ചിങ്കാരി 6 [Shana] 541

ക്ലാസിനു പുറത്ത് കുട്ടികള്‍ ബുക്കുകള്‍ പലതും മറിച്ചു റിവിഷന്‍ ചെയ്യുന്നത് കണ്ടപ്പോഴാണ് ഇത്രയും സമയം താനൊന്നും തുറന്നു നോക്കിയില്ലന്നുള്ള ബോധം അവള്‍ക്കു വന്നത് . അവിടെ പെണ്‍കുട്ടികള്‍ ആയിട്ട് അവളും വേറൊരു കുട്ടിയും മാത്രമേ ഉണ്ടായിരുന്നുള്ളൂ

ഫസ്റ്റ് ബെല്‍ അടിച്ചപ്പോള്‍ തന്നെ അവള്‍ ക്ലാസില്‍ കയറി റോള്‍ നമ്പര്‍ നോക്കി സീറ്റ് പിടിച്ചു , അടുത്ത് അജിയെ പോലെ ഒരു കുട്ടി ഇരുപ്പുണ്ടായിരുന്നു അവനെ കണ്ടതും അജിയെ അവള്‍ക്ക് വല്ലാതെ മിസ് ചെയ്തു . അപ്പോഴേക്കും തലയില്‍ അങ്ങിങ്ങായി രണ്ടു മൂന്നു മുടി പേരിന് വെച്ചിട്ടുള്ള ഒരു കഷണ്ടി തലയന്‍ ക്ലാസില്‍ വന്നു അയാളുടെ ഗൗരവം നിറഞ്ഞ മുഖം കണ്ടതും അവളുടെ ഉള്ള ധൈര്യം ചോര്‍ന്നു.. ചോദ്യ പേപ്പർ കിട്ടിയതും അതില്‍ മുഴുവന്‍ കണ്ണോടിച്ചു ഒറ്റക്ക് ആയതു കൊണ്ട് എക്‌സാം എഴുതാന്‍ ഒരു സുഖം തോന്നിയില്ലെങ്കിലും മാക്‌സിമം നന്നായി അവള്‍ എക്‌സാം എഴുതിയിട്ടാണു പുറത്ത് ഇറങ്ങിയത്

തിരിച്ചു ട്രെയിന്‍ കേറി വീട്ടിലെത്തിയപ്പോള്‍ അനുവിനോടും അഞ്ജുവിനോടും കത്തിവെക്കുന്ന അതുലിനെ കണ്ടു.. അവളെ കണ്ടതും ചോദ്യങ്ങളായി..

“കാന്താരി എക്‌സാം എങ്ങനെ ഉണ്ടായിരുന്നു.. ”

“കുഴപ്പമില്ല ഏട്ടാ, വായിനോക്കാന്‍ പറ്റിയ ഒരണ്ണം പോലും അവിടുണ്ടായില്ല എല്ലാം ഓരോ പേക്കോലങ്ങള്‍, എക്‌സാമെടുക്കാന്‍ സാര്‍ പോലും കഷണ്ടി.. ” അവള്‍ വിഷമത്തോടെ പറഞ്ഞു.

“ടി നീ അവിടെ വായിനോക്കാന്‍ പോയതാണോ എക്‌സാം എഴുതാന്‍ പോയതോ..”

“എക്‌സാം എഴുതാന്‍ തന്നാ പക്ഷേ ഇവമ്മാരുടെ കൂടെ വേണ്ടേ പഠിക്കാന്‍ , ഇനി വേറെ സെന്ററില്‍ നിന്ന് വല്ല ചുള്ളനും വന്നാല്‍ മതി, അജിയില്ലാത്ത കൊണ്ട് എനിക്കൊരു പെയര്‍ വേണ്ടേ.. ”

“ദൈവമേ മുട്ടേന്നു വിരിയും മുന്നേ അവളുടെ പറച്ചില്‍ കണ്ടോ… എടി ഞങ്ങള്‍ രണ്ടു പേരുണ്ടിവിടെ അതെങ്കിലും മറക്കല്ലേ… ” അനു അവളോട് പറഞ്ഞു

“നിങ്ങള്‍ക്കു വേണേല്‍ നിങ്ങള്‍ നോക്കിക്കോ ഞാന്‍ വേണ്ടാന്ന് പറഞ്ഞോ, പിന്നെ കൂടുതല്‍ നല്ലപിള്ള ചമയണ്ട നിന്റെയൊക്കെ ചുറ്റിക്കളി ഞാന്‍ പൊക്കിക്കോളാം… ”

“പോടീ അവിടുന്ന് ആവശ്യമില്ലാത്തതു പറഞ്ഞാലുണ്ടല്ലോ …” അഞ്ചു അവള്‍ക്കു നേരെ കയ്യോങ്ങി

“അതുലേട്ട ഈ വട്ടുകളോട് സംസാരിച്ചിരിക്കാതെ ഒന്നു വന്നേ അജിയെ കണ്ടിട്ടു വരാം ”