ചിങ്കാരി 6 [Shana] 541

“അല്ലെങ്കില്‍ ഇവിടെ നടക്കുന്നത് വേറെയായിരിക്കും..”

അത്രയും പറഞ്ഞു അവള്‍ സ്റ്റാഫ് റൂമിലേക്കു നടന്നു.

“എന്തായിരുന്നു മിസേ പ്രശ്‌നം.. ഞാന്‍ ഇപ്പോളാ സംഭവം അറിഞ്ഞത്.. ”
കൂടെ വര്‍ക്ക് ചെയ്യുന്ന അരുണ്‍ തിരക്കി.

“ഓഹ് അത് ചെറിയൊരു തല്ലുകേസ് , അത് കഴിഞ്ഞു ” ചോദ്യം ഇഷ്ടമല്ലാത്തരീതിയില്‍ അവള്‍ പറഞ്ഞു.

“അല്ലേലും ദിവസം ഒന്ന് എന്ന കണക്കിന് എന്തേലും പ്രശ്‌നത്തില്‍ ഇടപെട്ടില്ലെങ്കില്‍ ആര്‍ച്ചക്ക് ഉറക്കം വരില്ല.. മാസം ഒന്നായല്ലേ ഉള്ളൂ ഇവിടെ വന്നിട്ട്. ”
പരിഹാസത്തോടെ വേറൊരു സഹപ്രവര്‍ത്തക പറഞ്ഞു.

“തെറ്റുകണ്ടാല്‍ ആരാണേലും ഞാന്‍ തിരുത്തും. അതിപ്പോ ആരു ചെയ്താലും.” അവള്‍ ചെറിയ ദേഷ്യത്തോടെ മറുപടി പറഞ്ഞു.

“മിസേ ഓരോ പ്രശ്‌നത്തില്‍ ഇടപെട്ടിട്ടു വള്ളി വലിക്കാന്‍ നില്‍ക്കണ്ട, ഇവരൊക്കെ ഏതു തരത്തിലാ പ്രവര്‍ത്തിക്കുന്നതെന്നു പറയാന്‍ പറ്റില്ല.” അരുണ്‍ ഉപദേശമെന്നോണം പറഞ്ഞു.

“ഞാന്‍ ആരെയും പേടിക്കുന്നില്ല, ഇന്നുവരെയും അങ്ങനെ പേടിച്ചു നിന്നിട്ടുമില്ല.. നല്ല ഒന്നാന്തരം തോക്കും കൊണ്ടു വന്ന് നിന്നവന്‍മാരെ കണ്ടിട്ട് ഞാന്‍ പേടിച്ചിട്ടില്ല.. പിന്നല്ലേ.. മുന്നാലു ചുള്ളികമ്പുമായി വരുന്ന പരീക്കിരി പിള്ളാരെ കണ്ടിട്ട് പേടിക്കുന്നത്. അതിന് ലഫ്റ്റനന്റ് കമാന്‍ഡര്‍ ആര്‍ച്ച ഒന്നുകൂടെ ജനിക്കണം.”

അവരുടെ സംസാരം ഇഷ്ടമാവാതെ അവള്‍ മറുപടി പറഞ്ഞു

പിന്നെ ബാഗുമെടുത്ത് പുറത്തേക്കിറങ്ങി.. അധ്യപകരെല്ലാം അവളെ അന്തംവിട്ടു നോക്കി.