ചിങ്കാരി 6 [Shana] 541

” ഏത് സെലിൻ ഗോൾഡിലെ സെലിനോ ” അച്ചു ഞെട്ടിക്കൊണ്ട് ചോദിച്ചു

” അതേ അവളെ തന്നെ “അതുൽ നാണത്തോടെ പറഞ്ഞു.

“അയ്യട ഒരു നാണം കണ്ടില്ലേ.., ചേട്ടൻ അക്കൗണ്ടന്റ് ആയത് സ്വർണക്കടക്കോ അതോ അവരുടെ വീടിനോ , അവിടെ ജോലിക്ക് പോകുന്നത് ഇതിനാണല്ലേ , എന്നാലും ആങ്ങളയും പെങ്ങളും കൂടി മര്യാദക്ക് ഒരു കല്യാണം കൂടിച്ചില്ലല്ലോ… എന്തൊക്കെ സ്വപ്‌നങ്ങൾ ആയിരുന്നു എല്ലാം തകർത്തില്ലേ ” അച്ചു കളിയാക്കി.

“അല്ല ചേട്ടാ ചിറ്റ അറിഞ്ഞാലുള്ള പുകിലെന്താണെന്ന് ആലോചിച്ചിട്ടുണ്ടോ , അതുപോലെ സെലിൻ ചേച്ചീടെ വീട്ടുകാർ അറിഞ്ഞാലോ , എല്ലാം കൂടി നല്ല ജോറാകും. ടിക്കറ്റ് എടുക്കാതെ ഒരു തമിഴ് പടം കാണും പോലെ.. ജഗപൊക ആകും ” അജി പറഞ്ഞു .

” നീ പറഞ്ഞതും ശരിയാടാ.. ഓർക്കുമ്പോ പേടി ഇല്ലാതില്ല എന്നാലും എന്തേലും വഴി കാണുമായിരിക്കും, അപ്പോ ഒരു ആവേശത്തിൽ ചെയ്തു പിന്നെ സ്നേഹിച്ചിട്ട് വിട്ടുകളയാൻ തോന്നിയില്ല ” അതുൽ അവിടെ ചാരിനിന്നു കൊണ്ട് പറഞ്ഞു.

” എന്നാലും ആ പാവം ചേച്ചിയുടെ കഷ്ടകാലം , അമ്മായിയെ സഹിക്കണ്ടേ, ഇത്രേം വലിയ വീട്ടീന്ന് വരുന്നതല്ലേ ”
അച്ചു അങ്ങനെ പറഞ്ഞതും അതുൽ പൊട്ടിച്ചിരിച്ചു പിന്നെ പറഞ്ഞു

” നിന്നെക്കാളും വിളഞ്ഞ വിത്താടി അവൾ.. അവൾ എന്നെ വളച്ചു കുപ്പീലാക്കുവാരുന്നെടീ ആ കുരുപ്പ് .. രജിസ്റ്റർ മാരേജ് ചെയ്യാൻ സാവകാശം ചോദിച്ച എന്നോട് അവൾ പറഞ്ഞതെന്താന്ന് നിനക്ക് അറിയാവാ…

ഇരുവരും അതുലിൻ്റെ വാക്കുകൾക്കായി ആകാംഷയോടെ കാതോർത്തു..

“അവളു പറയുവാടാ അജി.. കെട്ടുന്നതും കെട്ടാതിരിക്കുന്നതും നിൻ്റെ ഇഷ്ടം.. പക്ഷേ. ഞാൻ ഇന്നു മുതൽ നിൻ്റെ വീട്ടിലാ താമസിക്കുന്നത്. ആരേലും എന്തേലും ചോദിച്ചാ ഭാര്യ ആന്നു പറയണ്ട.. ജനിക്കാൻ പോണ കുഞ്ഞിൻ്റെ തള്ള ആണന്നു പറഞ്ഞാ മതീന്ന്.. “അതുലാരംഗം മനസിലോർത്ത് നെടുവീർപ്പിട്ടു.

“അയ്യോ അപ്പോൾ സെലിൻ ചേച്ചി ഗർഭിണിയാണോ.. അച്ചു ടി നമക്ക് കളിക്കാൻ ഉടനെ ഒരു കൂട്ട് വരുമെടി..”

“അല്ല ചേട്ടാ.. ചേച്ചിക്ക് ഇത് ഏതാമാസം.” അജിയുടെ ചോദ്യം കേട്ട് അതുലിൻ്റെ കണ്ണു തള്ളി. വഴിയേ പോയ ഗർഭം അവൻ്റെയാണെന്നു കേട്ട ഫീൽ ആയിരുന്നു അവന്.. അച്ചു ഇതു കേട്ടു പൊന്തി വന്ന ചിരി കിടച്ചുപിടിച്ചു.. അവളുടെ കണ്ണ് ഒക്കെ നിറഞ്ഞു വന്നു.