ചോട്ടിൽ നിന്നും 2 [ജ്വാല] 1292

സ്കൂൾ അവസാന ഘട്ടത്തിലേക്ക് കടന്നു, ഇപ്പോഴും രാജമല്ലി ചുവട്ടിലെ കൂടികാഴ്ചകൾക്കപ്പുറം യാതൊരു പുരോഗതിയും പ്രാപിക്കാതെ എന്റെ പ്രണയവും മുന്നോട്ട് പൊയ്ക്ക്കൊണ്ടിരുന്നു.

വീണ്ടും ഇന്റർ സ്കൂൾ ഫുടബോൾ മത്സരങ്ങൾ തുടങ്ങി, മറ്റൊരു സ്‌കൂളിലാണ് ക്യാമ്പ്, ഇനി കുറച്ചു നാൾ അവളെ കാണാൻ കഴിയില്ലല്ലോ എന്ന വിഷമത്തിൽ ആണ് ഞാൻ മത്സരങ്ങൾക്ക് പോയത്, ഇക്കുറിയും ഞങ്ങൾ തന്നെ ചാമ്പ്യന്മാരായി,
അനുമോദനങ്ങളും, സ്വീകരണവുമായി കുറച്ചു ദിവസങ്ങൾ പിന്നെയും പോയി. പരീക്ഷ ആരംഭിച്ചു,
അവളെ എന്നും കാണും, ദൂരെ നിന്നാ മുഖം മനസ്സിലേക്കാവാഹിച്ചു ക്ലാസ് റൂമിലേക്ക് പോകും, ദിനചര്യകൾ തുടർക്കഥയായി,
അവസാന ദിവസ പരീക്ഷയ്ക്കായി പോകുന്നതിനു മുൻപ് ഞാനാ രാജമല്ലി ചുവട്ടിൽ പോയി നിന്നു, പതിവ് പോലെ കൂട്ടുകാരികളുടെ കൂടെ ദൂരെ നിന്ന് നടന്നു വരുന്നു പെട്ടന്നവൾ താഴേയ്ക്ക് കുനിഞ്ഞു ചെരുപ്പിൽ കൈകൊണ്ട് എന്തോ തിരയുന്നു കൂട്ടുകാരികൾ അവളുടെ ഇരു വശത്ത് കൂടി കടന്ന് മുന്നോട്ട് പോയി .
ഇപ്പോൾ അവൾ ഒറ്റയ്ക്കാണ് നടന്നു വരുന്നത്
അവളുടെ കണ്ണുകൾ എന്റെ നേരെ നീണ്ടതും ഞാൻ വശ്യമായി ചിരിച്ചു ഞാൻ പോലും അറിയാതെ എന്റെ ചുണ്ടിൽ നിന്നും അതി മനോഹരമായ ചിരി,
ഒരു നിമിഷം അവൾ ശങ്കിച്ചു ചിരിക്കണോ, വേണ്ടയോ കുറച്ചു സെക്കന്റുകൾക്ക് ഇടവേളയിൽ അവളും ചിരിച്ചു.
രണ്ടു വർഷങ്ങൾക്ക് ശേഷം ആദ്യമായി അവളുടെ കുഞ്ഞിരി പല്ലുകൾ പുറത്ത് കണ്ടു. ഞാൻ മയങ്ങി പോയി,
അപ്പോൾ വീശിയ കാറ്റിൽ എന്റെ മേലാസകലം പുഷ്‌പവൃഷ്‌ടി ചൊരിഞ്ഞു കൊണ്ട് രാജമല്ലിയും എന്റെ പ്രണയത്തിന് അനുഭാവം പ്രകടമാക്കി,
വീണ്ടും കാത്തിരുപ്പ് സ്കൂൾ തുറക്കുന്നതും കാത്ത്…

ഒരു അവധിക്കാലം കൂടി, രാവിലെ മുതൽ തുടങ്ങുന്ന കളികൾ, കൂട്ടുകാരുമൊത്ത് വൈകുന്നേരങ്ങളിലെ സൊറ പറഞ്ഞിരിക്കൽ എല്ലാം കൂടി ആകെ സന്തോഷമായ ദിനങ്ങൾ,
ഇതിനിടയിൽ പ്രാണസഖിയെ കാണാൻ കഴിയാത്ത വിഷമങ്ങൾ മനസ്സിനെ നൊമ്പരപ്പെടുത്തിയിരുന്നു.
മാസം ഒന്ന് കഴിഞ്ഞു പരീക്ഷാഫലം വന്നിരിക്കുന്നു,
രാത്രിയിൽ അത്താഴം കഴിച്ചു കൊണ്ടിരിക്കുമ്പോൾ ആണ് ഉമ്മ തുടങ്ങിയത് പത്താം ക്ലാസാണ് ഇനി കൂടുതൽ ശ്രദ്ദിക്കണം,
കളിയൊക്കെ കുറയ്ക്കണം ഉമ്മായുടെ എപ്പോഴുമുള്ള പറച്ചിലാണ്
സ്കൂൾ തുറന്നിട്ടില്ല ഉമ്മാ ഇപ്പോഴേ തുടങ്ങണോ ഈ പയ്യാരം പറയുന്നത്?

പൈസമുടക്കി പഠിപ്പിക്കുന്നവർക്കേ അറിയുള്ളൂ ആ വേദന ഉമ്മ തുടങ്ങി ഇനി ഇപ്പോഴേ നിർത്തില്ല.
ഞാൻ പതുക്കെ എന്റെ മുറിയിലേക്ക് പോയി, കട്ടിലിലേക്ക് വീണു,
കണ്ണുകൾക്ക് ഘനം കൂടി,
ഞാൻ അതി വേഗം നടക്കുകയാണ്,
ദേ കഷ്ടം ഉണ്ട് ട്ടോ?
ഒന്ന് പതുക്കെ നടക്കു, എന്റെ ഒപ്പമെത്താൻ അവൾ ഓടുകയാണ്, മൂക്കിന്റെ തുമ്പിൽ ഉരുണ്ടു കൂടി നിൽക്കുന്ന വിയർപ്പു തുള്ളികൾ, അവളുടെ ഓട്ടം കണ്ട് ഞാൻ നിന്നു.

ങും… എന്തെ നിന്നത്? പെണ്ണ് ആകെ ദേഷ്യത്തിൽ ആണ്…

നീ ദേഷ്യപ്പെടുമ്പോൾ ആണ് കാണാൻ ചേല്,
കണ്ണുകളുടെ ഭംഗി ആഹാ എല്ലാം കൂടെ എന്ത് മനോഹരം,
വായോ എന്റെ ഭംഗിയും നോക്കി നിൽക്കാതെ എന്റെ കൈയും പിടിച്ചവൾ മുന്നോട്ട് ഓടി, പെട്ടന്നായിരുന്നു എതിർ ദിശയിൽ നിന്ന് പാഞ്ഞു വന്ന ലോറി ഞങ്ങളെയും ഇടിച്ചു തെറിപ്പിച്ച് മുന്നോട്ടു പോയത്…