ചിങ്കാരി 6 [Shana] 541

“വീട്ടില്‍ എല്ലാര്‍ക്കും സുഖമാണോ അതുലേട്ടന്റെ കല്യാണം കഴിഞ്ഞോ അച്ഛന്‍ അമ്മ ”

“അവരൊക്കെ സുഗായിരിക്കുന്നു അതുലേട്ടനു ഒരു മോളുണ്ട്, നിനക്ക് വീട്ടില്‍ ഒന്ന് പൊയ്ക്കൂടേ, ആര്‍ക്കും പിണക്കമൊന്നും കാണില്ല അതുലേട്ടന്‍ നിന്നെ കുറേ തിരക്കി ഇവിടെ ആണെന്ന് അറിഞ്ഞിട്ടില്ല എങ്കില്‍ വന്നേനെ ”

“ആഗ്രഹം ഇല്ലാഞ്ഞിട്ടല്ല, ഈ അവസ്ഥ അവരറിയണ്ടാന്നു കരുതി , അല്ല അജി ഇപ്പോ എവിടെയാ, നിങ്ങള്‍ ചങ്കും കരളും അല്ലായിരുന്നോ, അവനാണോ നിന്റെ ഹസ്ബന്‍ഡ് ”

അച്ചു ഒരു വേള മൗനം പൂണ്ടു പിന്നെ പറഞ്ഞു “അവന്‍ കല്യാണം കഴിഞ്ഞു ഇപ്പോ ദുബായില്‍ ആണ് ”

അപ്പോഴേക്കും മീരയുടെ വീടെത്തി. ചുറ്റിലും നോക്കികൊണ്ട് അവള്‍ മീരക്കൊപ്പം വീട്ടിലേക്ക് കേറി.

കോളനി പോലത്തെ സ്ഥലമായിരുന്നു അത് ഇപ്പോ നിലം പതിക്കും എന്നപോലെ ഓടിട്ട ഒരു പഴയ വീട് അവര്‍ ചെന്നപ്പോള്‍ കുട്ടികള്‍ ഓടിവന്നു അച്ചുവിനെ കണ്ടപ്പോള്‍ ഒന്നു പതുങ്ങി, കുട്ടികളെ കണ്ടപ്പോഴാണ് അവര്‍ക്കൊന്നും വാങ്ങിയില്ലന്ന ബോധം അച്ചുവിന് വന്നത് പത്തോ പന്ത്രണ്ടോ വയസ്സുതോന്നിക്കുന്ന രണ്ടു കുട്ടികള്‍,ഉടുപ്പിന്റെ പിന്നിയ ഭാഗങ്ങള്‍ തുന്നിക്കൂട്ടിയിട്ടുണ്ട് രണ്ടു പഴയ കസേര അവിടെ കിടപ്പുണ്ട് അവള്‍ അതില്‍ ഇരുന്നു എന്നിട്ട് കുട്ടികളെ കൈ കാട്ടി വിളിച്ചു

“എന്താ നിങ്ങളുടെ പേര് ”

“ഇത് ധന്യ, ഞാന്‍ രമ്യ “കൂട്ടത്തില്‍ മുതിര്‍ന്ന കുട്ടി പറഞ്ഞു

“ആഹാ ഞാന്‍ ആരാന്നറിയോ നിങ്ങളുടെ ചിറ്റ ആണ്, നിങ്ങള്‍ ഏത് ക്ലാസ്സില്‍ ആണ് പഠിക്കുന്നെ ”

“ഞാന്‍ ഏഴിലും ഇവള്‍ അഞ്ചിലും ”

കുറച്ചുസമയം സംസാരിച്ചിരുന്നു ഒരു കട്ടനും കുടിച്ചു പിന്നെ ഒരു ദിവസം വരാമെന്ന് പറഞ്ഞു അവള്‍ അവിടുന്നിറങ്ങി

“അച്ചു നി വീട്ടില്‍ പറയണ്ട , അറിഞ്ഞാല്‍ എല്ലാര്‍ക്കും വിഷമം ആകും, ഞാന്‍ നന്നായി ജീവിക്കുന്നെന്ന് കരുതിക്കോട്ടെ ”