ചിങ്കാരി 6 [Shana] 541

അയാള്‍ സീറ്റ് മാറി കൊടുത്തതും അച്ചു…ജനലിനടുത്ത് സ്ഥാനം പിടിച്ചു , പിന്നെ കയ്യിലുള്ള ചിപ്‌സു പൊട്ടിച്ചു തിന്നുകൊണ്ട് പുറത്തേക്ക് നോക്കിയിരുന്നു

ട്രെയിന്‍ നീങ്ങുന്നതിനൊപ്പം മുന്നില്‍ തെളിയുന്ന പ്രകൃതിയുടെ സുന്ദര കാഴ്ചകളെ അവളുടെ കണ്ണുകളൊപ്പി ,പച്ച പട്ടുവിരിച്ചു കിടക്കുന്ന നെല്‍പ്പാടങ്ങളും പുഴകളും എല്ലാം കണ്ടപ്പോള്‍ അവള്‍ക്ക് രണ്ടു വരി കവിത എഴുതാന്‍ തോന്നി പെട്ടന്നു തന്നെ ബുക്കെടുത്ത് അതില്‍ കുറിച്ചു

“പച്ചപുതച്ച നെല്‍പ്പാടമേ നിന്നെ
മുത്തി നില്‍ക്കും കൊറ്റിയുടെ
വെണ്‍മ പട്ടില്‍ പുള്ളികുത്തിയ
പോലെ കാണാനെന്തു ഭംഗി

നീലാകാശത്തില്‍ പാറുന്ന കാകന്‍
നീലപ്പട്ടില്‍കറുത്ത പൊട്ടിട്ട പോല്‍
പച്ചപ്പട്ടില്‍ വെള്ളപ്പൊട്ടിട്ട കൊറ്റി

പാറി വരുന്ന മന്ദമാരുതന്
സുഗന്ധമില്ലങ്കിലും
ചാണകത്തിന്റെ നല്ല വാസന

ഒഴുകുന്ന പുഴക്ക് നടുവില്‍ കോലം
കുത്തിയ മീന്‍പിടുത്തക്കാര്‍

പിന്നെ എന്റെ അടുത്തിരിക്കുന്ന
അങ്കിളിന്റെ കുടവയറും കാണാനെന്തു ഭംഗി.. ”

കവിത എഴുതി വായിച്ചു കഴിഞ്ഞപ്പോള്‍ അവള്‍ക്ക് സ്വയം അഭിമാനം തോന്നി , ഇനി അജിയെ കാണിച്ചു കൊടുക്കണം എന്നിട്ട് പത്രത്തിലേക്ക് അയച്ചു കൊടുക്കണം , ആഹാ ആര്‍ച്ച രാഘവന്‍ അങ്ങനൊക്കെ അടിച്ചു വരുന്നത് കാണാന്‍ എന്താ രസം ഓരോന്നും ഓര്‍ത്ത് സ്വയം പുളകം കൊണ്ടവള്‍ സ്വപ്നം കണ്ട് ഉറങ്ങിപ്പോയി

“ചായ…ചായ , കാപ്പി… കാപ്പി…”

“മസാലദോശ , ഇഡലി വട ,ബ്രഡ് ഓലൈറ്റ് ”

കച്ചവടക്കാരന്റെ ഈണത്തിലുള്ള വിളി അവളെ സ്വപനത്തില്‍ നിന്നുണര്‍ത്തി , പിന്നെ ഒരു കാപ്പിയും മസാല ദോശയും വാങ്ങി ,കാപ്പി വിന്‍ഡോ സൈഡില്‍ വെച്ച് തണുപ്പിച്ചു കുടിച്ചു, വെള്ളം കണ്ടിട്ട് പതിനേഴായന്ന മട്ടില്‍ മസാല ദോശ വാരിവലിച്ചു തിന്നു , അടുത്തുള്ള ആളുകള്‍ അവളെ തുറിച്ചു നോക്കി ഇതൊന്നും തന്നെ ബാധിക്കാത്ത മട്ടില്‍ അവള്‍ വീണ്ടും പുറത്തേക്ക് നോക്കിയിരുന്നു

നാലു മണിക്കൂറത്തെ യാത്രക്കു ശേഷം അവര്‍ കോയമ്പത്തൂര്‍ സ്‌റ്റേഷനില്‍ എത്തി , അവിടെ നിന്നു കുളിച്ചു ഫ്രഷ്.. ആയി ഒരു ടാക്‌സി വിളിച്ച് എക്‌സാം സെന്ററിലേക്ക് പോയി , ഉച്ചയ്ക്ക് രണ്ടു മണിക്കായിരുന്നു എക്‌സാം അവര്‍ എത്തിയതും ഏകദേശം എക്‌സാം തുടങ്ങാന്‍ സമയമായി