നാളെയാണ് ആ ദിവസം… ലച്ചു എന്റെയാകുന്ന ദിവസം…കുറച്ചു മുൻപും ലച്ചു വിളിച്ചിരുന്നു…,  സംസാരിക്കുന്നതിന്റെ ഞാൻ ഇടക്ക് എഴുന്നേറ്റ് പോകുമ്പോഴേ ഇവിടെ ഉള്ള എല്ലാത്തിനും മനസ്സിലാകും ലച്ചു വിളിച്ചിട്ടാണെന്ന് പിന്നെ അതിന്റെ കളിയാക്കലുകൾ ആകും… കാര്യം ഒന്നും മനസ്സിലായില്ലെങ്കിലും കുഞ്ഞാറ്റയും കൂടും അവരുടെ കൂടെ

രണ്ട് ദിവസമായി അവളുടെ ചുറ്റും അവളുടെ കുടുംബത്തിലെ കുട്ടിപ്പട്ടാളം മുഴുവൻ ഉള്ളതുകൊണ്ട് ഒളിച്ചും പാത്തുമാണ് ഫോൺ വിളി. പിന്നെ ഇപ്പോ ദുർഗ കൂടി നാട്ടിൽ എത്തിയത് കൊണ്ട് ആ പിശാശും സ്വൈര്യം കൊടുക്കുന്നില്ല എന്നാ പറഞ്ഞത്…

ദുർഗ ഇപ്പോഴും പഠിത്തമാണ്,b.tech ഫൈനൽ ഇയർ…  ഞങ്ങൾക്കും പോളി കഴിഞ്ഞു പഠിക്കണം എന്നുണ്ടായിരുന്നു എങ്കിലും സാഹചര്യം അനുകൂലമായിരുന്നില്ല അപ്പോഴേ ഉറപ്പിച്ചതാണ് അവളെ അവൾക്കാഗ്രഹം ഉള്ളയത്രേം പഠിപ്പിക്കണം എന്ന്. b.tech കഴിഞ്ഞ് m.tech പഠിക്കണം എന്നൊക്കെ പറയുന്നുണ്ട് നോക്കാം എന്താകും എന്ന്…

പാറ്റയും സംഘവും തൊടുപുഴയിൽ എത്തിയിട്ടുണ്ട് ഒരു ലോഡ്ജിൽ റൂമൊക്കെയെടുത്തു വെള്ളമടിയാണ് ഇന്നത്തെ പരിപാടി… നാളെ കാലത്ത് ഇങ്ങോട്ട് എത്തിയേക്കും

ബന്ധുക്കൾ ഒക്കെ എത്തി തുടങ്ങിയിട്ടുണ്ട് വരുന്നവരൊക്കെ തമാശയെന്നും പറഞ്ഞ് എന്തൊക്കെയോ പറയുന്നു, ഇക്കിളിയിട്ടാൽ പോലും ചിരിക്കാൻ പറ്റാത്ത വളിപ്പിനൊക്കെ കഷ്ടപ്പെട്ട് ചിരിക്കണം… ചിരിച്ചില്ലെങ്കിൽ പറയും “ആ അവന് അഹങ്കാരമാണ്” എന്ന്

അതിനിടക്ക് ചില അമ്മൂമ്മമാരൊക്കെ വന്ന്‌ “അമ്മൂമ്മയെ ഓർമ്മയുണ്ടോ മക്കൾക്ക്…മക്കളെ ഞാൻ കുഞ്ഞായിരുന്നപ്പോൾ എടുത്തോണ്ട് നടന്നതാ” എന്നൊക്കെ പറഞ്ഞു വരും അതിനെന്ത് ഉത്തരം പറയും എന്നറിയാതെ പെട്ട് നിക്കുന്ന അവസ്ഥ..ഓഹ്‌…

“മുത്തേ… ഇതാരാ വന്നേക്കുന്നത് എന്ന് നോക്ക്… ”

ആ പറഞ്ഞു തീർന്നില്ല… അച്ഛന്റെ കൂടെ വരുന്നുണ്ട് ഒരാൾ… എന്റെ ഒരു അകന്ന ബന്ധുവാണ് കണ്ടിട്ട് വർഷങ്ങൾ ആയിക്കാണും ഇനീപ്പോ പുള്ളിക്കെന്താണോ പറയാനുള്ളത്