ചിങ്കാരി 6 [Shana] 541

“ചേച്ചിക്ക് ഇത് പന്ത്രണ്ടാടാ.. “അതുലിന് വിറഞ്ഞു കേറുന്നുണ്ടായിരുന്നു.

“അയ്യോ അതുലേട്ടാ.. പത്താം മാസത്തിലല്ലേ കുഞ്ഞുണ്ടാകുന്നേ.. ഇത് വേറെ എന്തോ കുഴപ്പം ആണു.. വാ ചേട്ടാ ചേച്ചിയെയും വിളിച്ച് ആശുപത്രി പോകാം.. “അജി ആധിയോടെ പറഞ്ഞു.

“ഭ നാറി.. നിനക്ക് പത്ത് പൈസേടെ വിവരമില്ലേ.. എവിടുന്നു കിട്ടി ടി അച്ചു അമ്മായിക്ക് ഇവനെ. “അതുൽ തലയ്ക്ക് കൈയ് കൊടുത്തു.

അപ്പോഴാണ് അജിക്ക് സംഭവം കത്തിയത്.. അവൻ അതുലിനെ പല്ല് മൊത്തം കാട്ടിച്ചിരിച്ചു.. അപ്പോഴേയ്ക്കും അച്ചു പൊട്ടിച്ചിരിക്കാൻ തുടങ്ങി.. ചിരിച്ച് ചിരിച്ച് അവൾ വയറും പൊത്തി നിലത്തിരുന്നു. അവൾ മുഖമുയർത്തി നോക്കിയതും പല്ലുകടിക്കുന്ന അജിയെയാണ് കണ്ടത്.. അവൾ വീണ്ടും പൊട്ടിച്ചിരിച്ചു.. “അയ്യോ അമ്മേ. ഇനി ചിരിക്കാൻ വയ്യായേ..” അച്ചു വയറിൽ വേദന കൊണ്ട് അമർത്തിപ്പിടിച്ചു.

“രണ്ടും നിർത്തുന്നുണ്ടോ ഒന്ന്.. മനുഷ്യൻ വാലിന് തീപിടിച്ച പോലെ നടക്കുമ്പോളാണ് രണ്ടിനും നട്ടപ്രാന്ത് .. “അവൻ ദേഷ്യപ്പെട്ടു.

“ഇപ്പോൾ എന്താ ചേട്ടൻ്റെ പ്രശ്നം..” അച്ചു ചിരി നിർത്തി ചോദിച്ചു.

“എടീ അവളോട്‌ ഒന്ന് പറഞ്ഞാ അവൾ നാലു തിരിച്ചു പറയും അമ്മയും അവളും എങ്ങനെ ഒരു വീട്ടിൽ പൊറുക്കും എന്നുള്ളതാ എന്റെ പേടി ”

” ആ പേടി വേണ്ട ഏട്ടാ , ഇതറിയുമ്പോൾ തന്നെ അമ്മായി നിങ്ങളെ ചവിട്ടി പുറത്താക്കിക്കോളും , അപ്പോഴേക്കും സെലിന്റെ ഇച്ചായന്മാർ ഏട്ടനെ ഒടിച്ചു മടക്കി വല്ല തോട്ടിലും ഇട്ടിട്ട് ആ കൊച്ചിനെ വേറെ കെട്ടിച്ചോളും ”

” എടി സാമദ്രോഹി, കരി നാക്ക് വളക്കാതെടി, ജീവിച്ചു പോട്ടെ ഒന്നുമില്ലേലും നിന്റെയൊക്കെ ഏട്ടനല്ലേ , പാവമല്ലെടി ഞാൻ ”

” പിന്നേ , പാവം അതായിരിക്കും പൂച്ച കണ്ണടച്ച് പാലുകുടിക്കുംപോലെ കല്യാണം കഴിച്ചത് ”

“ടി ടി പതുക്കെ പറയാൻ ഞാൻ ഒന്ന് പറഞ്ഞു., ഇപ്പോഴേ നീയൊക്കെക്കൂടി എന്നെ കുരുതി കൊടുക്കല്ലേ ” അതുൽ ദയനീയമായി പറഞ്ഞു.

” ഞങ്ങൾക്ക് ചിലവ് ചെയ്താൽ മിണ്ടാതിരിക്കാം , ഒന്നാമതെ കല്യാണം കൂടിച്ചില്ല, അതും പോരാഞ്ഞു സദ്യയും മിസ്സാക്കി , ഇതൊന്നും അനുവദിക്കാൻ പറ്റില്ല , സമ്മതമാണേൽ ഞങ്ങൾ വാ അടച്ചോളാം ” അച്ചു പറഞ്ഞു