ചിങ്കാരി 6 [Shana] 541

“മോളേ നിനക്ക് നാളെ പോയാല്‍ പോരെ ഇനി ഈ രാത്രി പോണോ ..” അച്ഛൻ അവളോടു ചോദിച്ചു

“അച്ഛാ അവന് വയ്യാന്നു പറഞ്ഞതല്ലേ ഒന്നു പോയിട്ട് വരാം ഇല്ലേല്‍ ഒരു സമാധാനം ഉണ്ടാകില്ല.. ”

“കറങ്ങി നിൽക്കാതെ പെട്ടെന്നു വരണം ഇരുട്ടിയതു മറക്കണ്ട ”

“പെട്ടെന്ന് വരാം അച്ഛാ.. ”

അതും പറഞ്ഞു അതുലിനെയും കൂട്ടി അവള്‍ അജിയുടെ വീട്ടിലേക്കു പോയി, പോയ വിശേഷം മുഴുവന്‍ അവനോടു പറയാതെ അവള്‍ക്കു സമാദാനം കിട്ടുന്നില്ലായിരുന്നു.

“ടി നിന്നെ ഗേറ്റിന്റെ അടുത്ത് ആക്കിത്തരാം, തിരിച്ചു അജിയുടെ കൂടെ പോരില്ലേ”

“ആ ഏട്ടന്‍ പൊയ്‌ക്കോ ഞാന്‍ അവന്റെ കൂടെ വീട്ടില്‍ പൊയ്‌ക്കോളാം ”

അതുല്‍ അവളെ ഗെയിറ്റിനു മുന്നിലാക്കി തിരിച്ചു പോയി…അച്ചു ചെല്ലുമ്പോള്‍ പുറത്തു അജിയും കൂട്ടുകാരും സംസാരിക്കുന്നുണ്ടായിരുന്നു അവള്‍ വരുന്നത് അവര്‍ കണ്ടില്ല , അവരെ ഒന്ന് പേടിപ്പിക്കാന്‍ അവള്‍ പതുങ്ങി നടന്നു, അപ്പോഴാണ് അവള്‍ അവരുടെ സംസാരം കേട്ടത്, പെട്ടെന്നു മുന്നോട്ട് വെച്ച അവളുടെ കാലുകള്‍ നിശ്ചലം ആയി. കണ്ണു നിറഞ്ഞുവന്നു. അവർ പറയുന്ന വാക്കുകൾ തലയിൽ വീണ്ടും മുഴങ്ങും പോലെ, കണ്ണിൽ നിന്നും ധാര പോലെ കണ്ണുനീർ ഒഴുകിക്കൊണ്ടേ ഇരുന്നു, ഒരുനിമിഷം പോലും അവൾക്കവിടെ നിൽക്കാൻ തോന്നിയില്ല, ഇരുട്ടിനെ വകവെയ്ക്കാതെ അവൾ പുറത്തേക്കോടി, നിലത്തു വീണു കാല് മുറിഞ്ഞിട്ടും അവൾ അറിഞ്ഞില്ല വീണ്ടും എഴുന്നേറ്റോടി അതിലും വേദന മനസ്സിനെ ബാധിച്ചിരുന്നു…..

********************************

” മാം ….. പേപ്പര്‍ ….. ”