രാജമല്ലി ചോട്ടിൽ നിന്നും 2 [ജ്വാല] 1292

പരീക്ഷ എല്ലാം നല്ല രീതിയിൽ എഴുതി, പരീക്ഷയുടെ അവസാന ദിനം എഴുതി കഴിഞ്ഞു വീണ്ടും രാജമല്ലിയുടെ ചുവട്ടിൽ ഞങ്ങൾ ഒത്തുകൂടി സൗഹൃദങ്ങൾ ഓരോരുത്തരായി യാത്ര പറഞ്ഞു പൊയ്ക്കൊണ്ടിരുന്നു,
എന്റെ പ്രണയം മൊട്ടിട്ടു തളിർത്തു പൂക്കാൻ തുടങ്ങിയതിനു മൂകസാക്ഷിയായ രാജമല്ലി ചെടിയുടെ ശിഖിരങ്ങളിൽ ഞാൻ തലോടി,
ഇവിടെ നിന്നു പുറത്തേയ്ക്ക് ഇറങ്ങുന്നതിന്റെ വിഷമം എന്നെക്കാൾ കൂടുതൽ രാജമല്ലി ചെടിക്കാണെന്ന് തോന്നി പോകും എന്റെ മുകളിൽ പുഷ്പവൃഷ്ടി നടത്തി സ്നേഹം പങ്കുവച്ചു,
നിശാശബ്ദമായി ഏവരോടും യാത്ര പറഞ്ഞു ഞാനും മെല്ലെ പടിയിറങ്ങി…പത്താം ക്ലാസ് പരീക്ഷ കഴിഞ്ഞപ്പോൾ ഇളയ അമ്മാവൻ എനിക്കൊരു “BSA SLR”
സൈക്കിൾ വാങ്ങി തന്നു,
നീല കളർ ഇന്നത്തെ ബുള്ളറ്റിനേക്കാളും വലിയ സൂപ്പർ സ്റ്റാർ,
അതിന്റെ ബെൽ ഒരു പ്രത്യേക ശബ്ദം ആണ്, ഇടയ്ക്കിടെ ഞാൻ ഷബ്‌നായെ കാണാൻ അവളുടെ വീടിന്റെ മുന്നിലൂടെ റോന്ത് ചുറ്റുമായിരുന്നു,
എന്റെ സൈക്കിളിന്റെ ബെൽ കേട്ടാൽ അവൾ ഇറങ്ങി വരും, ഞങ്ങളുടെ പ്രണയലീലകൾ മുന്നോട്ട് പോയി കൊണ്ടിരുന്നു.
അങ്ങനെ പത്താം ക്ലാസ് റിസൾട്ട് വന്നു ഞങ്ങൾക്ക് രണ്ടാൾക്കും നല്ല മാർക്ക് ഉണ്ടായിരുന്നു, ഞാൻ കൊമേഴ്‌സ് ഗ്രൂപ്പും, ഷബ്‌ന സയൻസ് ഗ്രൂപ്പും അങ്ങനെ ഞങ്ങൾ വീണ്ടും പഠനം ആരംഭിച്ചു.

എസ്. എൻ കോളേജിന്റെ മുറ്റത്ത് ഞങ്ങൾ നിന്നു, ഇനി രണ്ടു കൊല്ലം ഇവിടെയാണ്, പ്രീ ഡിഗ്രി അത്ര മോശം ഡിഗ്രി അല്ല എന്ന് പറഞ്ഞ ശ്രീനിവാസനെ മനസ്സിൽ ധ്യാനിച്ചു ഞങ്ങൾ കലാലയത്തിൽ എത്തി.

ഒരു അപരിചിതത്വം ഞങ്ങൾക്ക് ഫീൽ ചെയ്തില്ല, ഞങ്ങൾക്കൊപ്പം പഠിച്ച മിക്ക കുട്ടികളും ഇവിടെയും ഉണ്ട്, പുതിയ അന്തരീക്ഷം, പുതിയ വിഷയങ്ങൾ
ആകെ ക്കൂടി സന്തോഷം ആണെങ്കിലും ഒരു ശ്വാസം മുട്ടൽ,
ഞങ്ങളുടെ പ്രണയം അങ്ങനെ പടർന്നു പന്തലിച്ചു കൊണ്ടിരുന്നു.
കോളേജിലേക്ക് എത്താൻ രണ്ടു വഴികൾ ഉണ്ടായിരുന്നു ഒന്ന് മെയിൻ റോഡ് അത് ഒരു രണ്ടു കിലോമീറ്റർ ചുറ്റിയാണ് വരുന്നത് പിന്നെയുള്ളത് ഇടവഴി കഷ്ടിച്ച് ഒരു കിലോമീറ്റർ പക്ഷെ കുറച്ച് കുന്നു കയറണം,
ഞങ്ങൾ എന്നും മെയിൻ റോഡ് വഴിയേ വരൂ, പ്രണയവും, കുടുംബവും, സ്വപ്നങ്ങളും പങ്കുവച്ചു ഞങ്ങൾ ഇണക്കുരുവികളായി പറന്നു നടന്നു.

രണ്ടാം വർഷം പ്രീഡിഗ്രി സമയത്താണ് ഞങ്ങൾ പഠനം എന്നതിനെക്കുറിച്ച് സീരിയസായി ചിന്തിച്ചു തുടങ്ങുന്നത്. ബാപ്പയുടെ കർശന ഓർഡർ ഫുട്‍ബോൾ കളിക്കാൻ പാടില്ല എന്ന്,
എന്റെ ഇടയ്ക്കിടെ വരുന്ന തലവേദന എല്ലാവരെയും ഭയപ്പെടുത്തിയിരുന്നു അത് കൊണ്ട് ഞാനും ഫുടബോളിനോട് കൂടുതൽ താല്പര്യം കാണിച്ചില്ല.
എന്റെ ഹൃദയം പറിച്ചു മാറ്റുന്നതിന് തുല്യമെങ്കിലും വീട്ടുകാരുടെ നിർബന്ധത്തിന് ഞാനും വഴങ്ങി.
ഞങ്ങൾ രണ്ടാളും മത്സരിച്ചു പഠിച്ചു ഒരു തോൽവി ഇരുവരുടെയും പ്രണയം തന്നെ നിന്ന് പോകുമെന്ന് അറിയാവുന്നത് കൊണ്ട്, ഞങ്ങളുടെ സല്ലാപം മനസ്സിലേക്ക് ഒതുക്കി, പരീക്ഷകൾ തുടങ്ങി,നന്നായി തന്നെ എഴുതുകയും ചെയ്തു. അവസാന ദിവസം പരീക്ഷ കഴിഞ്ഞ് ഞങ്ങൾ ഒന്നിച്ചു നടക്കുകയായിരുന്നു.
ഷമ്മു… ങും
എന്തെങ്കിലും ഒന്ന് പറയൂ,
ഫൈസൂ ഒരു അകാരണമായ ഭീതി എന്നെ അലട്ടുന്നു, എന്തോ നഷ്ടമാകുന്നത് പോലെ…
ഷമ്മു ഇത് നമ്മുടെ അവസാന പഠനമല്ല ഇനിയും നമ്മൾ ഒന്നായി പഠിക്കും, നീ വിഷമിക്കേണ്ട…
ടെക്നിക്കൽ ആയി എന്തെങ്കിലും പഠിക്കണം ഇനി എന്നാലേ ഒരു ജോലി പെട്ടന്ന് കണ്ടെത്താൻ കഴിയു, ഡിഗ്രി പഠിച്ചു പ്രണയിച്ചു നടക്കുന്നതിനേക്കാൾ നിന്നെയും കെട്ടി ജീവിക്കുന്നത് അല്ലേ നല്ലത് മുത്തേ…