?കരിനാഗം 4? [ചാണക്യൻ] 225

അതിനാൽ തന്നെ തലേന്ന് രാത്രി വീടിന്റെ ഉമ്മറത്തും മുറ്റത്തും ഒക്കെ രാധയും മഹിയും ചേർന്ന് മൺ ചിരാതുകൾ തെളിയിച്ചു വച്ചിരുന്നു.

രംഗസ്ഥൽ ഗ്രാമത്തിന്റെ എല്ലാ വീടുകളിലും ചിരാതുകൾ ശോഭയോടെ തെളിഞ്ഞു നിന്നു.

രംഗോലി ഉത്സവത്തെ സ്വാഗതം ചെയ്തുകൊണ്ട് ആ ഗ്രാമമാകെ മൺ ചിരാതുകളിലെ ദീപനാളങ്ങൾ സമ്പൽ സമൃധിയുടെയും ഐശ്വര്യത്തിന്റെയും സുവർണ പ്രകാശം പരത്തി.

രംഗോലിയുടെ ഒന്നാം ദിവസം മഹിയ്ക്ക് പിടിപ്പത് പണിയുണ്ടായിരുന്നു.

ആസാദി കുടുംബം അവനു ഒരുപാട് കാര്യങ്ങൾ ചെയ്തു തീർക്കാനുള്ള ചുമതല നൽകിയിരുന്നു.

ഇനി മൂന്ന് ദിവസം ജനങ്ങൾ ആഘോഷത്തോടെ എല്ലാം മറന്നുകൊണ്ട് കൊണ്ടാടുന്ന ഉത്സവമായതിനാൽ ഉത്സവത്തിന്റെ ഒരുക്കങ്ങൾ ഒരു മാസം മുന്നേ ഗ്രാമത്തിൽ തുടങ്ങിയിരുന്നു.

ഉത്സവം മുഴുവനും നടത്തുന്നത് ആസാദി കുടുംബത്തിന്റെ മേൽനോട്ടത്തിലാണ്.

രാവിലെ മുതലേ സഞ്ചാരികളുടെ വിരളമായ ഒഴുക്ക് തുടങ്ങിയിരുന്നു.

പക്ഷെ എന്നത്തേയും പോലെ മൂന്നാം ദിവസമാകുമ്പോഴേ ഗ്രാമം സഞ്ചാരികളെ ക്കൊണ്ട് നിറഞ്ഞ് അതിന്റെ മൂർദ്ധന്യാവസ്ഥയിൽ എത്തുകയുള്ളു.

അതുകൊണ്ട് എല്ലാം ഒന്നു ഉണർന്നു വരുന്നതേയുള്ളൂ.

രംഗസ്ഥലിന്റെ പടിഞ്ഞാറ് ഭാഗത്തിന്റെ നിയന്ത്രണം മഹിക്കായിരുന്നു ലഭിച്ചത്.

അതിനാൽ രാവിലെ തൊട്ടേ അവൻ അവിടെയായിരുന്നു.