ബൂസ്റ്റ്‌ [അലീന] 353

അമ്മ ധൃതിയിൽ വരുന്നതിനിടയിൽ അച്ഛനെ ചീത്ത പറയുന്നുണ്ട്..അമ്മ എപ്പോളും ഇങ്ങനെയാ… കാണാതിരുന്നാൽ ഭയങ്കര അന്വേഷണവും വെപ്രാളവുമൊക്കെയാ… കണ്ടു കഴിഞ്ഞാൽ പിന്നെ രണ്ടെണ്ണവും കീരിം പാമ്പുമാ…

നനഞ്ഞു കുളിച്ചു വന്ന അച്ഛന്റെ തല തോർത്താനുള്ള തോർത്തുമായാണ് അമ്മയുടെ വരവ്.. അച്ഛനാകെ നനഞ്ഞു ഒരു പരുവമായിരിക്കുന്നു..

തലയൊക്കെ തോർത്തി, മുണ്ടും ഷർട്ടും ഒക്കെ മാറി അച്ഛൻ കട്ടിലിൽ വന്നിരുന്നു…
അമ്മ വേഗത്തിൽ അച്ഛനുള്ള ചോറും കറിയും മേശപ്പുറത്തു കൊണ്ട് വച്ചു…

അച്ഛന് മാത്രായിട്ടു ഒരു പ്ലേറ്റ് ഉണ്ട്…അച്ഛന് കറികളൊക്കെ വേറെ വേറെ വേണം.. അപ്പൊ കുറെ ചെറിയ പിഞ്ഞാണങ്ങൾ ഒക്കെ വേണല്ലോ..

അതിനൊക്കെ എളുപ്പയിട്ടു നാലു കള്ളികൾ ഉള്ള ഒരു പ്ലേറ്റ്.. കഴിഞ്ഞ തവണ മീറ്റിംഗിന് എറണാകുളത്തു പോയപ്പോ വാങ്ങിച്ചോണ്ട് വന്നതാ..

കൂട്ടത്തിൽ എനിക്കൊരു ഉടുപ്പും കൊണ്ട് വന്നു..
ഒരു വെള്ളയും റോസും കളർ ഉള്ള മാലാഖയുടെ പോലത്തെ ചിറകൊക്കെ ഉള്ള ഒരുടുപ്പ്..

“ഡീ.. ഞാൻ കൊണ്ടുവന്ന പൊതിയിൽ ഒരു സാധനമുണ്ട്… ” അച്ഛന്റെ ഒച്ച കേട്ട് ഞാൻ അടുക്കളയിലേക്ക് ഓടി..

അമ്മ അപ്പോളേക്കും പൊതി എടുത്തു എന്റെ കൈയിൽ തന്നു..
ഞാൻ തിടുക്കത്തിൽ പൊതി തപ്പി…

കുറച്ചു പച്ചക്കറികൾക്ക് ഇടയിൽ ഒരു ചുവന്ന കളറുള്ള ഒരു ചില്ലു കുപ്പി…
ഞാൻ അതെടുത്തു വായിക്കാൻ നോക്കി.. നല്ല കനമുണ്ട്.. എടുത്ത് പേര് തപ്പി..

“BOOST..!!! ഹായ് ബൂസ്റ്റ്‌…”

സന്തോഷം കൊണ്ട് തുള്ളി ചാടിയില്ല എന്നേയുള്ളു…
അപ്പൊ തന്നെ ഞാൻ അത് തുറന്നു…

അശ്വതി കഴിഞ്ഞ ദിവസം പറഞ്ഞപ്പോ മുതൽ ഞാൻ ആഗ്രഹിക്കുകയായിരുന്നു… പറഞ്ഞു കേട്ടല്ലാതെ ഇതിന്റെ ഉള്ളിൽ എന്താണെന്നു ഇതുവരെയും അറിയില്ല…

“കൊച്ചിന് പാലിൽ കലക്കി കുടിക്കാനുള്ളതാ..” അച്ഛൻ അവിടെ ഇരുന്ന് പറഞ്ഞു…
അപ്പൊ തന്നെ ഞാൻ പോയി പാൽ തപ്പി..

സമയം ഏതാണ്ട് 9.45 ആകുന്നു… ഇപ്പോ എവിടുന്നു പാൽ കിട്ടാൻ…

വീട്ടിൽ 7 ആടുകൾ ഉണ്ട്… പാൽ കറക്കി രാവിലെയും വൈകിട്ടും കുടിച്ചു.. ഇനി നാളെ രാവിലെ കറക്കണം…

ശോ… ഇനിയെന്ത് ചെയ്യും….

ഞാനാ കുപ്പിയും കെട്ടിപിടിച്ചു ഇങ്ങനെ നിന്നു..