അതിജീവനം 3 [മനൂസ്] 3032

റൂമിലേക്ക് കാലെടുത്ത് വാക്കാനൊരുങ്ങിയതും എന്തോ ഓർത്തപോലെ അവൻ തിരിഞ്ഞു നിന്നു.

“ഉമ്മ മരുന്ന് കഴിച്ചോ ഇന്നത്തെ..”

എന്നും മുടങ്ങാതെ അത് കൊടുക്കുന്ന താൻ ഇന്ന് ഉമ്മയെ മറന്നിരിക്കുന്നു.

ഉമ്മ കഴിച്ചോ എന്ന് പോലും തിരക്കിയില്ല.

പുഞ്ചിരിച്ചുകൊണ്ട് ഉമ്മ തലയാട്ടുന്നത് കണ്ടതും അവൻ ഉമ്മക്കരികിലേക്ക് ഓടിയടുത്തു.

“എന്റെ ഉമ്മാനെ മറന്ന് പോയി ഞാൻ കുറച്ച് നേരത്തേക്ക്… പൊറുക്ക് ഉമ്മ”

ഉമ്മയെ കെട്ടിപിടിച്ചു കൊച്ചു കുട്ടിയെ പോലെ അവൻ പറഞ്ഞു.

അവന്റെ തലയിൽ തലോടി ഉമ്മ അവനെ ആശ്വസിപ്പിച്ചു.

ഉമ്മയുടെ മാറിലെ ചൂടുപറ്റി നിന്നപ്പോൾ അവന്റെ മനസ്സിന് അല്പം ശാന്തത കൈ വന്നു.

ഉമ്മയുടെ മടിയിൽ തലവച്ചു കിടന്ന് അവൻ ഇന്ന് നടന്ന സംഭവങ്ങൾ എല്ലാം പറഞ്ഞു.

എല്ലാം ശാന്തമായി ഉമ്മ കേട്ടിരുന്നു..

എല്ലാം കേട്ട് കഴിഞ്ഞതും കൈകൊണ്ട് ആംഗ്യഭാഷയിൽ ഉമ്മ പലതും അവനോട് പറഞ്ഞു.

തന്നെ സ്നേഹപൂർവം ശകാരിക്കുകയാണ് എന്നത് മനസ്സിലാക്കാൻ അവന് കഴിഞ്ഞു.

പെണ്ണിനോട് ഒരിക്കലും മോശമായ ഭാഷയിൽ സംസാരിക്കരുതെന്നും ആരുടെയും ഉമ്മയെയും ഉപ്പാനെയും കുറിച്ച് മോശമായി പറയരുതെന്നും ഉമ്മ അവനോട് പറഞ്ഞു.

എല്ലാം അവൻ അനുസരണയുള്ള കുട്ടിയെ പോലെ ശ്രദ്ധിച്ചിരുന്നു.

ഇത്രയും നേരത്തെ തന്റെ തെറ്റായ ധാരണകളെയെല്ലാം തിരുത്തുന്ന തരത്തിൽ ഉള്ളതായിരുന്നു ഉമ്മയുടെ മറുപടി.

ചെയ്തത് തെറ്റാണെന്ന് ബോധ്യമായ നിമിഷം.